الطريق الى السماء
الحلقة 9
بقلم طارق اللبيب ..
طبعا ياسليمان .. فاروق كان متضايق من حكاية الملايين البدفعها شهريا دي .. والقصة دي ماكلة معاهو جنبة شديد .. اها يوم سمع انو لبنى اشترت بيت لاهلها .. انقر الكلمو منو؟.. كلمته سارة الضارة
الله يضرها ..
اها طوالي قعد يخطط بمعاونة ابليس .. ركب عربيتو وجا البيت لي ناس عمي .. مالقى لبنى .. ودخل سلم على عمي ..
ودخل لاقى ليلى .. ولقى فيها فرصته ..
قال ليها ان شاء الله مبسوطين .. والحمد لله انا سمعت انكم اشريتو البيت وكدا.. يادوب اطمنت على لبنى وعلى مرام .. والله انا كنت متضايق انو تسكنو بالايجار.. بس كان في مشكلة .. في الشركة بس الحمد لله هسي اتحلت وبعد كدا الامور كلها ح تمشي تمام .. بتكلم معاها كدا وراح مادي ليها خمسة مليون ربطة واحدة امات خمسين
قال ليها والله انا يادوب عرفت قيمتكم .. وعرفت قيمة لبنى .. والله انا فقدت لبنى شديد .. ومشتاق لي مرام .. انتي عارفة يا حجة اهل مراتي القديمة من عرفو انا اتزوجت .. بقيت متضايق من لبنى.. وما قادر اشوفها ولا اشوف بتي .. شكلهم عملو لي حاجة ..
لكن هسي الحمد لله ..فتحت وبقيت بشتاق لي لبنى ولي مرام .. بس ياريت لبنى تسامحني وتقبل ترجع لي ..
انا والله ظني فيك كبير .. وواقع في عرضك .. ومابقصر معاك .. والبيت الرحلتو منه . في شمبات .. حقكم.. وانا أصلا مخليهو لي بتي ومن حقها .. وانا مستعد اسجله ليك انتي باسمك لوعايزة.. عشان لبنى تطمن .. تاني لو حصلت اي حاجة ما ح انزعه منها .. بس عايز منك حاجة .. عليك الله اقنعيها تقبل ترجع لي ..
وطلع طوالي ..ما انتظر لمن لبنى .. مشت مع البت الدكتور عندها حساسية في عيونها تقريبا ..
اها لمن جات لبنى.. امها كلمتها قالت.. ليها فاروق جا هنا.. وقال قال ..
لبنى قالت ليها ده راجل كذاب وكلب .. عليك الله يا امي ماتصدقيهو..
ده زول اتزوجني لي فترة بتاعة متعة رخيصة وخلاص..
تاني ماعايزني .. واحتمال كبير يكون اتزوج غيري كم واحدة ..بالطريقة دي في السر ..ومافي زول عارفو ..
قالت ليها طيب.. لو ماعايزك مصلحتو شنو يجي تاني..و يقول عايز يرجعك .. موش المفروض يمشي وتاني مايجي ..
قالت ليها ود الشي المحيرني .. انا متأكدة انو الزلو ده ماعايزني..
بعدين قصة البيت دي ماتصددقيها .. ده راجل منافق ..
بعدين انا ذاتي ماعايزة البيت.. وما محتاجين ليهو نحن ساكنين الحمد لله.. وبي حقي وحق بتي ماكلين وشاربين .. يدفع حق بتو ولا كتر خيرو ..
قالت ليها عليك الله يالبنى ..ماتبقي لينا عارض.. مادام ربنا داير يفرجها علينا ماتقيفي في طريق الخير ..
قالت ليها تاااااااااااني يا امي تااااااااااني ..
قالت ليها انا مابجبرك.. لكن مابكون رضيانة ..بتك يالبنى.. بتك من حقها تعيش مع ابوها ..وتسعد بي المال المشتت ليناس ماعندهم فيهو حق ..
وليلى اشتغلت مع لبنى واقنعتها انو الزول ده اتغير وندم على كل كيرة وصغيرة .. طبعا لبنى بقت مترددة بين كلام امها وشخصية فاروق البتعرفها .. قالت ليها كويس يا امي .. خليهو يجي يطلب مني براهو.. بشوف كلامه وان شاء الله لو كان جادي انا بقبل بالرجوع.. انا اصلا بطني طمت منو.. لكن عشانك انتي.. وعشان رضاك وعشان مرام.. انا ممكن اضحي للمرة التانية ..
اها في اليوم ده انا كنت منتظر دينا.. تجيني في السوق العربي .. بعدالشغل عشان نجي البيت .. اتاخرت علي شديد ..
المهم لمن جات .. كانت متوترة من شنو مابعرفها .. حاولت اسألها من سبب التوتر .. ابت تقول لي .. ودي كانت اول ايام ليها في الشغل .. فترة تدريب تقريبا . .. المهم لي قدام بوريك مالها دينا ..قلت ليها انتي مسخنة وتعبانة.. قبل مانركب المواصلات.. تعالي اكلي ليك حاجة واشربي عصير ونركب ..
مشت معاي .. وساكتة .. بس في الوقت ده اتصلت علي لبنى .. وقالت لي يا جعفر فاروق جاء بي وراي .. واتكلم مع امي.. وقال داير يرجعني .. وانا متردده .. ومرتبكة وماعارفة اعمل شنو..
اهااااا .. انا قمت هجت في لبنى.. وقلت ليها بعد العملو فيك كلو ترجعي ليهو؟ اوعك ترجعي يالبنى ..
والله الزول الشافتو عيني ده .. مابخاف من الله.. والله الزول ده ح يدمرك .. انتي براك قلتي الزول ده بضربك .. وبهينك ترجعي ليهو كيف يعني .. انا طبعا" بتكلم وهائج ودينا تعاين لي ..
واتضايقت من المشهد ده على التوتر العليها .. اول ما خلصت المكالمة قالت لي
يا جعفر انا عايزة اقول ليك حاجة ..
انا مابقدر اواصل معاك .. انا قررت خلاص ..انت مابتنفع معاي ماعايزاك .. انا ياسليمان طبعا راسي ضرب
قلت ليها ليه السبب شنو؟
قالت لي انت عندك شنو مع لبنى؟عشان تحميها ترجع لي راجلها ؟ ياخي الناس بعملو السبعة وذمتها.. عشان يرجعو المراة المطلقة لي زوجها .. انت تمنعها؟؟ .. مافي تفسير للكلام ده .. الا تكون عندك نية في لبنى.. واحسن انا ما اكون عارض ليك .. خليني اشوف حياتي.. وانت شوف حياتك .. انا حاسة اني داخلة غلط ..
بالجد ياجعفر انت مهتمي بي لبنى اكتر مني .. انت ماحاسي بالموضوع ده؟
قلت ليها والله يا دينا والله بس المسألة مسألة اني واقف معاها في محنتها .ما اكتر من كدا .. ماتفهميني غلط .في النهاية بت عمي وفي مقام اختي ..
قالت لي انت لو بقيت زول بتاع ملعبة وكلام فاضي .. انا بقول داير تقضي بي وقت .. لكن الغريبة شكلك جادي .. والله حيرتني ..
اسمع انا ماعندي رغبة في المواصلة .. خلينا نكون اصحاب واخوان
بس .. اما مسألة ارتباط دي خليني منها ..
قلت ليها انتي شكلك متضايقة من حاجة.. لانك من قبيل متوترة .. وهسي منفعلة مالك كدي.. اصبري .. واخدي وقت مع نفسك في التفكير بعدين .. البتقولي عليهو بنفذه ليك .. في النهاية الراي رايك ..
وقامت ولاكملت السندويتش الاشتريتو ليها .. وكباية العصير شربت منها ربع بس .. المهم مشينا .. والشارع كله ساكتة ومقبلة على الشباك .. انا طبعا حسيت بيها متضايقة مني ..
قلت ليها انتي واصلي البيت .. انا نازل بحري ..عندي كم حاجة كدا وبجي ..نزلت وخليتها واصلت .. ومرت يومين هي مارجعت لي وانا مارجعت ليها .. بس بتكلم مع لبنى وبحذر فيها.. من قصة ترجع لي فاروق .. اصلا قلبي ماداير الرجوع ده .. بس المشكلة اني ماعندي ليها خيار تاني ..
المهم في الايام دي.. دينا شبه مقاطعاني .. ولو اتصلت عليها بترد علي باختصار.. وبي طمام بطن غريب ..
التقول دي ما دينا الكانت مجنونة بي .. والله انا عاذرها.. اي زول في مكانها .. ممكن يشك في علاقي بي لبنى.. لكن ربنا يشهد علي انا كنت بقوم بالواجب.. لانه لبنى ماعندها اخو يقيف معاها غيري .. بس دينا ماقدرت تستوعب الحتة دي ..
## لحظة ياسليمان.. انا عطشت ماشي اشرب.. واشوف سفيان كيف واجي .. انت عارف الساعة اتنين وربع صباحا الخرااابل .. والله دي سهرة من امها .. بس ماتكون نعست ..
(جعفر مشى شرب وجاب لي معاهو موية في قارورة موية)
وقال لي الجماعة نايمين .. اها نحن واقفين وين يا سليمان؟؟
ايوااا ..
طبعا انا بمشي دايما الصباح لناس عمي.. واشوفهم دايرين شنو.. واخد التفاصيل من لبنى .. اها بكرية اليوم الكنت مع دينا ..
مشيت لناس عمي .. ولقيت لبنى مصرة ترجع لراجلها وقدر ماحنستها ابت ..
لمن ضغطها شديد .. قالت لي اسمع انا عايزة احكي ليك حاجة بس ما تقول لي دينا ..
دينا اتصلت علي بالليل وقالت لي خلاص يا لبنى جعفر مبروك عليك .. انا في زول من ناس الشغل عايزني وانا قررت اتفصل من جعفر
لانه الزول الفي الشغل ده بكل المقاييس احسن من جعفر .. شكلو ووضعو المادي وزول بي بيتو وكلو ظابط ..
انا كلمت جعفر وح انفصل منه ..
اها ياجعفر انا قلت لي دينا .. يادينا ماتخربي علاقتك مع جعفر بي سببي انا راجعة لي راجلي .. قالت لي انتي كذابة ساي وواحدة ماعندك عهد ولاذمة .. انا بعد تلفونها ده اتصلت على فاروق الساعة 1 صباحا قلت ليهو انا موافقة بالرجوع .. وح يجي يرجعني بكرة
او بعدو ..
انت يا جعفر حصل دينا ماتمشي منك .. لانها خلتك عشان شاكة في علاقتي معاك .. امشي وضح ليها .. ومافقدها دينا زولة ممتازة ..
انا قلت ليها يالبنى.. لكن هي موش قالت ليك اختارت زول غيري ..؟؟
لبنى قالت لي احتمال دينا بتكذب ساي .. انت امش اتأكد ..
قلت ليها انتي هسي ح ترجعي لي فاروق..
بعد العلمو فيك يالبنى ؟
قالت لي انت مالك ومالي.. انا اخترت طريقي خليني في حالي بقول ليك .. انا طبعا مشيت شغلي عادي .. وقلت اصبر شوية على دينا يومين تلاتة وامشي اتكلم معاها .. لانها بتكون زعلانة ولمن تشوف انو
لبنى رجعت لي راجلها راسها بتعدل براهو ..
المهم يازول فاروق جا ..وعمي وابوي عقدو ليهو تاني على لبنى ورجعت لي عصمته ..
والمرة وساقها وداها شقة في شارع الوادي ام درمان .. اخد معاها تلات يوم وجابها راجعة ..
وخلاها في البيت الصغير ده ..
انا اتصلت على دينا.. عشان الاقيها .. واطمنها انو خلاص امورنا ح تظبط .. وانو لبنى خلاص استقرت.. في بيتها وتاني ماعندي حاجة تشغلني عنها ..
لكن للاسف ياسليمان.. لقيت دينا مشت مني بعيد شديد .. وعملت علاقة مع واحد معاها في الشغل.. اسمو عزو .. ولاقيتو وشفتو معاها ..
زول قيافة ورايق ومروق .. وعربية وبيت وفي امان الله والله ..
بقدر مازعلت عليها.. بقدر مافرحت ليها ..انها لقت الانسان البسعدها .. واصلا مازعلت منها .. حددت خطوبتها عديل.. وكسبت زمنها .. مالا ومالي انا.. مفلس وعيني طالعة.. ومشاكلي قدر سبيب راسي ..شي ناس بيتنا وشي مصطفى اخوي.. وشي عمي العيان وشي لبنى ومشاكلها المابتخلص .. وكلو على راسي .. فعلا دينا معاها حق ... يلا ربنا يوفقها ..
لبنى رجعت لزوجها .. لكن شنو ؟ اولا طبعا وقف منها القروش البتجيها في المحكمة.. لانها كانت مطلقة ورجعت.. حكم المحمة كدا بكون اتلغى .. الحاجة التانية .. رفض يسكنهم في البيت الفي شمبات
الكانو ساكينين فيهو اول .. وما اوفى بي عهده .. وكل مرة يماطلهم ..انا يتخيل لي ..
انو رجع ليها مخصوص.. عشان يوقف المرتب الشهري ده .. وده كلام بتبين لي قدام .. شوية شوية كلهم يجيهم بي عذر ..
ولبنى صابرة عليهو .. ويعدي منهم اسبوع مايجي..
ويجي على كيفو ..وانا كل ماأسالها من حاجة.. بتقول لي رفعت امري لله .. شكيتو على الله .. درب السماء سالك ..
حتى ليلى قالت ندمت على انها قبلت بيهو يرجع .. لانها صدقته الجبان ..المهم ياسيدي .. الكارثة الكبيرة كانت وين ..
يوم جاهم في البيت بالليل .. شايل ليهو شنطة فيها قروش .. قال لي لبنى .. خلي لي القروش دي عندك هنا .. قدام امها وابوها ..
القروش كانت 150 مليون.. في شنطة سمسنايت .. بس لبنى ماعارفاهم كم .. شالت الشنطة وختتها في الدولاب .. ونامت وقفلت الباب.. ونامت .. باكر الصباح جاء قال ليها اديني القروش .. فتحت الدولاب مالقت القروش .. وبقت تهضرب زي المجنونة .. القروش كانو هنا؟؟ الشنطة الشنطة .. القروش وين يا امي؟ والله يافاروق ختيتهم هنا امبارح قدامك.. تاني مافتحت الدولاب اصلا .. طوالي فاروق ضرب لناس الشرطة..
و جوهو ناس ناس من المباحث زي التقول .. كانو في اخر الشارع بسرعة شديدة .. وقال ليهم الزولة دي انا ممسكها قروش اتصرفت فيها .. وانا عايز قروشي هسي.. وعايز بلاغ جنائي ..
قالو ليها هل الزول ده مسكك قروش؟ قالت ليهم ايوة قدام امي وابوي .. قالو ليها وين القروش؟؟ قالت ليهم مالقيتها والله .. ختيتها في الدولاب هسي مالقيتها .. قالو ليها اركبي .. خلي البت دي هنا ويلا معانا ..
طوالي ساقوها على القسم ..
الى اللقاء..
الطريق الى السماء الحلقة الأولى
الطريق الى السماء الحلقة الثانية
الطريق الى السماء الحلقة الثالثة
الطريق الى السماء الحلقة الرابعة
الطريق الى السماء الحلقة الخامسة
الطريق الى السماء الحلقة السادسة
الطريق الى السماء الحلقة السابعة
الطريق الى السماء الحلقة الثامنة
الطريق الى السماء الحلقة التاسعة