موعد مباراة الهلال و الأهلي في دوري روشن السعودي

 الطريق الى السماء

الحلقة 4 

بقلم طارق اللبيب 

ليلى قالت ليهو سجمي .. جعفر منو البعرس لبنى ... لبنى يا يابا .. ان شاء الله جعفر عرسها مايحضره .. انت ياراجل مابفهم ولا مخك ده راكب غلط .. انت من زمان عارف الناس ديل استغلاليين .. ودايرين ليهم فرصة يدخلو فينا . هسي اليومين دي اسماء مسويالا معاي صحبة . وانا مافهمت هدفها شنو .. اتاريهووو.. خلاص الفلس حرقهم .. قالو نشوف لينا طريقة نعيش بيها ؟..  جعفر عندو شنو عشان يعرس بتي ؟

عمي قال ليها اسمعي .. كلامك ده كلو صاح..  ومنطقي بس انا مابقدر اقول لاخوي..  مابديكم بتي .. بس انتي اقنعي بتك ترفض وانتهينا ..

قالت ليهو وبتي المتخلفة..  اليومين دي شغالة شكر في اسماء وجعفر..  اتاريهو الولد قاعد يجينا لي هدف ؟

انا مابتكلم مع لبنى .. ولا فاضية ليها انا برفض براي..  وخلوني اشيل وش القباحة .. انت اصلك جبان ومابتواجه الحقايق ..

يعني عايز تجدع بتك ؟ مالا يا يابا باريرة ولا هاملة؟ بنديها جعفر الفلسان الجربان؟ ..

قال ليها يازولة خلاص .. ماتكتري الكلام..  رفضتي رفضتي انا ذاتي ما عايز الموضوع بيني وبينك .. بس بقول امها رفضت .. قالت ليهو قول العايز تقوله .. ولو سألوني بقول انا براي ..

كدي خليهم يجو يٍسألوني او يطلبو مني .. 

وطبعا ياسليمان .. مافي زول ح يسألها هي .. الكلام بقى بين ابوي واخوهو.. 

اها ابوي بعد كم يوم سأل عمي عثمان بالتلفون..  قال ليهو

اها ياعثمان الحصل شنو في موضوعنا؟ 

قال ليهو والله لسه .. اديت الجماعة فرصة يفكرو..  ويردوا لي الكلام النهائي بي رواقة ..

ابوي قال ليهو خير .. انا تاني مابتصل عليك البتقبى عليهو اتصل كلمني .. وفات الشهر او قريب من الشهر ..

في الفترة دي انا متواصل مع لبنى..  وعلاقتنا بقت شي ماتتصوره .. وانا بقيت بتسيطر في لبنى .. وبسألها الصباح والمساء عن يومها .. وعن حالها وصحتها .. ولو طلعت بسألها طلعتي وين ؟ واتاخرتي ليه . ومرات بشاكلها .. وهي مبسوطة من الحكاية دي .. لانها فاقداها..  فعلا ابوها مادي ليها الحبل على القارب .. بس هي براها ماشاء الله زولة قلبها واعي ..وربها هاديها ..

اها يازول يوم من الايام  لبنى جوها تلاتة من صاحباتها الجيران في البيت..  قالو ليها نحن ماشين الكبري..  كبري الحلفايا .. نتمشى لو عندك رغبة تطلقي كرعينك .. ونأكل لينا اسكريم .. رايك شنو؟ 

قالت ليهم والله اصلا مدبرسة .. نمشي ارح .. وبتحكي ليهم في الشارع بي كلامي معاها .. في واحدة منهم اسمها دينا .. قالت ليها والله جعفر ود عمك ده يمسك بيك زمن ساي .. ده زول ماجاهز ياهناية ..

قالت ليها لو طول العمر بنتظره .. المهم بتونسوا وماشين .. لمن بقو بعد بداية الكوبري بي 300 متر تقريبا ..

 وقف ليهم بتاع عربية لاندكروز موديل السنة.. 

 وقف قدامهم بي عشرة خمطاشر متر .. لمن وصلو قصادو ..

 نزل القزاز .. وقال يابت عليك الله لو سمحتي ..

 واحده فيهم اسمها سارة  قالت ليهو .. مرحب معانا نحن؟ 

قال ليها ايوة البت اللابسة العباية دي .. لاحظ الحتة بالليل اي الكوبري منور .. لكن الزول صعب يميز الملامح ..

البت اللابسة العباية هي لبنى .. 

سارة قالت ليها بتكلم معاك يالبنى . قالت ليها انا ماماشة ليهو .. امشي ليهو انتي ياسارة .. احتمال عايز يسألك من حاجة .. سارة قالت ليها لو مامشيتي بمشي ليهو..  واشوفو عايز شنو؟ وهو يسمع في النقاش ..سمع كلمة سارة .. قال ليها تعالي انتي  ياسارة خليها لبنى .. 

قالت ليها شكله بعرفنا يا لبنى دقيقة بس .. 

جاتو قالت ليهو نعم .. قال ليها معليش انا بسأل من لبنى دي مخطوبة او مرتبطة؟..  قالت ليهو ابدا لاده ..ودلاه..

 قال ليها طيب .. ممكن اديك الكرت ده تديهو ليها؟ انا البت دي عايزها على كتاب الله وسنة رسوله بالحلال .. لو قبلت تتصل علي .. لو ماقبلت شرطو الكرت وانتهينا .. 

قالت ليهو والله غايتو .دي واحدة راسها قوى .. 

لكن جيبو .. اداها كرت مذهب .. كدا يرقش مع الضوء . الكرت ذاتو يكون بالشي الفلاني .. مكتوب في الكرت .. فاروق فاضل العمدة .. 

ريس مجلس الادارة  لشركة التباين للاستيراد والتصدير. 

البت ماعارفة تتخلع من العربية..  ولامن الزول ولامن الكرت .. 

المهم سارة جابت الكرت وجات.. قال ليها ..

بختك بختك ..الزول قال دايرك يالبنى .. 

وده الكرت قال ليك  اتصلي عليهو.. قالت ليها يابت انتي متخلفة؟ .. في بت يلاقيها واحد من الشارع ويقول دايرها .. ده واحد متخلف ساي .. هي القروش اي حاجة؟ الفهم قسم يايمة .. 

سارة قالت ليها . والله انا لو باقي لي عديل..  اشيل الكرت واربط معاهو براي .. دينا قالت ليها والله ياسارة فلانة دي عبيطة ساي وبس ماسكة في ودعمها الغم ده .. اديني الكرت ده جاي .. 

سارة قالت ليها عايزة بيهو شنو يامجنونة؟ .. دينا قالتليها .. عندي بيهو فهم .. جيبيهو وخلاص دينا شالت الكرت .. مشو يتونسوا عااادي قضو المشوار وجو راجعين .. 

وكل مرة سارة تقول .. اوووب انا من العربية .. والله لمن مديت ايدي اشيل منه الكرت..  يدي نشفت من برودة المكيف .. العربية من جوة عبارة عن قصر ما عربية .. وهو ذاتو يايمة ظاهرة عليهو الراحات وجسمو ده ناااعم ..

نحن يا دينا كرعلينا .. زول ساي بقول عايزنا مافي .. البورة ذاتها بقت خايلة فوقنا ..

لاحظ البنات ديل كلهن خريجات يا سليمان..  يعني مافات ليهن فوت .. لكن البت هاجس العنوسة عندها ببدا بعد التخرج مباشرة.. 

المهم ياسيدي .. الونسة اغلبيها كانت فاروق البخلي الهم يروق .. 

الزول الغني المالي في القروش لامن مدفق .. شكلة كدا عنده اموال لوطلقو فيها نار ماتاكلها .. 

بعد يومين جن سارة ودينا في البيت .. مالقو لبنى . وقابلو ليلى .. قالو ليها وين لبنى ؟..  قالت ليهن نايمة جوة .. لكن هسي بصيها ليكن .. 

قالو ليها لالا ماتصحيها .. عايزين نحكي ليك حاجة ياخالتو ..اول امبارح لمن مشيننا الكوبري..  حصل حصل .. ويحكو ليها ويوصفو ليها في الزول .. لمن سرحت وبقت تتمطق في الريق .. 

قالت ليها الكرت معاك ياسارة؟..  قالت ليها ابدا ياخالتو..  الكرت عند دينا دي..  دينا الكرت جبتيهو معاك؟ .. 

قالت ليها ايوه هوداا..

ليلى خطفت منها الكرت .. وقالت ليها خلاص عريس لبنى اتلقى ..

قالت ليها المشكلة هي مقوبة راسها ياخالتو .. وقالت ماعايزاهو كلو كلو ..

ليلى .قالت الغبيانة قايلاني بقبل ليها بالغجري الاسمو جعفر ده؟؟ .. 

قولي ليها والله لو بقى اخر راجل..  ما يمسك يدها مادام انا حية وعيني فيها الموية .. 

البنات ديل طيرن عينيهن وبقن يعانن للمراة دي .. 

قالو ليها  خلاص نحن ماشين..  عشان لو صحت ولقتنا قلنا ليك كدا مابتريحنا ..

 البنات طلعن .. والمراة انتظرت راجلها بفارق الصبر 

وكت جا قالت ليهو اسمع .. انت كلمت اخوك قلت ليهو نحن رفضنا الولد؟ قال ليها ماكلمتو .. قالت ليهو هسي تشيل التلفون ده وتضرب ليهو.. تقول ليهو البت امها رافضة .. وتحكي ليهو كلامي 

انا بتي مابديها جعفر نهاااائي .. وده اخر كلام عندي .. وماماشة من هنا لو ما كلمتو . وانا سمعتك .. 

الراجل شال التلفون وضرب لابوي .. قال ليهو ياعبدالرحيم اخوي . انا والله كلمت البت..  وكلمت امها البت ماعندها مشكلة..  لكن والله ليلى قالت راسها بالف سيف .. مابتقبل الكلام ده .. والمشكلة كلها ياعبدالرحيم .. في انو جعفر ماجاهز .. قال ليهو جعفر بجهزو انا ياعثمان .. انت عارف انا عندي قطعة..  خاتيها ليهو بعرس ليهو بيها.

قال ليهو اها يسكنها وين بعد يعرس؟

  قال ليهو دي بتي وبتسكن معاي في البيت .. قال ليهو على كل حال المراة دي رافضة وانا ترا كلمتك .. 

طوالي ابوي ناداني ونادى امي وحكى لينا بالحاصل .. وقال لي تاني ماداير اسمعك تجيب سيرة لبنى فوق خشمك ده .. نحن وافقناك في الاول .. مع اننا عارفين بيت عمك حاكماهو ليلى .. وليلى طماعة مابتقبل بيك .. 

ده كلام مفروغ منه.. 

هسي احمد ربك .. انو ربنا نجاك منها .. والله ليلى كانت تستعبدك وتسويك غنماية زي عمك ..

اها يازول انا طلعت مهموم ومغموم..  والله علي حالة تبقى على العدو ..

اصلك مابتتخيل كمية الهم والغم الحسيت بيهو في اللحظة ديك ..

طلعت طوالي اتصلت على لبنى..  لقيتها صوتها متغير وبتبكي . قلت ليها . مالك يابت؟ .زي الكأني ماعارف. 

قالت لي ماشفت الحاصل يا جعفر .. انا عايزة اموت عديل..  والله انا مافاضل لي الا انتحر بي سبب امي ..

امي رفضت الموضوع واتشاكلت مع ابوي .. وقالت لي تاني ماعافية منك لو جبتي لي سيرة جعفر ده .. وابوي اتصل على عمو 

وكلمه وموضوعنا انتهى ياجعفر .. ده الانا كنت خايفة منه .. عمري كله .. انا اعمل شنو ياجعفر؟؟ انا والله حاسة بالدنيا ضايقة في نفسي..  زي خرم الابرة .. 

لاحظ لغاية الان لبنى ماعارفة العملية العملوها صاحباتها .. والام ابت تكلم بتها الا بعد يومين من الكلام ده .. 

ليلى جابت بتها .. وقعدتها قالت ليها..  انتي يوم كنتو ماشين فوق الكوبري الحصل شنو؟..  قالت ليها الحصل شنو يا امي؟ ..

 قالت ليها فاروق .. مالك نسيتيهو؟ قالت ليها فاروق منو؟ قالت ليها سيد العربية الليلى علوي .. قالت ليها الكلمك منو؟ ديل ناس سارة موش كدا ؟ انا والله العظيم مابخليهن المتخلفات .. 

قالت ليها المتخلفة انتي يايمة .. ده راجل برفضوهو .. وعشان منو عشان جعفر الهامل .. عليك الله امشي اتلمي بلا غم,,

اسمعيني هنا انتي لو دايرة رضاي .. تقبلي بالزول ده .. ولو دايرني اغضب عليك مدة ما حية في الدنيا دي .. اعملي حركاتك دي .. 

وفي الوكت ده كانت ليلى مجهزة ليها خطة جهنمية لي لبنى .. قالت ليها وده ماكلامي انا ده كلام ابوك .. ابوك قال الزول ده من اسرة معروفة..  والشركة حقتو دي من الشركات الكبيرة في البلد..  وابوك فرحان بالحكاية دي .. ماتكسري خاطرو وتفقدي رضاي ورضا ابوك بي سبب جعفر .. ونحن اساسا رفضناهو ..

قالت ليها يا امي انا ماعايزة اتزوج .. قالت ليها اسكتي بلا كلام فاضي .. انا هسي ح اتصل على الراجل ده .. يهوده كرتو عندي .. وبقول ليهو نحن قبلانين .. وتعال لينا في البيت نتعرف عليك .. والله يالبنى تظهري ليهو انك مارضيانة.. 

 انا وانتي في البيت ده تاني مانقعد.. والله تفقدي امك .. والله ابلع لي حبوب .. واموت ويقولو لبنى قتلت امها ..

قالت ليها والله مابقبلو .. كيف اقبل لي زول وانا ماعايزاهو؟ .. كدا بظلمه هو اول حاجة .. قبل ما اظلم نفسي ..

ليلى قالت ليها قلتي كدا؟ انتي قايلاني بهظر .. ودخلت جوة وقفلت الباب عليها..  وبقت تفش لي حبوب عشان تبلعها .. 

وهنا لبنى اتجرست وبقت تدق في الباب ..وبتكورك ليها  انتي عايزة تعملي شنو ياامي ؟ ..

 قالت ليها انتي قايلاني بكذب عليك .. والله والله اكان الليلة اموت واريحك مني .. احسن اموت براي من تكتيليني انتي بالمغصة..  

لبنى صدقت واتجرست..  وبقت تبكي وتدق في الباب .. وخلاص اتخيلت انو امها ح تموت بالجد .. قالت ليها..  خلاص خلاص خلاص يا امي بقبل بيهو تعالي طالعة.. 

طوالي ليلى طلعت .. وهي لا كانت عايزة تنتحر ولاشي..  حركات منها ..

قالت ليها مابتغيري رايك يالبنى؟؟ قالت ليها مابغيرو خلاص ده قدري اعمل شنو؟ 

قالت ليها انا هسي بتصل عليهو .. 

الى اللقاء

الطريق الى السماء الحلقة الأولى 

الطريق الى السماء الحلقة الثانية 

الطريق الى السماء الحلقة الثالثة 

الطريق الى السماء الحلقة الرابعة 

الطريق الى السماء الحلقة الخامسة 

الطريق الى السماء الحلقة السادسة 

الطريق الى السماء الحلقة السابعة 

الطريق الى السماء الحلقة الثامنة 

الطريق الى السماء الحلقة التاسعة 

الطريق الى السماء الحلقة العاشرة 

الطريق الى السماء الحلقة الحادية عشر والأخيرة