الطريق الى السماء
الحلقة 11 الاخيرة .
بقلم طارق اللبيب
قدر ناس البيت حاولوا يقنعوها بالموضوع ده .. رفضت .. وماعندها اي استعداد تسمع الكلام .. وانا بيني وبينك..
.. بقيت ابعد منها.. لانها بقت خلاص مامحتاجة لي .. قروشها في البنك .. وساكنة بيت زي القصر.. وعندها ايجار بتاع عمارة بجيها شهري .. ماعندها اي مشكلة
اها يوم اتصلت علي.. قالت لي يا جعفر انا عايزاك في خدمة.. ومصلحة ليك ولي .. قلت ليها جدا يالبنى .. اخدمك حفيان بس انتي قولي..
قالت ياجعفر ياخي القروش الفي البنك دي.. ليها قريب السبعة شهور مجمدة.. والدولار ماشي زايد .. بعد شوية قيمتهن بتنتهي.. انا عايزة اشغلهم .. وانا ما بضمن اي زول غيرك انت ..
انا عايزاك تشغل لي القروش ديل اي تجارة .. والربح بالنسبة .. بالنص .. قلت ليها والله مابنفع معاي الكلام ده يالبنى .. اولا انا بخاف من القروش حقة الناس..خصوصا ده مال ايتام .. لو خسرت او ضاعت .. ومابسامح نفسي ادخلكم في خسارة .. تانيا النسبة القلتيها دي مابتنفع معاي.. يعني شغلي الحمد لله احسن من كدا ..
قالت لي يا جعفر ماتبقى زول عنيد .. اولا المشكلتين القلتهن ديل الاتنين محلولات ..
لو حصلت اي خسارة مامشكلة.. القروش قروشي انا وقروش بتي ... وانا وانت واحد.. والبت انت خالها ..
القروش دي لو ما انت انا بلم فيها بي وين ؟ والله كانو اكلوني وقشو خشمهم ..
اما نسبة الارباح بديك تلاتة ارباع الربح .. وبشيل ربع بس كفاي..
المهم القروش ماتفقد قيمتها.. تكون شغالة رايك شنو؟
قلت ليها جدا مافي مشكلة ربنا يعين بس .. قالت لي الكلام ده سري امي ماتعرفه ..
باختصار يازول .. انا مشيت سألت واستفسرت عن افضل واحسن تجارة .. قالو البقالات ومواد البناء ..
فتحت لي تلاتة مجمعات تجارية كبيرة جدا.. ورسلت جابو لي مواد بنا بالحاويات من بره .. والله القروش الفي البنك ديك ماخليت فيها حاجة .. غير ملايين بالعدد بس للضرورات الملحة .. ودورت ليك التجارة دي .. يازول بدون مبالغة في سنة واحدة .. عملت عمايل تحيرك .. اشتريت لي بيت.. واشتريت العربية الهسي شفتها دي .. وعملت صيانة لبيت ناس ابوي ..
ووضعي بقى ممتاز .. ولبنى قروشها بقت مبالغة.. الحمد لله الامور مشت تمام .. يعني الارباح كانت فوق حد التصور ..
المهم يازول .. لبنى فرحانة شديد بي شغلي.. ومبسوطة.. وانا طبعا بوافيها بالتفاصيل.. اول باول.. واي تصرف اتصرفه .. هي بتكون في الصورة .. والله انا شغال وخايف.. لانو القروش ماحقة لبنى براها .. القروش اغلبيتها حقة مرام .. عشان كدا انا شغال بي حذر .. ومابفرط في اي تعريفة .. حق الايتام ده اخطر حاجة .. والله ده يضيعك الضحى الاعلى ..
الحمد لله اشتغلت شغل كويس والله.. وربنا من فضلو وقفني في الموضوع ..
اها يازووول الرجة كترت مع لبنى .. من امها وابوها .. ونحن لايمكن نشوفك كدا.. وما نتكلم معاك.. انتي تاني مامحتاجة لي حاجة .. بس راجل .. ونحن شايفين جعفر ده اقرب زول ليك .. وما شايفة كيف راغب فيك؟؟ .. قالت ليهم جعفر اصلا كدا .. وبقيف معاي من زمان .. وماعندو فرق في انه عايزني ولالا .. المهم بت عمو وفي مقام اختو ..
ليلى قالت ليها احتمال هو عايزك وخجلان.. ماعايز يقول ..
قالت ليها لالا ماعايزني.. لو عايزني كان لمح لي بالكلام ..
قالت ليها خلاص اتزوجي اي زول عايزاهو.. يكون اخلاقو كويسة .. قالت ليها مافي.. الزمن ده مافي .. اي زول يتكلم معاي.. بحس الطمع في عيونه ..
قالت ليها خلاص.. اتزوجي واحد بي قروشو.. وعينه ملانة؟ قالت ليها كرهتي في الرجال الغنيانين .. وفاروق طمم بطني من رجال القروش ..
قالت ليها اها طيب حلك شنو يالبنى؟؟ دايرة تقعدي كدا ؟
قالت ليها الامور عند الله .. هو البدبر لي اموري. خلي الامور لله يا امي ..
ابوي وامي طبعا عارفين انا شغال شراكة مع لبنى.. راس المال منها والادارة والعمل علي انا ..
قامت امي قالت لي .. انت يا جعفر حدك وين؟.. قلت ليها في شنو مثلا؟.. قالت لي ماعايز تتزوج؟؟؟ انا وابوك بنتكلم الليل كله في موضوعك.. انت بقيت مشغول وناسي نفسك .. ماشاء الله سويت لك بيت .. وعملت ليك عربية .. تاني راجي شنو؟
قلت ليها يا امي مالاقي بت الحلال .. قالت لي والله انا مابتمنى ليك غير لبنى .. عارفة الناس ح يتكلمو.. ويقولو الولد الصبي عرس العزبة .. لكن الناس يطيروا .. لانه لبنى زيها مافي ..
قلت ليها يا امي .. انا ذاتي شايف لبنى زيها مافي .. لكن هسي لو مشينا اتقدمنا ليهم.. بقولو طمعانين في قروش لبنى ...انتي نسيتي زمان ليلى بتقول شنو؟
قالت لي يعني لو ماكدا .. انت ماعندك مانع من لبنى ؟
قلت ليها والله يا امي لبنى دي.. لو بقى عمرها سبعين سنة.. انا مابشوف مراة احسن واجمل منها .. لكن الله غالب ..
بس امي سمعت الكلام مشت كلمت ابوي.. قالت ليهو تصدق جعفر ماعنده اي مانع من لبنى؟؟ بس خايف الناس يقولو طمعان في حقها ..
ابوي قال ليها كدي خلي الكلام ده علي .. مادام وصلت كدي انا بوصلها حدها للمرة التانية ..
ابوي طبعا بقى يمشي لي ناس عمي عثمان بكثرة.. لاني بوصله بالعربية وبجي اخر اليوم غاشيهو ..
اها اليوم داك.. بعد ركب معاي قال لي انا الليلة داير اطلب ليك لبنى .. قلت ليهو لالا يا ابوي الله يخليك .. قال لي مالك يازول؟
قلت ليهو انت ماعارف ليلى وافكارها .. خلينا بعيدين احسن .. انا هسي بشتغل بي عرق جبيني.. ماشاحدهم شي .. لو جبنا ليهم سيرة عرس راسهم بمشي بعيد ..
قال لي انت اصبر.. مالك انت بس .. خليني اتصرف ماواثق فيني .. قلت واثق في منو غيرك يا ابوي؟؟ .. طيب اتصرف ..
ابوي مشى اتكلم مع عثمان .. قال ليهو جابني جعفربالعربية .. وكان مستعجل ابا يدخل.. قال بجي غاشي من هناك ..
والله ياعثمان جعفر رافض العرس كلو كلو ..
عمي عثمان قال ليهو ليه مالو ؟ قال ليهو قال ماقادر ينسى لبنى .؟
عمي قال ليهو الغريبة لبنى برضها ماعايزة تتزوج .. ومالو مايجي يطلبها هسي.. الفات شنو؟ لبنى يهدي قاعدة ..
قال ليهو انت نسيت كلام مرتك الزمان؟ قالت نحن طمعانين فيكم ..
عمي ضحك.. وقال ليهو ده كان زمان .. ليلى اتأدبت وعرفت الله واحد .. وربنا يسامح فاروق.. وراها ليك النجوم عز الضهر .. وهسي عرفت قيمة جعفر شنو؟ والله ليلى مناها يجي جعفر يطلب يد لبنى ..
بس قول هل جعفر بقبل المراة بي بتها؟ .. مع اني واثق فيهو مابرفض لكن طبعا صعبة .. اهلنا زمان قالو .. (النعال ام قديد ولا المراة ام وليد)..
ابوي قال ليهو ياعثمان اخوي ده كلام جهل ساكت .. ده كلام شنو البتقول فيهو ده؟ .. لبني بالنسبة لي جعفر وليتو .. وعرضو ..
مافرقت فتاة ولاعزبة والبت بتو .. ده كلامي انا .. امشي اسأل ليلى لو موافقة.. انا جعفر موضوعو علي انا ..
طوالي عمي عثمان كورك ياليلى ياليلى .. نادي لبنى دي وتعالو بي جاي .. قالت ليهو حاضر يا الحاج النجهز القهوة .. الكلام ده بعد الفطور تقريبا ..
اها قام عمي عثمان قال ليها ياليلى .. عبدالرحيم اخوي ده قال داير لبنى لي جعفر.. انتي رايك شنو قبل راي لبنى؟
ليلى قالت ليهو والله عاد ياهو ولدنا.. وما دايرين احسن منه .. ولبنى لو قالت غير كدي .. تبقى مطرطشة وماعندها راس.. هو منو يا يمة المتل جعفر؟؟ شايلها فوق يدينو .. وحارسها حاميها من كل خطر.. ابوي قال ليها من بعد الله ياحاجة .. خليك زولة موحدة ..
قالت ليهو صدقت يا الحاج ..
لبنى قالت ليهو ياعمي.. لكن ده رايك ولاراي جعفر ؟ قال ليها ده راي جعفر ؟ امها قالت ليها اها انتي رايك شنو؟
قالت ليها والله طبعا يا امي ..البتقولوهو انتو..انا معاكم .. انا من زمان قاعدة اخالف ليكم كلام؟؟ .. قلتو لي خلي جعفر خيلتو.. قلتو لي عرسي فاروق عرستو.. طلقني ..قلتو لي ارجعي ليهو.. رجعت ليهو ..
ابوي قال ليها يالبنى .. انا عارف كل القالو ليك زمان ضد ارادتك .. هسي جعفر ده بارادتك دايراهو ولاالاا؟؟ .. قالت ليهو مافي راجل مالي عيني في الدنيا دي غير جعفر ياعمي .. وانا اسفة اتجرأت وقلت كدا انت في مقام ابوي برضو ..
مادام جعفر طلبني انا مابردو .. وربنا يسوي الفيها خير ..
ابوي قال ليها خلاص الاسبوع الجاي.. نحن بنجيكم بي مالنا وشيلتنا .. قالت ليهو بس لحظة ياعمي .. دقيقة يا امي عايزاك ..
ساقت امها بي غادي.. قالت ليها قبل كدا انا قلت ليكم.. زواج جعفر علي انا ... كلمي عمي .. قولي لي المال واصل .. مايجيب حاجة .. انا بجهز زواجي براي .. قالت ليها ده شنو يالبنى ؟ قالت ليها يا امي بس قولي ليهو زي ماقلت ليك ..
مشت ليلى قالت لي ابوي .. كيت كيت ..
ابوي قال ليها على الطلاق كدا مايتم زواج .. يعني دايرين تعرسو جعفر بقروشكم .. يا اما نجيب مالنا والتزاماتنا.. يامافي عرس ..
عمي قال ليهو ماتسمع كلام النسوان.. امشي جيب مالك وانا راجيك .. تاني والله ليلى وبتها ديل الاتنين.. اديهن على راسن بس امشي ياعبدالرحيم اخوي.. مبروك سيبك من الكلام الفارغ بتاعن ده ..
ابوي قعد يضحك.. وقال ليهو والله .. لكن سويت لك رويشات بعد جلست ههههه .. ما اقوم اطلع بي جاي.. ويظعطوهن ليك بيجاي ..
اهااا الاسبوع الجاي جينا.. وجبنا مالنا.. وعملت لي لبنى عرس كان حدث .. موش زي عرسها الكتامي داك ..
والحمد لله ربنا تم لي مرادي .. وتم ليها مرادها ..وعايشين في سعادة ماتتخيلها .. ومرام مالية علينا حياتنا.. بالروعة والفرحة .. طبعا لغاية هسي انا ماجبت منها جنى .. وما مستعجل للحكاية دي .. لانه مرام .. ما مخليانا نحس بالوحشة .. هسي تقريبا مرام عمرها اربعة سنة بت زي السكرة ..
والسنة الفاتت عمي عثمان .اتوفى الله يرحمو.. وبعدو بي شهر اتوفى مصطفى اخوي .. وهسي ليلى وامها ساكنين معاي في بيتي .. وبيت شمبات مأجر ..
انا بيتي جيران ناس ابوي .. والحمد لله عايشين في امن وامان..
وقبيل لمن شفتني بتكلم بالتلفون ده.. اتكلمت مع لبنى قلت ليها انا بايت بره..
خلي بالك من مرام وامك.. وقفلو البيت كويس .. وحكييت ليها سبب المبيت .. قالت لي ربنا يوفقك ويقدرك دايما على عمل الخير ..
انا يا سليمان ربنا اكرمني بي لبنى .. عشان كدا ماممكن القى لي زول في خطر وفي درك اسيبو .. وهسي القصة الحكيتها ليك دي قصة حياتي .. عليك الله رايك شنو؟ ياسليمان؟؟؟
لاااااااااااااااله الا الله .. اها ياجماعة معاكم سليمان .
وكدا جعفر الحبيب خلص من قصته الطريق الى السماء قلت ليهو والله قصة عجيبة وغريبة يابوالجعافر ..
بس القصة دي قوت يقيني بالدعاء .. واللجوء الى الله في كل صغيرة وكبيرة .. وخاصة في لحظة الظلم .. سبحان الله يا جعفر انت زول نادر .. وزوجتك مراة صالحة .. ربنا يحفظكم ...وهسي الساعة ياجماعة ماشة على اربعة ..
جعفرقال لي لو نمنا مابنصحى للصبح.. خلينا نتونس ساي كدا ونصلي والنوم ملحوق ..
قلت ليهو هو في نوم تاني؟؟ بعد قصتك دي والله الا انا اقعد افكر فيها اظن يومين مايجيني نوم .. ياسبحان الله ..
اتونسنا لغاية الصبح.. ومشينا صلينا وشربنا شاي وجينا .. لقينا الولد وامه صحو.. وبتونسوا وسفيان الحمد لله اصبح كويس ..
وقالو ليهم الساعة 11 الدكتور بجي يخرجكم .. جعفر قال ليهم نحن بنمشي المنطقة ونجيكم قبل 11 ..
قلت ليهو يازول ماماشين ..انا بضرب لي قرشي.. واشوفو.. خلينا معاهم .. لمن يخرجوهم .. وجا الدكتور وخرجهم الحمد لله.. ومشينا كلنا بعربية جعفر امدرمان ..وصلناهم البيت .. ولقينا بيتهم كويس .. يعني فيهو غرفتين داخليات.. وغرفة على الشارع .. عاملنها زي مخزن كدا ..
جعفر قال ليها اسمعي يا ام سفيان .. انا عايز اجي افتح ليكم الغرفة على الشارع .. واعمل ليكم فيها رفوف .. ونفتحها دكان.. الشارع ده مافيهو دكان ..
وانا بملاها ليكم بضاعة .. انا عندي دكان اجمالي.. وتبعوا وتجيبو لي القروش . رايك شنو؟؟
علي الاقل .. تلقي ليك مصدر رزق تعيشي اولادك بي كرامة .. والولد ده يمشي ويواصل دراسته ..
قالت لي والله طبعا لو عملت كدا .. تكون انقذتنا من الضياع ..
قال ليها جدا.. انا بكرة بجيب لبنى وبنجيكم زيارة .. وختا ليهم مصاريف وطلعنا .. قلت ليهو يازول.. هسي انت بتضمن وين قروشك ترجع ليك .. قال لي انا ما طالب منهم قروش .. حتي لو ماجابو يعني شنو اخت ليهم بضاعة بي ست سبع مليون؟؟
تبقى لينا ذخر في الاخرة .. وربنا يكف بيها شر المحن والعوارض ..
وجينا راجعين على المنطقة.. وهو مشى على شغلته وانا مشيت على عربتي .. دي قصة معرفتي بي جعفر.. اخوي وصديقي من الوقت داك لغاية الان .. ما اتفارقنا ..
وجعفر غير في شخصيتي مية وتمانين درجة.. الله يحفظو ويحفظكم جميعا .. ويبارك في ايامكم ..
دقيقة ما انسى ناس سفيان ابوهم جاء ومسك الدكان براهو ههه
خلاص كدا انتهينا في امان الله ..
وكتبها طارق اللبيب
بحري ..نوفمبر 2017
الطريق الى السماء الحلقة الأولى
الطريق الى السماء الحلقة الثانية
الطريق الى السماء الحلقة الثالثة
الطريق الى السماء الحلقة الرابعة
الطريق الى السماء الحلقة الخامسة
الطريق الى السماء الحلقة السادسة
الطريق الى السماء الحلقة السابعة
الطريق الى السماء الحلقة الثامنة
الطريق الى السماء الحلقة التاسعة