الطريق الى السماء
الحلقة 3
بقلم طارق اللبيب
ومن هنا بدأت قصة صاحبي جعفر .. الطريق الى السماء قال لي عارف ياسليمان اخوي انا عشت في بداية حياتي في نعيم الحمد لله ابوي كان شغال مدير مصنع في بحري .. ابوي اسمه عبدالرحيم الفكي اصلا من شرق النيل .. والمصنع قفل مع مشاكل البلد .. وابوي بقى ياكل في سنامه .. كلها كم سنة وبقى على الحديدة الحمد لله .. ومن هتاك بدت معانا المعاناة الوكت داك انا يادوب ماشي على الجامعة .. وابوي عيا فترة طويلة من الزمن .. كان راقد بي قضروف .. والدتي مابتقرب ليهو .. من جنوب النيل الابيض ..
عندي اخو واحد اكبر مني وراجل مسكين شوية .. وعندي اخت واحدة اصغر مني .. وانا اتأخرت من الجامعة بي المكابسة .. ونزلت السوق عشان اشغل عجلة البيت ..
كان عندي عمي الوحيد ساكن في السلمة ونحن كنا في امدرمان
كان عندنا بيت حدادي مدادي .. ابوي اضطر يبع البيت الفي امدرمان وعمي شاف ليهو بيت متواضع هنا في بحري عشان نقدر نتعايش بالفرق الفي السعر ..
المهم جينا رحلنا هنا في السلمة قريب لناس عمي .. يعني فرقنا مربوع ..
عمي راجل وضعه كويس يعني احسن مننا كتير وكان بامكانه يساعد ابوي .. لكن ما حصل مدا لينا يد العون .. بالعكس بقاطعنا بالشهور بدون سبب .. وامي كانت بتقول عمكم كويس لكن مراته بتملا ليهو راسه .. وبتحرشه علينا .. امي مابتحب زوجة عمي دي نهائي .. وما بتحب تجيب سيرتها .. وما بتذكر يوم مشت ليها زيارة في البيت ..الا الواجب البدخل الناس ..
عمي عثمان ده عنده بت واحدة اسمها لبنى .. غيرا تاني لاولد لابت .. ونحن لمن صغار وامي بتجي ليهم عادي .. قبل ابوي يفلس .. وزوجة عمي تحذره مننا .. انا الوكت داك بجي بيت ناس عمي عشان لبنى .. كانت اصغر مني بأربعة خمسة سنة .. وكنا بنلعب مع بعض ..
حتى ناس ابوي بتهاظرو .. بقولو لينا خلاص نعرس ليكم .. انا بقول ليهو موافق عرسو لينا .. وهي تخجل وتجري جوة .. الوكت داك عمرها اقل من عشر سنين ..
اها لمن جيت هنا السلمة وشفت البت ماشاء الله كبرت وبقت انسانة مكتملة بالادب والجمال ..لاني كنت فترة ماشفتهم .. زياراتنا منقطعة فترة وده كلو بي سبب الحساسية البين امي وزوجة عمي ..
انا يازول بقيت بتذكر في ايام زمان .. وكيف كنا بنلعب مع بعض
وكيف ناس ابوي كانو عايزننا لبعض .. صراحة البت عجبتني شديد واسرت قلبي جدا جدا ..واحترمتها قبل اكون بحبها ..واتمنيتها تكون ام اولادي ..
لكن صراحة عارف انو بعيدة مني سابع المستحيلات .. لانه هسي بمرور الزمن النفوس اتغيرت .. وابوي بقى ما بلحيل على اخوه والسبب الحريم .. وامي مابتحب ليلى مراة عمي ..وليلى مابتحب امي ..
وانا مابقول ليك امي كويسة .. امي برضو بتحرش ابوي عليهم وبتقول ليهو .. هم ما دايرننا .. نحن مانتلصق عليهم .. عشان مايحسوا اننا محتاجين ليهم .. لكن الفرق انو ابوي راجل عنده شخصية وكلام امي ماقاعد يأثر فيهو ..
لكن بتأثر فيهو اكتر تصرفات عمي عثمان المنقاد تماما لزوجته ..
وانا طبعا زي ماحكيت ليك بقيت مهووس بالبت وبفكر فيها طول الوقت .. وبمشي بيت ناس عمي من دون علم ابوي وامي .. واتسهل لي كم لقاء كدا مع لبنى .. واتونسنا .. وكانت بتكن لينا مشاعر جميلة ..لي ولي عمها ولي امي كمان .. وبتقول لي انا ماشفت منكم حاجة شينة ..
كانت بت جميلة من برة وطيبة من جوة .. بريئة وصادقة .. وصلاية وبت حلال .. على العكس تمام من امها ..
وانا عايز افاتحها في الموضوع .. ومتردد س يوم يازول جيتهم من الصباح ولقيتها ليك في الصالة وامها جوة في المطبخ .. قلت ليها يالبنى انا عايزك في موضوع مصيري والله ..
قالت لي خير ياجعفر في شنو؟
قلت ليها والله انا عايزك تكوني نصي التاني .. انتي بتعمي واولى الناس بي ..
قالت لي والله ياجعفر انا يكون لي الشرف لكن انت عارف الحاجة مستحيلة مع ناس امي .. انت ماشايف الحاصل ؟
قلت ليها شايف .. وانا واقف في ربنا بس انتي وافقي وخلي الباقي علي انا بلم الباقي ان شاء الله .. قالت لي انا موافقة ياولد .. والله ماعندي مشكلة وانت عارف النو الماديات عمرها ماكانت بالنسبة لي مشكلة ..
قلت ليها خلاص بس انتي ساعديني .. اديني رقمك خلينا نتواصل
وان شاء الله ربنا يساعدنا .. قالت لي والله انا معاك قلبا وقالبا ..
المهم انا فرحتي بموافقتها .. وفرحتي بي رقم التلفون الاتنين قربن يطششن بي .. فرحتين في وقت واحد ..
المهم يازول انا مشيت قلت لامي انتي عارفة يا امي انا عايز اعترف ليك بي حاجة.. قالت لي اعترف قول ..اوع يكون عامل ليك هجيمة
قلت ليها ابدا والله بس احتمال انتي تتضايقي واحتمال تتبسطي ..
قالت لي قول ياجعفر شحتفت روحي ..
قلت ليها انا يا امي طوالي قاعد امشي لناس عمي عثمان ..وكل ما كون فاضي بمشي اقيل معاهم ..
لكن ليلى دي ماعندها معاك اي مشكلة .. انا ماعارف انتي شايلاها معاها كدي ليه؟ امي قالت لي عليك الله؟؟ تكون خدعتك يا المسكين دي مراة بتاعة مقالب انا بعرفها .. قلت ليها لالا انا سمعتها بتتكلم مع بيتها عنك ..
لبنى قالت ليها يا امي خالتو سعاد ليه ماقاعدة تجينا؟
انتي لسه بتكرهيها؟؟ قالت ليها ابدا يا لبنى انا مابكرها وسعاد مالزول البكروها لكن الله يجازي الكان السبب نحن قتنونا الناس .. بس مافي داعي لي نكيت القديم ..
لكن يالبنى انا عايز امشي ليها وخجلانة من مواقفي الزمان معاها ..
امي نططت عيونها .. لانه كلامي كان غريب .. وهو طبعا كله اختلاق وكذب عشان اصلح بينهم ..
قالت لي انت متأكد يا جعفر انك سمعت الكلام ده بالطريقة دي قلت ليها متأكد انتي كدي اسألي لبنة سريا كدا .. قولي ليها امك زعلانة مني مالا؟ انا متأكد ح تحكي ليك لانو الكلام ده حصل امبارح يادوووب ..
قالت لي لالا انا مصدقاك ياجعفر .. ان شاء الله ربنا يصفي النوايا ..
والله ياجعفر هي مرة عمك غير كلامها الشين وقلبها الاسود تاني معندها مشكلة .. هههه طيب ياحجة تاني خليتي ليها شنو .. تتاجر في المخدرات ؟
المهم امي شكلها المراة دي مورياها قعر الحلة من زمااان وماقادرة تنسى ..
لكن الحاجة المهمة .. انا بعتبر اني قديت المنفوخة وقريب ح تنفس ..
المهم يازول نفس الكلام لبنى بقت تغسل في دماغ امها بي طريقتها وانا شغال غسيل في امي .. ومرت الايام يومين تلاتة .. يازول اكان اجي القى ليك امي شايلة التلفون ومكوعة وتتونس مع ليلى مراة عمي .. وانا قعدت بسمع في المكالمة بالله التقول ماكانن متقتاطعات .. امي بعد خلصت المكالمة ..
قالت لي والله ياجعفر الامور بقت تمام.. ان شاء الله تاني مايدخل بينا ود حرام ويخرب البينا ..
قلت ليها يا امي رايك شنو نربط العلاقة دي بي عرسة ؟
قالت لي قول بسم الله عرسة شنو انت ياخوي .. شكلك مربط مع لبنى .. قلت ليها والله الحق يقال ياها بت عمي وقدحي .. واهلنا قالو الراجل بغطى قدحو ولا شنو؟
قالت لي ياخوي ماتحلم.. والله ليلى ما تديك ليها لو نططتا لبنى بالنسبة لي امها كرت رابح مابتديها.. لزول مفلس .. دايرة تكسب من وراها يا الحبيب ..
قلت ليها كدي انتي قولي خير.. وان شاء الله ربنا يهون القواسي ..
قالت لي هسي انت كان سألناك داير تعرس بي قملك .. قرش احمر ماعندك ..
قلت ليها يا امي استهدي بالله.. وربنا كريم بس هسي انا عايز اخطبها ..
واحجزها لنفسي .. ومتأكد بما لايدع مجال للشك.. انو ربنا ح يعني على الزواج ..
انتي بس كلمي ابوي يمشي لي عمي عثمان يطلبها لي .. قالت لي انا العلي بعملو .. ومابخالفك عشان ماتقول امي وفقت لي ..
المهم يازول كلمت ابوي.. وقالت ليهو جعفر قال داير لبنى .. رايك شنو؟ قال ليها ولبنى رايها شنو خليني انا؟
قالت ليهو لبنى موافقة .. قال ليها جدا.. انا والله ده خبر بسعدني وبفرحني .. وافتكر انو عثمان اخوي ما ح يكون عنده مشكلة ..
قالت ليهو المشكلة مافي عثمان.. المشكلة في ليلى .. ليلى ياعبد الرحيم مابتقبل الموضوع ده ..
قال ليها نحن كلنا ليلى تكسر كلامنا يبقى ده موضوع تاني ..
المهم ياسيدي ابوي مشى لي عم عثمان ابوي زي ماحكيت ليك عندو قضروف وبمشي بالعصاية .. مشى يتعكز لغاية ماوصل بيت ناس عمي .. واتكلم معاهو قال ليهو جعفر عايز لبنى يا عثمان .. وانا جيتك مخصوص للموضوع ده رايك شنو؟
قال ليهو والله يا عبدالرحيم ده خبر جميل وانت عارف انو ولدك ولدي .. وانا ولي امره في غيابك .. ماعندي مشكلة .. لكن الراي راي البت وامها .. قال ليهو البت موافقة ..
امها تاني دخلها شنو؟ دي حياة البت وهي مخيرة فيها ..
قال ليهو ياعبدالرحيم مافي بت بتتزوج من غير رضا امها . دي سابع المستحيلات .. وامها عندها حق في بتها .. زي ما انا عندي حق في بتي.. دي برضو ام .. وانت راجل متعلم وفاهم ..
قال ليهو ياعثمان انا اديتك راي .. وانت سيد الفهم .. يهديك مراتك امشي اأسألها ..وشاورها واديني النجيضة .. انا ماشي وابوي جا راجع ..
اها يازول عمي عثمان نادى زوجته ليلة وطرح ليها الموضوع وقال ليها جعفر ود عبدالرحيم اخوي قال عايز لبنى ..
الى اللقاء ...
الطريق الى السماء الحلقة الأولى
الطريق الى السماء الحلقة الثانية
الطريق الى السماء الحلقة الثالثة
الطريق الى السماء الحلقة الرابعة
الطريق الى السماء الحلقة الخامسة
الطريق الى السماء الحلقة السادسة
الطريق الى السماء الحلقة السابعة
الطريق الى السماء الحلقة الثامنة
الطريق الى السماء الحلقة التاسعة