الطريق الى السماء الحلقة 7

الطريق الى السماء

الحلقة 7

بقلم طارق اللبيب .

قلت ليها يادينا .. في النهاية نقول ده القدر والقسمة.. ومافي زول بشيل قسمة غير قسمته ..

بعدين الارزاق بيد الله.. مافي داعي الزول يتسلق للمصلحة.. على حساب ضرر الاخرين ..

قالت لي والله يا جعفر .. انا لمن سارة قالت لي ادي الكرت لي ليلى.. ماكنت عارفة انها ح تجبر بتها تزوج الزول بالضغط .. كنت مفتكرة سارة جاية عشان تقنع لبنى تقبل بيهو ..

غايتو انا صدقت تماما.. انو دينا ماعندها ذنب ..تمام؟

قالت لي انت اخبارك شنو؟ ومالك مدبرس كدا؟؟

انا قبيل شفتك وشك ده .. مسود من الهم ..

قلت ليها ابدا مافي هم ولاشي .. ده من الشقاوة والشغل.. انتي عارفة انا شغلي عمل يدوي ومرهق .. قالت لي اها ماعندك نية عرس ؟

قلت ليها.. زول ترفضو بت عمه.. تاني البتقبل بيهو منو ؟ قالت لي انا بقبل بيك.. وضحكت .. قلت ليها ده ماوكت هظار ..

قالت لي انا والله ما بهظر.. انا جادة وانا مازي لبنى .. لبنى..بترضخ لي كلام امها .. نحن بيتنا ديمقراطي .. اي زول يختار حياتو لاماما ولا بابا مابسيطرو فينا .. وبنعرف اثبت حقي .. لبنى شخصيتها ضعيفة..

قلت ليها حاسبي انا مابرضى كلام في لبنى .. لبنى شخصيتها ماضعيفة .. لبنى انسانة بارة بامها وابوها .. وضحت بي سعادتها عشان رضاهم .. وخوفها على امها هو الخلاها تتنازل عن رفضها .. فهمتي ولالا؟

قالت لي خلاص فهمت .. وشكلها اتضايقت من كلامي عن لبنى ..

انا عندي طبعة يا سليمان .. اي زول يتكلم عن زول غائب بحاول ادافع عنه.. ما بشارك في الغيبة ..

حتى لو الزول البتكلم مارضى مني .. ما بسكت.

اها طوالي دينا غيرت الموضوع .. وبقت تحكي لي عن نفسها .. وانا بحب شنو كدا.. ومابحب شنو.. وطبايعي شنو وشنو..

وانا بسمع ..لمن زهجت منها ..

قلت ليها معليش يادينا .. انا بكرة وراي شغل الصباح بدري.. مضطر اقفل .. قالت لي خير مامشكلة.. تصبح على خير

قفلت وبقيت افكر في البت دي ..

بي صراحة المكالمة دي .. غيرت فيني حاجات.. بس ماكتير ..

باكر الصباح رسلت لي رسالة.. قالت لي صباح الخير يا سيد الناس ..

رديت ليها قلت ليها صباح النور عليك يادينا ..

رسلت تاني قالت لي.. (دينا حافة كدا) ؟؟

تاني مارسلت ليها.. وطلعت على الشغل ..النهار برضو رسلت لي رسالة .. والعصر والمساء .. وبقت رسايلها متتالية ..

وبالليل بتتصل علي دايما .. مرة ارد عليها ومرة ما ارد .. لكن سبحان الله .. لي شي يعلمه الله ..

فجأة وبدون مقدمات .. لقيت نفسي متجاوب معاها .. درجة درجة .. وبقينا نتلاقى .. ونبتت المشاعر ..والاحترامات المتبادلة ..

وعلاقتنا مشت كويس ..

كلها شهر.. وبقيت انا البتصل عليها وبسأل منها .. وظهرت لي شخصيتها الجميلة .. وطباعها حلوة والله ..

اهم حاجة عندها .. بالها طويل .. ومابتزعل بسرعة .. ولو زعلت بترجع سريع .. بالاختصار كدا قلبها طيب شديد .. ودي الشخصية البتنفع معاي ..

والكلام ده طبعا ظهر لي مع مرور الوقت .. وبي مواقف مختلفة ..

اها امن علاقاتنا اتوطت شديد .. دينا اتصلت كلمت لبنى ..

وحكت ليها عن علاقتنا .. ولبنى فرحت جدا ..واتصلت علي .. قالت لي انا فرحانة ليك ياجعفر .. الحمد لله انك اخيرا لقيت الانسانة الاحسن مني .. وانا والله ياجعفر كنت هامة بيك.. وبي حالتك اكتر من الحاصل علي ..

اها بعد كدا ممكن اتصل عليك عادي صح؟

قلت ليها برضو اتصالك عند الضرورة .. عشان ماتحصل ليك مشكلة مع زوجك ..

قالت لي انا عندي خبر حلو وحيفرحك ..انا حامل ياجعفر.. قلت ليها مبروك .. ربنا يتم ليك علي خير.. ويحلك بالسلامة .. قالت لي بس والله برضو ماسعيدة بي كل ده ..

قلت ليها معليش تتعودي ..

وحكت لي عن تعامل زوجها معاها .. وانها بعد اول شهر من حياتها بقى يعاملها معاملة سيئة .. وينبذ ليها امها .. ويقول ليها امك الطماعة المادية ..

ومرة قال ليها انتو قبلتو بي.. عشان قروشي ماعشان شخصيتي .. وقال ليها انتي مابتحبيني .. ولاعندك لي حاجة .. المهم بقى يرمي ليها الكلام ويأذيها شديد ..

طبعا هي وامها وابوها خلاص سكنو في شمبات.. وابوها باع البيت الفي السلمة

وبقو ساكنين في البيت السمح داك ..

اناعلاقتي مع لينا استمرت كويسة شديد جدا ..

شهور في شهور ..وبقيت بعيد شعوريا من لبنى ..

وقدرت اتجاوزت المحنة دي .. بي سبب علاقتي بي دينا ..

قمت عرضت علي دينا الزواج.. وماكان عندها مانع ابدا .. وفرحت فرح قالت يومين مانامت .. وكلمت اهلها ..

واهلها وافقو.. وفعلا قالو ليها دي حياتك.. وانتي مخيرة فيها .. دينا اتخرجت من بنوك ومصارف.. وبتعمل في الخدمة تقريبا في الوقت ده .

المهم انا عزمت امري عليها وبقيت بجمع في اطرافي .. وكلمت ابوي وامي .. بي نيتي اني عايز دينا ..

وماكان عندهم مانع برضو ..

لبنى ولدت وجابت ليها بت .. واتصلت حمدت ليها الله على السلامة

وباركت ليها البت ..

قالت لي يا جعفر انا محتاجة ليك شديد .. انا ح اتصل عليك قريب .. انت موش قلت لي لو عندك اي مشكلة انا اخوك ..

بعدين بالليل انا بتصل عليك ..

انا حسيت بيها متأزمة شديد .. ويادوبك والدة ليها تلاتة اسابيع ..

بالليل اتصلت علي وقالت لي ..

طبعا ماشفت الحصل علينا ياجعفر .. قلت ليها خير في شنو؟..

قالت لي انت عارف انو ابوي داخل في حالة اشبه بالجنون ..وامي تبكي الليل والنهار .. وانا بقيت على حافة الجنون الحمد لله ..

الحصل ياجعفر انو اهل فاروق اكتشفو انو متزوج ..

وعملوا مشاكل مالياها اول ولا اخر .. طبعا فاروق متزوج بت خالو .. اللهو فلان الفلاني المشهور ده وهو عنده نصيب الاسد في الشركة .. وفاروق عنده 30 في المية من الشركة.. بس والباقي حق خالو نسيبو ابو سهام زوجته الاولى ..

وهو في البداية كان شغال معاهو موظف .. بس بعد اتزوج سهام .. خالو عمل ليهو نسبة .. ده كله اناعرفته منه متأخرة ..

وماعارفة لو صادق ولا كذاب .. لانه بصراحة فاروق الكذب عنده اسهل حاجة ..

اها هسي قال لمن عرفو انه اتزوج .. دخلوهو في مشاكل لا ليها اول لا ليها اخر .. وقال لي اشترطوا عليهو يطلقني .. او يطلق سهام .. وقال لي انا مابقدر اطلق سهام .. لانها بت خالي وارتباط اسري وشنو وشنو ..وطبعا طلاق سهام ممكن يأثر عل الشركة و..

فقرر يطلقني ونكون انا وبتي كبش الفداء ..

والله لي اسبوع بحنس فيهو وببكي ليهو..

عشان مرام بتي مايظلمني.. ابا كلو كلو.. وهسي ح يطلقني ياجعفر ..

والمشكلة ماهنا المشكلة انو انا كنت مخدوعة فيهو .. زول حرامي وخسيس وطماع ..

قبل فترة هو كان معانا في البيت.. بعد طلع انا فقدت دهبي .. وماعندي شك انو هو سرق دهبي .. ابيت اكلمه نهائي اقول ليهو فقدت دهبي ..

قام سألني براهو .. قال لي انتي دهبك وين ماشايفو ..بس كدا اتاكدت انو شالو هو .. لانه اصلا مافي زول دخل علي بعد هو طلع مني ..

المهم قلت ليهو دهبي .خاتاهو في حتة وناسياها .. لكن بتلقى ..

شال نفسو وختاهو .. وده كله انا خايفة منه ومن ردة فعلو..

لانو ممكن لو قلت ليهو دهبي اتسرق يضربني عادي ..

طبعا الدهب ماحقو حقي انا اشتريتو بي جزء من سد المال ال200 مليون الكتب لينا بيهن الشيك ..

انا طبعا ياسلام اكتر كلام ازعجني ..كونه بضربها دي ..

قلت ليها يضربك؟ يضربك كيف يعني يالبنى .؟؟..

قالت لي عديل كدا .. اكتر من مرة لمن اتناقش معاهو بضربني .. ويقول لي انا لمن اتكلم معاك ماترفعي صوتك علي ..

المهم ده مامشكلة يا جعفر.. المشكلة انو ح يطلقني عشانها .. والله انا مقهورة قهر شديد ياجعفر ..

قلت ليها اوعك تحنسيهو .. كرامتك فوق كل شي ..

قالت لي بس هو عايشنا .. انا وامي وابوي .. ابوي طبعا كمل قروش البيت وقعد عاطل .. وحتى دكانه الفي السوق المركزي فكاهو ..

وبقى عايش علي مصاريفي البديني ليها فاروق ..

قلت ليها الارزاق بيد الله .. اصلك ماتحنسيهو .. كمان يضربك؟؟

والله حقو الزول يركب يمشي يكسره بي عصاية ويجي .. راجل جبان

.. اها يازول بقيت متابع معاها مشكلة الطلاق دي .. قدر البت مابكت ليهو قلبو ماحن عليها ..

المهم يوم قالت جاهم في البيت.. وقال لي ابوها ياحاج عثمان .. كل شئ قسمة وانا ولبنى اتلمينا بالمعروف .. وح نتفارق بالمعروف .. انا طلقت لبنى ودي ورقتها .. وبنتو الطفلة الصغيرة ما اتلفت يودعها ..

وطلع على كدا .. لبنى دي بكت بكا قلبت البيت دي نواحة.. وامها قربت تجيها نفسيات ..

والبيت ده بقى مسيخ .. الكارثة ماهنا.. الكارثة جاهم بعد يومين من الطلاق.. وسلم ابوها 10 مليون .. وقال ليهو دي تمشو تأجروا بيها بيت ..

تطلعوا لي من البيت ده .. لانه عارف انو البيت الفي السلمة ابوها باعو ..

لبنى قالت ليهو البيت ده موش حقي؟؟ ومسجل بي اسمي ؟

قال ليها لالا ياحبيبتي.. البيت مامسجل باسمك .. قالت ليهو بس انت وعدتني انوالبيت ده حقي .. قال ليها كان حقك وانتي في عصمتي.. لكن بعد الطلاق .. تاني ماعندك عندي حاجة ..

وينها اوراق البيت؟؟ .. البيت بيتي انا.. اتخارجو لي عليك الله ماتكترو معاي الكلام ..

طوالي لبنى اتصلت علي.. وحكت لي المصيبة دي .. وقالت لي شفت ربنا عاقبني كيف؟

قلت ليها مامشكلة .. انا بكرة بجي بشيل منك القروش.. وافتش ليكم بيت بالايجار .. ماتشيلي هم ..

الحمد لله انو ربنا حلاك من الزول ده ..

انا طوالي اتصلت على دينا.. وحكيت ليها الحصل.. وقلت ليها بكرة الصباح تجي تمشي معاي ليهم.. عشان نفتش ليهم بيت ايجار ..

وفعلا لقينا ليهم بيت في السلمة.. بي اتنين الف.. دفعنا مقدم تلاتة شهور.. ورجعت ليهم الاربعة يتصرفو بيها ..

ودينا كانت اصيلة .. ومشت معاي كل المشاوير.. بكل طيب خاطر ..

وانا بقيت بتصل على لبنى صباح ومساء.. وبحاول اخفف عليها .. وبمشي ليهم .. لو محتاجين لاي حاجة بقضاها ليهم .. لانه عمي عثمان بقى عياهو كتير ..

اها لبنى لمن شافتني مهتمي بيها شديد ..

قالت لي .. ياجعفر انا عايزة اقول ليك كلام .. انا ماعايزاك تشفق علي واكتر من اللازم .. وتنسي خطيبتك ..

انا خلاص بقيت اختك.. وتاني ماعندي اي استعداد ارجع ليك .. تاني.. مابرجع ليك لو كنت اخر راجل في الدنيا .. لايمكن اخون اختي .. وصحبتي .. لو عندك اي هدف من تعاملك ده احسن تفهم من بدلاي انا ماعايزاك تاني ..

قلت ليها عارف عارف.. انا ودينا خلاص اتفقنا .. وبنينا مستقبلنا .. وانتي ان شاء الله ربنا مابضيعك ..

مرت الايام.. وفاروق تاني ما اشتغل بيهم .. ولا جاهم ولا رسل ليهم تعريفة .. وباقي المصاريف المعاهم خلصت .. بس ليلى دي ضاقت بيها الدنيا .. وبقت تجري زي المجنونة ..

وعملت صحبة مع الوالدة .. وبقت يوميا تجينا في البيت .. وتقول لي امي انا ندمت الرفضت جعفر ..

انا في الفترة دي ربنا وفقني في الشغل.. ومسكت لي شغل كتير في كافوري وشرق النيل ..

وبقيت بعول البيتين .. بصرف على بيتنا وعلى ناس عمي .. وابوي مبسوط مني بسط شديد .. وقال لي انت ياجعفر زول اصيل .. شوف انت كيف وقفت مع ناس عمك.. بي رغم انهم دمروا سعادتك في يوم من الايام.. واذوك اذية مابعدها اذية ..

احسن حاجة ياولدي الزول .. يقيف حتى مع اعداهو .. لمن الزمن يغدر بيهم ..

ماسمعت داك قال شنو؟ ..

بينك وبين معاديك يا الحبيب الريدة

هو اليعمل ضرر وانت المكارم سيدا

كان يوم الظروف جابتلو حوجة اكيده

انسى العملو فيك وافتحلو صفحة جديده.

اها الحمد لله.. انا القروش جرت في يدي .. وبقيت شغال كويس شديد ..

والله ياسليمان اقتنعت انو الانسان البتكرم .. ربنا بتكرم عليهو .. عن تجربة.. وقدر ماتبقى بخيل.. الفلس يجيك زاحف زحف ..

يوم من الايام اتصلت على لبني ..الكلام دة بعد كملت عدو الطلاق .. وقالت لي انا يا جعفر عايزاك في خدمة .. عايزاك تشوف لي شغل .. اكفي بيهو احتياجتنا ,,

انا بقيت خجلانة من روحي .. وخجلانة منك انت شديد .. وابوي وامي بشوف في عيونهم .. كانهم بقولو لي الحصل علينا ده.. كله سببو انتي ..

قلت ليها انتي فاروق لغاية الان ما رسل ليك شي .. قالت لي ..لا انا ولابتي ..ولاتعريفة .. قلت ليها اصبري والله الزول ده انا الا اخليهو يكرهـ روحو ..

الى اللقاء