الطريق الى السماء
الحلقة 1
بقلم طارق اللبيب
اهداء لروح أخي وحبيبي صديق الصفحة وصاحب التعليق الاول دوما .. صاحب الحصان الجراي المشهور بين جناة الثمار .. الحبيب
عبده الجراري ..اللهم اغفر له وارحمه.. امين ..
روايتي سميتها الطريق الى السماء .. الرواية عبارة عن قصة ..
على لسان الغالي سليمان الحبيب .. سواق الحافلة قال ..
الساعة كانت عشرة ونص صباحا" . كان الكلام ده تقريبا قبل سنة وانا كنت ماشي المنطقة الصناعية الخرطوم .. بالمناسبة اسمي سليمان عشان تكونو في الصورة ..انا الوقت داك . كنت سايق حافلة ركاب شغالة بحري ام القرى جنوب ..
والحافلة اليوم داك حارقه طارة دبرياش . دي زي جهاز كدا مسؤل من الناقل .. (الكلتش) المهم بقت مابتعشق . .. المفروض اسوقها من بحري للخرطوم المنطقة ..عندي صاحبي مكنيكي اسمو قرشي من الشمالية محسي رطاني .. من اطيب ماخلق الله من البشر ..
انا ما بمشي لمكانيكي الا .. هو رجل قمة في الاخلاق والتعامل .. ومابياكل حق الاسبيرات ومابرفع الاسكور ..
اتصلت عليهو قبل يوم من الكلام ده.. وقت ليهو حاصل حاصل .. قال لي بتقدر توصلا لي في المنطقة بدون كلتشي؟
قلت ليهو اوصل ليك ناظرها .. وما يوصلا الا انا .. وبي المجاسفة المعهودة عندي .. سقتها بدون كلتشي بعشق بالابنص ..
وانا ماشي جاتني لحظة كدا خفت خوفة شديدة .. وحسيت اليوم ده حتحصل لي فيهو مصيبة .. والله زي كأني شامي ريحة الدم ..
لكن الحمد لله وصلت المنطقة .. بلطف من الله ..
لمن وصلت المنطقة ويدي فوق قلبي.. الطريق كله خايف اطق لي زول .. او تضربني شاحنة ولا مصيبة ..
حقيقة مابنصح زول يسوق عربية بدون كلتشي.. او بدون فرملة ..
لانو عندنا في البلد دي هنا ..ممكن اي زول يخش ليك في الشارع غلط ..
والانانية عند السواقين منتشرة . واي زول عايز يمشي قبل التاني .. والشارع عندنا يكاد يكون معدوم من الذوق والادب .. وممكن جدا زول ماشي كداري .. يقطع الشارع بدون مايعاين للعربات المارة ..
يعني مجاسفة.. كونك تسوق عربية ماجاهزة .. هو ياخي لو عربيتك جاهزة ذاتو ربنا يستر عليك .
المهم ياجماعة .. وصلت للمنطقة بي اخر نفس وتوتر الحمد لله عرقان ومسخن ودمي فاير ..
لقيت قرشي المكنيي شغال في عربية . قال لي بس نص ساعة بالكتير ..
قعدت انتظرتو جمب ست شاي كدا طلبت قهوة وقعدت اشرب فيها .. وجنبي واحد بشرب في شاي سادة..
الزول ده وشو مألوف زي الكأني شايفو قبل كدا .. لمن شافني بعاين ليهو قال لي .. الاخبار ؟ قلت ليهو حبابك والله تمام الحمد لله .. قال لي العربية مالا؟
قلت ليهو والله حرقت طارة .. قال لي يالطيف .. ربنا يهون ..
قلت ليهو والله انا زي الشايفك قبل كدا ..
قال لي انت سايق وانا سايق .. بنكون اتلاقينا في الشارع ده .. انت ساكن وين؟
قلت ليهو انا اسمي سليمان .. ساكن في السلمة بحري .. بتعرف السلمه؟..
قال لي خلاص بس.. انا ذاتي ساكن السلمة .. بنكون اتلاقينا في الحلة .. انا اسمي جعفر ..
ساكن جم وين انت؟؟ ..
قلت ليهو في الشارع الفلاني.. المهم اتلقى الزول بيني وبينو خمسة شوارع بس .. الغريبة ليه مابعرفو.. انا اتولدت في السلمة .. المفروض اعرفو ..
قال لي انهم كانو من سكان الثورة .. ورحلو السلمة قريب ..
اتونسنا .. ومشيت اشوف خبر قرشي شنو .. لقيتو بدأ في عربيتي يفك فيها ..
جيت راجع عشان ادفع القهوة .. ست الشاي قالت لي دفع ليك الزول الكان معاك ده .. قت ليها مشى وين هو؟
قالت لي يهوداك مع عربيتو ..عندو عربية كرولا جديدة تقريبا 2011 .. فيها شغلانة ..
مع كهربجي تاني قريب من قرشي ..
المهم لمن شافني .. جاني راجع .. قال لي ان شاء الله شغلانتك خلصت ؟؟
قلت ليهو يادوب بدأ فيها .. انت مالك؟
قال لي في مشكلة في القزاز .. مابرفع . لكن الكهربجي عرف المشكلة وهسي بحل فيها ..
قلت ليهو ياخي انت حمتك خفيفة ..
المهم حصلت بيني وبين الزول ده.. الفة كدا غريبة .. يعني في زول مما تشوفو بتحبو .. وقلبك بنشرح ليهو .. وفي زول مما تشوفو بجيك غمة وبتكرهو بلاسبب .. بس جعفر من الناس البتحبو لله في الله ..
زول مريح .. ووشو مطروح.. وفوق وشو في ابتسامة كدا غير متكلفة ..
وعندو حبة خجل كدا.. مغطى عليها بي ذكاء .. وعيون بريئة ..
وبعرف يختار كلماته بطريقة احترافية .. كلامو ينزل علي قلبك زي المطر على الصايم ..
وانا بتونس معاهو كدا تمنيت الزمن ما يخلص ..
مع اني شلت تلفونو.. وعرفت بيتهم واي حاجة ..
نحن بنتونس كدا وست الشاي خاتة يدها فوق خشمها وتعاين لينا ..
في ولد مكنيكي صغير كدا .. عمر 15 سنة بالكتير.. كان راقد تحت عربية بفك ليهو في حاجة .. كان قدامنا طوالي .. بينا وبينو الشارع ..الشافع قال .. ااااااه ..
الاتنين انا وجعفر قمنا قومة واحدة بي خلعة .. الولد وقعت فوقو حديدة في راسو .. شقت ليهو جبهتو من الناحية اليمين ..
والدم ده كبا منو زي الماسورة ..
قمنا جرينا عليهو ومرقناهو من تحت العربية ..المكانيكية جو اتلملمو .. وهو اظنو زي تلميذ شغال مع مكنيكي كبير .. المعلم بتاعو جا .. وقعد يكورك فيهو انت ياود اهبل ؟ انت اعمى مابتشوف ؟؟
والشافع قرب يدوخ يفتح في عيونو بالجلالة ..
في واحد مشى جاب موية .. بقى يغسل في الدم والدم كابي.. قام المعلم قال .. جيبو صعوط ..
وانا هنا ساكت ساي مالي ومال المشاكل ..
جعفر اتدخل قال ليهو يا معلم .. والله الصعوط بضرو ساي .. والدم ده مابقيف .. والولد ده اتضرب في شريان شكله .. خلينا النوديهو المستشفى .. قال ليهو انت الدخلك شنو؟ بتعرفو؟
قال ليهو ياخي خليك عندك اسلوب ..انا عايز اساعد .. قال ليهو اسمع .. نحن مافاضين لي مستشفى وجرجرة دكاترة .. وماعندنا ليهو طريقة دمو ده هسي بقيف ..
جعفر قال ليهو انا عندي عربية بوديهو هسي ..
قال ليهو وديهو بس انا ما مسؤول من البحصل .. قال ليهو ان شاء الله مايحصل الا الخير .. انا طبعا استغربت من التحشر بتاع الزول ده ..وبرودتو في ردة الفعل .. ياخي مالك ومالو؟ ..
قام جري وانا وراهو .. داير اشوفو عايز يعمل شنو؟
مشى قال للكهربجي وقف وقف .. انا جاني مشوار ضروري.. بمشي وبجيك يا الليلة يا بكرة ..
قال ليهو ياخي انا قربت اخلص ..
قال ليهو لالا ماتخلص.. زح لي .. زح لي ..
ودور عربيتو وبي سرعة .. وجا وقفها وفتح الباب الورا .. ورفع الولد ودخلو في العربية .. والولد خاتي ليهو قطعة في جبهتو عاصرها بيها ...والقطعة حمراااااااء من الدم .. جعفر قال للمعلم ؟؟ اركب معانا .. المغلم قال ليهو انا مافاضي ..
وديهوبراك .. انت ماعامل فيها نبي الله الخدر ..
انا بقيت واقف بعاين .. هو ركب وعاين لي كدا وقال لي (املاها بركة) ارح معاي .. نوديهو ابراهيم مالك يهدي تكلة ..
انا اترددت شوية كدا .. تاني زي الفي حاجة جرتني اركب معاهو .. جيت طوالي معاهو .. وقلت ليهو دور يا زول املاها بركة ..
وركبنا مشينا طوالي اراهيم مالك الحوادث .. بس نحن الاتنين وتالتنا الولد المضروب .. وانا فعلا مليتها بركة.. وتاني ما اشتغلت بي عربيتي .. البحصل عليها شنو؟ وبعاين للزول ده ..
وكمية اهتمامو .. زي التقول الولد المضروب ده اخوه ود امه وابوهو ..
الولد ذاته مدروخ مامركز .. اها يا زول وصلنا المستشفى.. والدكاترة ماقصرو اسعفو الولد وخيتو ليهوالضربة .. وقالو ليهو ترقد في العنبر لغاية بكرة نشوف .. لانه خايفين من المضاعفات والنزيف الداخلي .. ولو طلعت سليمة .. لازم ترتاح اسبوع على الاقل..
الولد شوية فتح وقال للدكتورة .. انا ماعندي طريقة اقعد دقيقة هنا .. قالت ليهو ياولد دي صحتك ..
قال ليها وراي ناس ماعندهم زول غيري ..
قام جعفر قال ليهو يازول انت اسكت وارتاح.. خلاص يادكتورة مافي مشكله ..
كملي الاجراءات ..
وقبل على الولد قاليهو انت ح ترتاح يازول ..
وانا وسليمان بنشوف ناسك الماعندهم زول غيرك نشوفهم محتاجين لشنو ..لمن انت تبلغ الصحة .. ماعندك مشكلة ماتشيل هم .. اخد راحتك عشان تقدر تواصل مسؤوليتك ..
وانا غايتو بعاين لي جعفر وماعارف الحصل لي شنو؟ اول مرة احس اني داير ابكي
.. والله قلت مادام البلد دي فيها ناس زي جعفر ده..
ما بتجيها عوجة تب ..
الزول ده اصغر مني واضح .. يمكن بي تلاتة اربعة سنة .. واثر النعمة ظاهر فوق وشو .. وانا الشقاوه والشمش قالبات لوني .. والله جلدي عامل زي الصنفرة الدعكو بيها جير وجبض في مطرة ..
بعد وصلنا الولد للعنبر .. جعفر قال ليهو اديني رقم ناس البيت عشان اديهم خبر .. الولد سكت مسافة وقبل على الحيطة كدا وقال ليهو امي ماعندها تلفون..
الا تضرب ليها عند الجيران يكلموها ..
ولمن قبل علينا شفنا ليك الولد عيونو مليانات بالدموع.. زي الداير يبكي ..
نحن ماشفنا عليهو جراسة.. لامن الضربة لامن الخياطة.. اتجرس لمن جاب سيرة امه ..
الساعة ماشة على تلاتة .. وانا مابقدر انتظر اكتر من كدا لازم امشي اشوف المكنيكي عمل شنو..
العربية ماحقتي وانا زول سواق ساي .. جعفر ده سيد حق والعربية حقتو .. وشكلو وقتو في يدو ..
انا لازم امشي بعد كدي ..
قلت لي جعفر انا عايز امشي اشوف العربية .. انت ح تقعد معاهو لا بتمشي؟ ..
قال لي لالا مابقدر افوتو الا يجو اهله .. امشي انت ..اوصلك المنطقة ؟..
قلت لليهو لالا . المنطقة يهدي المنطقة دقيقتين .. قال لي يازول بعد اطمنت على الولد ...انت امشي شوف عربيتك ونتلاقى ان شاء الله ..
غايتو المهم انا ركبت من محلي داك.. ومشيت على المنظقة.. ولقيت العربية لسه ماخلصت .. والوكت كلو مخي مشغول بالبشر الاسمو جعفر ده ..
المكانيكي قال لي اها عملتو شنو للولد ؟
قلت ليهو والله انا ماعملت حاجة .. كل شي قام بيهو الزول بتاع العربية الركبو معاهو ده ..
قال لي هو بعرفو؟ قلت ليهو والله مابعرفو ولاشي.. اول مرة يشوفو لمن اتضرب .. لكن والله ياقرشي الزول ده .. بالله التقول اخوهو ود امو وابوهو .. يعني واقف معاهو بي مشاعرو قبل قروشو ..
قرشي قال لي والله نحن ذاتو استغربنا.. الزول ساق عربيتو قبل ماتتصلح .. لكن اقول ليك حاجة.. ده من قدرة ربنا..
ياخي الولد ده مسكين وماعنده وجيع .. والزول الاهبل ده بعاملو معاملة زفتة (بقصد المعلم بتاع الولد)
بس ربنا مع المسكين .. انت عارف الولد ده.. كان ممكن ينزف دم هنا لمن يموت.. زول بجيب ليهو خبر مافي ..
قلت ليهو صح.. انا ذاتي لاحظت كدا.. قالو دايرين يكبو ليهو صعوط في الجرح ..
الوكت اتاخر والعربية لسع ماخلصت .. وانا زهجت .. قرشي قال لي الا تمشي وتجي بكرة.. من الصباح بخلصها ليك .. طلعت من المنطقة قريب المغرب .. قلت امشى للناس ديل في المستشفى اشوف الحاصل شنو؟
الى اللقاء
الطريق الى السماء الحلقة الأولى
الطريق الى السماء الحلقة الثانية
الطريق الى السماء الحلقة الثالثة
الطريق الى السماء الحلقة الرابعة
الطريق الى السماء الحلقة الخامسة
الطريق الى السماء الحلقة السادسة
الطريق الى السماء الحلقة السابعة
الطريق الى السماء الحلقة الثامنة
الطريق الى السماء الحلقة التاسعة