الطريق الى السماء الحلقة 10

الطريق الى السماء

الحلقة 10

بقلم طارق اللبيب ..

ليلى مراة عمي اتصلت علي .. صوتك مخلوعة وبتبكي .. قالت لي ياجعفر الحقنا ياجعفر الحقنا .. انا طبعا اتخلعت شديد قلت تكوت حصلت حريقة في البيت ولا حاجة ..قلت ليها براحة يا حجة وريني الحاصل .. قالت لي فاروق جاب لي لبنى الشرطة وساقوها القسم عشان قروش ضاعت منها ..

انا سبحان الله طوالي اتذكرت قصة الدهب السرقو منها .. يعني جاب القروش وسرقها ..زول خسيس نسأل الله السلامة ..

انا جيت بسرعة شديدة.. والله قميصي مازررتو كويس .. بس وصلت بيت ناس عمي عشان افهم.. حكت لي الحاصل وانا بس اول ركشة لقتني .. مشيت القسم لقيتو ليك واقف.. وبتكلم مع لبنى ..

والشي الواضح انو عنده معرفة مع العساكر .. بس الله اعلم ..

المهم .. كمل كلامو ومن شافني مشى كدا على الضابط

لقيتها قاعدة برة مادخلوها حراسة ولاشي .. مقعدنها في كنبة ..

جيت قعدت جنبها .. وهي بتبكي وعيونها محمرات .. وحالها يغني عن السؤال ..

قلت ليها الحاصل شنو يالبنى؟؟

قالت لي حاصل حاصل .. وهسي فاروق جابني هنا عشان يكتبني اقرار بالقروش قدام وكيل النيابة ..

وانا كتبت اقرار .. انو القروش في عهدتي .. وارجعها ليهو في مدة شهر.. ومافي مشكلة ياجعفر.. فاروق عايز يبيعني البيت .. قلت ليها دي واضحة زي عين الشمش مادايرليها تفكير ..

خلاص كتبتي الاقرار ومضيتي عليهو ؟ قالت لي نعم ..

.. بس خلاص ياجعفر تاني ح نرجع للايجار والبهدله ..

قلت ليها قولي يالطيف درب السماء سالك .. قالت لي ونعم بالله طريقي ..

الزول ده ادعي عليهو .. قالت لي والله من الصباح بشكي فيهو .. علي الله ..

قلت ليها دعوة المظلوم ليس بينها وبين الله حجاب ..

المهم بعد حكت لي الحاصل.. قلت ليها طيب هسي قاعدة مالك؟ .. قالت لي فاروق قعدني هنا.. وقال لي ماتمشي بجي اوصلك .. انا قعدت اضحك على الزول ده ....

انا بتكلم معاها كدا جا فاروق وقف .. وقال ليها خلاص حبيب قلبك جاك ؟؟ اتصلتي عليهو استنجدتي بيهو؟؟ .. والله انا بقيت شاكي فيك عديل ..

الكلام ده وهي قاعدة فوق الكنبة الفي المركز .. انا قمت قلت ليهو يازول .. حاسب على كلامك.. والله انا بغلط معاك .. قال لي تغلط معاي تسوي شنو يعني؟؟ .. عاينت لي لبنى لقيتها بتبكي ..

قلت ليها يالبنى اهو داك الضابط.. امشي افتحي فيهو بلاغ قذف .. قالت لي ارح ياجعفر اخوي.. انا فتحت بلاغي عند الله ارح ..

سقتها ومشينا ..

في الشارع قلت ليها الزول ده انا حذرتك ماترجعي ليهو.. اها شفتي براك النتيجة .. والله ده زول الكلب احسن منه..

قالت لي خلاص ياجعفر اسكت عليك الله .. انا قلبي ده حاسة بيهو اتقطع قطع قطع ..

والله الشارع كلو تسوي خليتك لي الله يا فاروق .. شكيتك على من هو اقوى مني واقوى منك .. والله فعلا حسيت انو دعواتها دي ماشة زي الصواريخ ..

لمن وصلنا البيت هناك .. لقينا امي وابوي وليلى وعمي كلهم قاعدين متوترين منتظريني.. يشوفو النتيجة لمن جينا انا ولبنى ..

امها جاتها جارية ومسكتها قالت ليها .. ان شاء الله ربنا بنصرك يا لبنى .. لبنى فكت يد امها كدا.. ومشت شالت بتها .. ودخلت غرفتها ..

انا قعدت احكي ليهم عن الحصل بالتفاصيل .. وقلت ليهم الزول ده هدفو اتعرف دايركم تبيعو البيت ويشيل قروشو ..

ليلي قالت لي شكيناهو على الله .. غايتو لعنة الراجل ده انا من الله خلقني ماسمعت بيها ..

عمي عثمان قال لي .. امشي يا جعفر عليك الله كلم السماسرة .. خلهم يشوفو لينا بيعة سريعة للبيت ده .. نحن ماعندنا اعصاب يجي تاني يسوق لبنى ويوديها القسم ..

قلت ليهو حاضر ياعمي عثمان .. وبقيت لافي بعرض في البيت اسبوعين.. الحمد لله البيت اتباع بيعة كويسة .. ومشينا النيابة سلمناهم المبلغ .. واادونا الورقة وانتهينا ..

بباقي القروش اجرو بيت تاااااني.. ورحلو فيهو .. ولبنى اتصلت على فاروق .. قالت ليهو انا عايزاك تعال لينا في البيت..

قال ليها ماجاي وريني في شنو بالتلفون ..

قالت ليهو يافاروق.. انا عايزاك تطلقني .. قال ليها والله ما اطلقك لو طرتي السماء .. ياهو داك القانون امشي اطلقي .. مالي مقصر فيك بشنو.. موش قاعد ارسل مصاريفك ..

فاروق طبعا كل يومين تلاتة يرسل السواق بتاعو.. يجيب ليهم قروش مافايتة لبن البت .. يعني بس عشان يقول بصرف علي بتو ..

المهم رفض انو يطلقها .. ونحن قعدنا معاها قلنا ليها ترفعي عريضة تطلبي الطلاق للضرر .. الزول ده ماعنده ليك حاجة ..

انا ذاتي مستغرب ماسكك لشنو؟ انتي لازم تتحركي يا لبنى ..

قالت لينا انا اتحركت وراجية النتيجة .. قلت ليها اتحركتي وين ؟ قالت ليك درب السماء سالك .. البت دي عندها يقين عجيب ..انو ربنا ح يستجيب ليها طبعا .. وفعلا والله ..الله كريم

الحصل بالنسبة لي دينا خطيبتي .. انو جاها عزو .. وطلبها من اهلها وادوهو .. والشمارات جات لي لبنى .. ولبنى متأثرة شديد .. .. وقالت لي ده كله بي سببي ياجعفر .. اعفي لي عليك الله ..

قلت ليها يابت انتي عبيطة .. دينا زولة مامن قسمتي .. انتي مابتؤمني بالقسمة ..

ومرت الايام ودينا اتزوجت .. ولبنى قاعدة في بيتها زي العزبة لامتزوجة ولامطلقة .. وانا رجعت تاني لي الهم بي بيت ناس عمي .. وجبت ليهم المصاريف خمسة يوم ..

بعد داك لبنى قالت لي تاني ماتجيب لينا اي مصاريف .. انا ماشة اشتغل .. مرام بتمسكها لي امي.. وانا بمشي اشوف لي اي كبة ولامصيبة زمان .. اجيب بيها مصروف البيت.. لانه الايجار هسي باقي ليهو اسبوع وماعندنا ..

وانا ذاتي ماعندي حق الايجار .. وماعارفين نعمل شنو؟

اهااااا بس تاني يوم من الكلام ده.. لبنى اتصلت علي .. وقالت لي تعال ياجعفر انا عايزاك .. مشيت ليها في البيت .. لقيتهم قاعدين هي وامها .. وابوهاااا .. ومتوترين برضو عرفتا في مشكلة ..

قالت لي قالو فاروق حصل ليهو حادث.. وهسي في المستشفى .. ضرب لي اخوه هسي .. قال لي فاروق طالبك تجي المستشفى .. وانا ماعارفة اعمل شنو؟؟؟ امشي ولالا؟

قلت ليها تمشي طوالي.. ده واجب انسي كل الفات .. وخليك بت اصيلة.. ده في النهاية ابو بتك .. وده حادث يعني.. انتي لازم تمشي ارح ياخالتي ليلى .. انا بكلم ابوي يجيب امي ويجو هنا يقعدو مع عمي عثمان لمن نرجع ..

وطلعنا انا ولبنى شايلة بتها.. وليلى ومشينا على المستشفى .. مستشفى خاص .. وسمعته في الواطه مافي داعي نذكر اسمه .. المهم مشينا لقيناهو في الجناح الخاص ..

معاهو اهله .. ومراته اللهي سهام وابوها .. فارق راقد معوق جسمو كلو ..عاين ليها كدا .. وعاين للبت .. وقال ليها يالبنى العفو والسماح.. انا ماباقي لي كتير .. والحصل علي ده كلو عقاب من الله بي سبب اني سمعت كلام الناس ديل.. وظلمتك وانا ماعافي ليهم .. اسمعو دي مراتي ودي بتي ..

لبنى قالت ليهو عافية ليك يافاروق.. بس وريني الحصل ليك شنو؟ الحادث حصل كيف.. يهوده انت كويس بتتكلم قول بسم الله ..

قال ليهو كلمها ياعباس .. عباس ده اخوهو ..

عباس قال ليها كانت معاهو واحدة.. ماشين على سوبا.. وضربهم قلاب.. العربية اتقلبت بيهم البت ماتت.. وفاروق حصل ليهو تلف في الحبل الشوكي.. والدكاترة مامتفائلين ..حتى لو مرق منها.. بنشل شلل كامل .. ربنا يجيب العواقب سليمة ..

فاروق قال ليها انا ناديتك .. عشان اثبت ليك حقك .. واخد منك العفو لو حصل لي اي حاجة ..

ياجماعة دي مراتي على كتاب الله وسنة الرسول.. ودي بتي مرام الاتحرمت منها بي سبب المراة الجنبك دي .. ياريتني لو فضيت الشركة واستقليت بنفسي ..

جاء الدكتور وقال ياجماعة اطلعو برة خلاص .. لبنى دي طلعت برة بكت بكا .. وليلى جات جنبي.. وقالت لي ياجعفر قول ان شاء الله يموت..

والله اول مرة اتمنى زول يموت ..الراجل ده لو مات نحن بنغنى غنا ..

قلت ليها ياحجة استغفري الله العظيم .. ده وقت شماتة .. اعوذ بالله ياخي .. ومشيت من جمبها .. سبحان الله اختلاف بين شخصية لبنى وشخصية امها ..

نحن طبعا لغاية الان ماعارفين البت الماتت دي منو ؟ اتخيل معاي ياسليمان البت الكانت راكبة معاهو وماتت دي منو.. بوريك ليها بعد شوية لحظة جيب البتاعة دي النشرب ..

ريقي نشف عديل .. اححح .. الحمد لله ..

اها يازول نحن ركبنا مشينا البيت ..على اساس نجيهم بكرة ..

ولبنى دي تعاين لبتها وتبكي .. انا قلت ليها استهدي بالله يالبنى.. ان شاء الله ماتحصل ليهو حاجة .. قالت لي والله يا جعفر اتاثرت عليهو بدون ما احس ..

قلت ليها طيب .. انتي وقت بتشيلي وتدعي.. ماعارفة درب السماء سالك؟

قالت ودي اكتر حاجة مأثراني .. انا هسي حاسة اني السبب في الحاصل لي فاروق .. ان شاء الله ربنا يرفعو لي بتو.. حتي لو مشلول.. بس على الاقل يكون حي موجود .. ومرام تحس بوجوده .. ماتكبر يتيمة ..

ليلي تعاين ليها وتلوي في خشمها .. وتتململ دايرة تنضم وخايفة

وانا عارفها دايرة تقول شنو .. ..

راكبين في الامجاد ..وماشين على الحلة .. لمن جينا شاقين الحلة سمعنا صوت بكا .. وبكا حااااار .. ياربي ده منو المات في الحلة ده؟ .. نحن لمن طلعنا ماكان في صوت بكا ..

قلت لي بتاع الامجاد عليك الله خش بالشارع ده ..

دخلنا بالشارع .. لقينا البكا عند ناس سارة .. لبنى اتخلعت قالت سجمي .. ده بيت ناس خالتو منال ام سارة ..

وقفنا الامجاد .. ونزلنا سألت انا .. قالو لي دي سارة اتوفت في حادث

معاها مديرها.. في الشغل وهو هسي تعبان في المستشفى ..

شوف عليك الله الشربكة دي .. عليك الله ياسليمان دي ماقصة تتحكي في الكتب؟ .. خلينا بتاع الامجاد مشى.. ونزلنا عزينا .. والله لبنى دي اليوم داك .. قربت تموت من شدة البكاء على سارة ..

اها في البكا لاقتها دينا .. قالت ليها شايفاك بتبكي عليها بالدمعة السخية.. ياختي لو ماعارفة.. دي كانت عندها علاقة بي راجلك ..

لبنى قالت ليها استغفر الله العظيم يا دينا .. اذكرو محاسن موتاكم ..

دينا قالت ليها يختي حكت لي المرحومة براها .. وقالو كان واعدها بالعرس..

لكن الله ما اراد ترا ..

هسع عليك الله الراجل ده ماشي بيها وين؟ غايتو ربنا يسترنا..

لبنى قالت ليها والله يادينا انتي بقيتي فظيعة.. ياخي على الاقل الكلام ده ماتقوليهو هسي ..

ياخي دي زولة اتوفت .. ومشت لي ربها.. اترحمي عليها .. غايتو انتي انسانة ماعندك ذرة وفاء ولاعشرة.. وكل يوم بثبتي لي انو انتي مابتستحقي جعفر ود عمي ..

وقامت عليها قومة سمعتها ليك كلام زي السم .. وتستاهل المعفنة ..

انا وديت ناس لبنى وامها البيت .. وجيت راجع لحقت الدافنة .. وسارة مشت في طريق السماء ..

وتاني يوم من وفاتها مباشرة اتصل علينا عباس .. وقال البركة فيكم .. فاروق اتوفي الساعة 9 صباحا".. وبرضو مضى في طريق السماء .

ربنا ينجينا من دعوة المظلوم .. لو يعلم المظلوم ماعنده من السلاح.. لما احس بطعم الظلم في قلبه..

دعوة المظلوم ليس بينها وبين الله حجاب .. دعوة المظلوم تفتح لها ابواب السماء.. ويسمع الملائكة لها قعقعة مثل قعقعة الحديد.. حتى تبلغ الى الله .. ويقول الله له لانصرنك ولو بعد حين ..

دعوة المظلوم .. تستجاب ولو من الكافر ..

سبحان العدل الحكيم الخبير ..

مشينا كلنا للعزاء.. ولبنى دي وشها يلعن قفاها .. عيونها مورمات من البكا .. ووشها اغبش وشلاليفها ناشفات.. والله تقول قايمة من القبور..

قمة الحزن الحقيقي .. وليلي مبسوطة تتبسم .. عزينا ورجعنا منهم المساء ..

بعد انتهى العزاء مباشرة .. عباس اخو فاروق اتصل على لبنى.. وقال ليها .. تفضي نفسك .. لانو نحن عايزين نحصر التركة بتاعة فاروق .. وندي الحقوق لاصحابها ..

قالت ليهو انا طبعا في عدة.. ومابقدر اطلع .. بعمل التوكيل لي جعفر وبتابع معاكم .. وفعلا اناكتبت التوكيل عند المحامي.. ومضت لي عليهو وانا بقيت متابع ليها التركة ..

سبحان الله نحن شلنا غالبية قروش فاروق .. لانه مرام عندها نص التركة ده غير حق امها

والله قروش تجيب الدوشة في الراس.. ياخي مليارات مليارات كدا غريبة ..وقعت ليها عماره والبيت الفي شمبات.. وخمسة دكاكين .. وقروش نثرية

وشاحنتين .. وعربية صالون ده.. غير العربية الاتقلبت وكتلت سيدها وحبيبتو.. كلهن حقات لبنى وبتها ..

لبنى قالت لي.. اوعك تكلم امي بالورثة كم.. ولاتعرف عنها اي حاجة .. بس نزل في البنك باسمك .. وانا بوريك تعمل شنو..

المهم يازول انا بلم في القروش.. وببيع في الحاجات وبورد ماعدا عمارة فيها تلات طوابق ..في شارع كبري المنشية .. بيت شمبات ديل خليتهن .. تاني اي حاجة بعتها ..

وشغال في شغلي .. وكل يوم مرة بجيب قروش من البنك.. لي لبنى قدر المصاريف .. بعد انتهت العدة .. لبنى ساقت امها وابوها وتااااني مشو نزلو في بيت شمبات.. الطردوهم منه .. سبحان الله ..

ولبنى استلمت حسابها البنكي ..وعرفتها كل حقوقها صغيرة وكبيرة . وبقت من اغنى الناس .. وانا بقيت في حالي .. وبعيد منهم يومين تلاتة مابشوفهم..والتواصل بينا بقى ضعيف .. عشان مايقولو طمعان في حقها ..

اها يوم من الايام .. ليلى وعمي عثمان.. قالو ليها يالبنى نحن كبرنا وانتي بقيتي براك .. وماعندك راجل يحميك ويحمي بتك .. ونحن خايفين تقعي ليك في راجل طماع وكلب .. رايك شنو في جعفر ابوك ده قال بتكلم معاهو..

قالت ليهم اسمعو هوي.. انا جعفر لو بقى اخر راجل مابعرسه ..

زمان انا لمن كنت عايزاهو.. انتو وقفتو في طريقي.. اقبل بيهو هسي بعد بقيت ام وعزبة ؟؟ مستحيل .. جعفر بستحق بت تكون ملاك نازل من السماء.. موش عزبة تعيسة زي انا .. الكلام ده تاني ماتفتحوهو لي..

ولو انتو عايزين تقيفو مع جعفر.. انا عندي ليهو عروس.. لو شافها بجن بيها ..ومستعدة تقبل بيهو باي وضع ..

وانا معاهدة ربنا.. زواج جعفر اقوم بيهو من الصفر.. كل مصاريفو علي.. بس هو يقبل بيها ..

الى اللقاء..

الطريق الى السماء الحلقة الأولى

الطريق الى السماء الحلقة الثانية

الطريق الى السماء الحلقة الثالثة

الطريق الى السماء الحلقة الرابعة

الطريق الى السماء الحلقة الخامسة

الطريق الى السماء الحلقة السادسة

الطريق الى السماء الحلقة السابعة

الطريق الى السماء الحلقة الثامنة

الطريق الى السماء الحلقة التاسعة