الطريق الى السماء
الحلقة 8
بقلم طارق اللبيب ..
انا نويت على فاروق .. الظالم الجبان نية اسكت خليها ساي .. عندي صاحبي محامي .. مشيت ليهو في مكتبو في بحري .. زول بعرفو من زمان كان اشتغلت ليهو في بيتو في الحاج يوسف .. اسمو صلاح.. بقولو ليهو صلاح ظلطة .. قعدت معاهو حكيت ليهو القصة من طقطق للسلام عليكم .. قال لي الزول ده دخله ما اقل من مليار في الشهر .. الزول ده انا ح ادفعو ليك لمن راسو يلف .. اسكت ساي بس خلينا نشتغل في السر .. قلت ليهو والله انا بدفع ليك كويس ..
قال لي الزول ده بنعمل ليهو مطالبة بي النفقة بتاعة الطلاق .. وبنعمل ليهو بحاجة اسمها نفقة المتعة ..
ديل اتنين نمرة
. 3بدل السكن لانها البت بتو ..
4بدل علاج ..ليها .. 5اعاشة البت .. والله حق الرضاعة اطلب بيهو اصبر بس ده وقع معاي ..
اها يازول مشيت حكيت لي لبنى الكلام ده وقالت لي خلاص انت اشتغل وانا بكتب ليك توكيل .. بس ماتقول لي امي ولا ابوي .. قلت ليها ليه؟ قالت لي انت مالك انا عارفة بعمل كدا ليه..
قلت ليها جدا زي ما عايزة .. انا بكرة بمشي بكتب توكيل واجيبو ليك تمضي لي .. عليهو والزول ده انا ما بسيبو ..
قالت لي لكن يا جعفر هسي انت ماقادر تحك راسك.. وبيتين اتنين على اكتافك .. بتقدر على جرجرة المحاكم كيف؟.
قلت ليها الله يسهل ان شاء الله .. وفعلا كلامها صح.. انا ماعارف ح اوفق كيف لكن ان شاء الله ربنا بساعدني ..
عندي صاحبي وشغال معاي اسمو مجتبى.. والله وقف معاي وقفة رجال .. لمن عرف القصة .. قال لي بوعدك يومك التكون في المحكمة بشتغل ليك ..
وبدأت رحلة المحاكم .. ونادو الزول في المحكمة ..الجلسة الاولى وادلينا بالاقوال
بس لمن انتهت الجلسة الاولى في المحكمـة ..
بقى عاين لي من فوق لي تحت ..هو ما كان قايل في زول ممكن يجرجرو في المحكمة .. اها قابلني برة.. وقال لي احسن تبعد من طريقي انا بدمرك .. قلت ليهو اعمل العايزو .. ماببعد
انا بعمل في عمل خير .. وعايز ارجع الحقوق لاصحابها ..
انت مابتخاف من الظلم؟؟ ياخي حرام عليك.. خلي عندك احساس .. عاين لي معاينة كدا .. بتاعة افترا وحقد عجيب .. ومشى ..
انا طبعا ما اكضب عليك جاتني خوفة من الزول ده ..
ماعارف الزول ده ممكن يعمل شنو؟ ده زول مابخاف من الله والزول المابخاف من الله .. انت المفروض تخاف منه ..
ماعندو مانع يكذب ويغدر ويقتل ويحلف بالكذب ويعمل السبعة وذمتها ..
وانت لو عايز تعرف الزول المابخاف من الله.. عاين للاعمال الظاهرة .. لمن تلقاهو ظالم ومفتري .. ده تاني لاتصدقه ولاتطمن ليهو ..
المهم انا من اليوم داك بقت تجيني رسايل تهديد .. وبقيت ما بطلع الا اشيل معاي سكينة تحت الملابس ..
مرت الايام وانا منتظر الجلسة التانية.. بتاعة المحكمة .. اتصل علي المحامي صلاح ظلطة .. قال يا جعفر ياخي انا عايزك تعفيني من القضية دي ..
قلت ليهو مالك الحاصل شنو؟المحكمة باقي ليها يومين .. قال لي والله بس مابقدر اقول ليك الحاصل.. بس انا مابقدر اواصل في القضية
دي .. شوف محامي غيري .. قلت ليهو اشوف من وين هسي؟؟ الزمن ضايق .. والمحكمة بعد بكرة ياصلاح ده كلام شنو؟
اتخيل الزول ده صاحبي شديد من زمن .. المهم ابى يمسك القضية وابا يوريني السبب .. وختاني في حتة ضيقة شديد ..
مشيت كلمت لبنى.. وحكيت ليها الحاصل .. وقلت ليها الطرق كلها اتقفلت قدامنا يالبنى ..
قالت لي بس في طريق واحد ما بتقفل .. قلت ليها اللهو شنو؟ قالت لي (طريق السماء) .. الدعوات ..
انا اصلا ماحصل وقفت الدعاء .. وحاسة دعاي كلو ح يصل .. درب السما سالك ياجعفر .. وربنا مابضيع زول ..
انا طبعا عجبتني كلمة درب السماء سالك دي شديد ..
سبحان الله جاتني ارادة اني اقاتل لغاية اخر لحظة .. واصلا ما استسلم ..
اها اضطريت في يومي داك.. مشيت للمحامي الظلطة ده .. وجبت منه الاوراق والمستندات الخاصة بالقضية .. وبالليل ..
مشيت لي محامي في الحلفايا.. اسمه احمد
معرفة برضو.. لكن ماعندي معاهو علاقة زي صلاح ظلطة ..
وحكيت ليهو الحاصل.. من طقطق لغاية هروب صلاح ظلطة ..
قال لي بكون هدده زي ماهددك .. قلت ليهو او بكون اغراهو بالمال ..
قال لي كلو محتمل .. لكن اقول ليك حاجة .. والله الزول ده انا ما ح اسيبو لو قتلني ..
ومسك اوراق القضية.. والمجريات كلها .. محامي شاطر وراجل ود رجال .. ومشينا الجلسة التانية .. والمحامي ده عمل عمايل مع الزول ده .. ومافضل الا مرافعة الدفاع .. وحددو لينا جلسة تاني ..
في الفترة دي المحامي احمد اتصل علي.. وقال لي تتخيل زولك العبيط ده اتصل علي .. وقال لي بديك 15 مليون تقد القضية دي .. قلت ليهو لو اديتني 15 مليار .. مابقيف مع الظلم .. دي حقوق .. وانا درست كلية الحقوق .. قال لي بس بس .. تاني ماتتكلم خلاص انتهينا .. زي الكأنه بهدد فيني .. وانا ماخايف منه ..
فتحت بلاغ بالكلام ده لو حصل لي اي حاجة .. مافي زول بتهموهو غيرو زول غبي ..
بس خلاص انا من هنا عرفت.. صلاح ظلطة .. رفض القضية ليه الجبان شال قروش ومشى .. ياريت كل المحامين زيك يابوحميد ..
علي كل حال .. جلسة الدفاع كانت ميتانة.. والمحامي بتاع فاروق زول فطيسة ساي.. وماقدر يعمل ليهو اي حاجة .. ووعدونا بي جلسة النطق بالحكم ..
في الفترة دي كلها .. انا بمشي لي ناس لبنى.. الصباح والمساء وبوريها الاخبار اول باول ..وبقضي ليهم الحاجة المحتاجين ليها وبودي ليهم مسلتزمات البيت والمصاريف وكدا..
ولبنى متابعة معاي كل حاجة حتلا انا برة البيت بالتلفون .. ومستجدات القضية .. وبقينا لمن زول يخاف ويزوغ .. بنقول فلان عمل ظلطة .. ههه
والعلاقة اتحسنت شديد بين امي وليلى.. وبين ابوي واخوهو .. وبالنسبة لي دينا .. كانت معاي في كل الدروب .. زي نسمة في عز الصباح .. وتمشي الصباح الشغل .. وتجي العصرية كلها قاعدة مع لبنى وبتونسو .. وبياكلوا مع بعض .. ولمن يكون في مشوار ضروري ..
لبنى تقول ليها عليك الله يادينا.. امشي مع جعفر فرقي عليهو وونسيهو في الشارع ..
اها جااااء يوم النطق بالحكم ..
القاضي حكم عليهو بي 100 مليون حاضرة.. بالنسبة للشهور الفاتت .. و17 مليون شهريا ..
طبعا كان حكم مبالغ فيهو.. والله انا لمن داير اقع في الواطة .. بس القاضي طلع زول عنده ضمير .. سبحان الله يمهل ولايهمل .. اها ضوقها كويس .. والله الكلب لمن وشو بقى اسود .. القاضي قال لي بكرة تجي تسلم القروش من المحكمة .. وشهريا تجي تستلم من هنا .. وهو الزموهو شهريا يجيب القروش للمحكمة ..
والله القاضي ده قبل على فاروق ده.. التقول عنده معاهو تار ..
وانا بس بقول دي لبنى .. واصلت الارساليات بي طريق السماء .. ودرب السماء سالك زي ماهي بتقول ..
المهم يازول مشيت وبشرت لبنى .. وكنت ماشي اكلم ناس البيت ابوها وامها.. قالت لي لالا اوووعك .. عاين انت بتسمع كلامي صح؟؟ ..
بكرة امشي افتح حساب في البنك بي اسمك .. ونزل فيهو اي قروش تستلمها .. واصرف منها على البيت .. وماتقول ليهم كدا ولا كدا ..
انا بوريك عايزة شنو بالقروش دي .. اصبر بس واعمل زي ما انا بقول ليك .. قلت ليها لكن يابنى ....... قالت لي انت وعدتني انك تقيف معاي.. بس اقيف معاي في دي ..
انا طبعا ماعرفت فهمها شنو في الموضوع ده.. بس مشيت عملت زي ماهي قالت لي ..
فتحت حساب باسمي .. ووردت فيهو المية .. وبقيت كل شهر بمشي
اشيل القروش من المحكمة.. واوردهم في الحساب .. بس ماصرفت منهم ولاقرش .. لغاية الان انا بصرف من جيبي على بيتنا وعلى ناس عمي ..
في الفترة دي دينا خلصت الخدمة.. وبقت كايسة لي شغل .. وانا طبعا ماعندي اي قروش.. عشان اخش في برنامج عرس ..
طبعا خايف اتصرف في قروش لبنى وبتها.. والقروش تتقرض وبعدين لبنى ماتعرف تعمل شنو؟
واصلا ما سألتني يوم قالت لي باقي كم او صرفت كم ..
بس يوم واحد ماكان عندي حق الايجار بتاع بيتهم .. مشيت شلت منها دفعت الايجار ..
طبعا دينا بقت ترمي لي في الكلام .. يوم قالت لي انت ح تستمر كدا مع ناس عمك ديل وتنسى نفسك؟؟؟
انا سكت ساي ما اتكلمت ..
تاني مرة قالت لي.. والله انا شايفة انو بيت عمك بقى اهم مني ومن حياتي معاك ..
قلت ليها ديل ناس مكسورين جناح .. بس لغاية ما امسكهم في النجيضة .. وامورنا ح تمشي تمام .. اطمئني انا ما ح اتخلا عنك ابدا يادينا ..
المهم باختصار.. حسيت بيها اتضايقت .. وخافت من علاقتي بي لبنى تتطور تاني .. وانا اصلا مافي قلبي حاجة زي دي .. ولبنى ذاتها اساسا رافضة المبدأ ده ..
المهم يوم من الايام مشت دينا اتكلمت مع لبنى.. وقالت ليها .. جعفر ده ماعنده فكرة في زواج .. وماعنده قروش يتزوج .. وانا الزمن مافي صالحي يالبنى .. وماقادرة اتكلم معاهو ..
لبنى قالت ليها الموضوع ده خليهو علي انا .. بس انتي زي الماحكيتي لي ..
اها انا لمن جيت بالمساء وجبت حاجات البيت لناس عمي .. لبنى قالت لي ياجعفر انا عايزاك في كلمة ..
جيتها قعدتني .. وقالت لي انت زي اخوي.. ولا عندك راي؟؟ ..
وزي ماوقفت معاي انا المفروض اقيف معاك .. يا جعفر دينا دي ياخي ماخلاص .. انت طولت شديد .. لازم تعمل حاجة ..
قلت ليها اعمل شنو مثلا يالبنى ؟؟
قالت لي تتزوج .. انا مامحتاجة للقروش الفي البنك دي .. انت شيل من القروش وقضي مواضيعك.. واستقر ياخي .. كل يهون بعدين ..
قلت ليها انتي يالبنى الليلة مانصيحة؟؟ .. ده منو البشيل قروشك وقروش مرام يتزوج بيها ... ؟؟؟ انا؟؟ سبحان الله ..
ابقى ماراجل والله ..
قالت لي معناها انت ماعاديني اختك .. قلت ليها والله اكتر من كدا ..
لكن نفسيا مابقدر اعمل الحكاية دي .. قالت لي خلاص نحن تاني مابنقبل منك مصاريف للبيت ..
قلت ليها ماعلي كيفك.. انا مابصرف ليك انتي .. انا بصرف علي بيت عمي وده واجبي . عندكم زول اقرب مني يمسك البيت؟
المهم سكتت.. وقالت لي انت زول عنيد.. وما بتتجاوب ياخي ..
انا طبعا حسيت انو دينا اتكلمت معاها .. لكن ماعندي دليل ..
بس مشيت لابوي قلت ليهو يا ابوي انت مرة قلت عندك قطعة ارض عايزها لي اتزوج بيها .. انا بقيت على الزواج ..
قال لي اولا قطعة الارض في حطاب.. وصغيرة يعني مابجيب قروش كتيرة ..مابتكفيك لي عرس مراة غريبة.. الليلة لو بقت بت عمك .. كانت بترضى حتى لو بالقليل
لكن هسي البت الاسمها دينا دي.. العيني شايفاها دي.. ما حتقبل ليك بي عرس مقصر.. لاهي ولا اهلها .. وبعدين هسي اخوك مصطفى عيان .. دايرين نشوف ليهو علاج .. كان هنا كان بره ..
مصطفى ده اخوي المسكين.. اكبر مني حكيت ليك بيهو في البداية الدكاترة قالو عنده مشكلة في الكلى ..
غايتو الحمد لله.. المصائب تأتي متتالية .. انا مشربك ودينا شكلها مستعجلة .. وانا ماعارف اصرف كيف ..
غايتو يازول اول مالاقيتا قلت ليها يادينا .. والله انا بحبك وعايزك وباقي عليك .. وظروفي الانتي شايفاها دي .. مابقدر اعمل حاجة هسي .. انا ذاتي مستعجل وداير استقر .. لكن صابر .. اصبري معاي شوية وانا متأكد ربنا بفرجها ..
قالت لي انت لبنى ما اتكلمت معاك.. في الموضوع ده؟ .. قلت ليها انتي مشيتي شكيتي ليها صح؟ تاني ماتعملي كدا يادينا .. انا بحبك وبحترمك .. اصبري عليك الله اصبري ..
اها دينا مشت اتشاكلت مع لبنى .. وقالت ليها انتي بتفوتيني .. وبتمشيني في الكلام.. وماعملتي اي حاجة مع جعفر .. وجعفر لسه ماراضي يعمل اي خطوة لي قدام .. انتي لو عندك نية في جعفر انا بخليهو ليك .. وببعد من طريقو .. بس خليك واضحة معاي ..
لبنى قعدت تبكي طول الليل .. من الصباح قالت لي انا عايزاك ياجعفر ..
اديني التوكيل بتاعي .. وريني الباقي من القروش كم ..
قلت ليها القروش في مكانها .. انا ماصرفت منها اي شي .. كل شهر بسدد في البنك .. وقروشك كتيرة شديد .. قالت لي يعني قاعد تصرف علينا من جيبك ؟؟
قلت ليها نعم .. قامت وهاجت وكوركت فيني .. وقالت لي اديني توكيلي .. شالت التوكيل ..
وقالت لي المساء انا بتصل عليك .. مشت لقت القروش قريب المية وتمانين مليون ..
اتصلت علي قالت لي اول حاجة عايزاك تشوف لينا بيت بالقروش دي .. وتاني لو سمحت ماتجيب لينا حاجة في البيت ده.. انا بالقروش الشهرية بصرف علي بيتنا .. مامحتاجين ليك ..
قلت ليها اهاااا شفتي ؟.. هسي لو كنت بصرف من القروش الفي البنك ..
من وين بتلقي قروش تشتري ليكم بيت؟؟
قالت لي درب السماء سالك ..
انت امشي شوف حياتك انا بتصرف .. ولغاية اللحظة امها وابوها ماعارفين انو في قروش في البنك .. الا بعد اشترينا البيت .. الحمد لله .. حتن كلمتهم.. كان نص بيت ممتاز في نفس الحلة .. بس قدام شوية مننا ..
ابوي وعمي وليلى.. كلهم عرفو الحصل.. اني انا قدرت رجعت لي لبنى قروشها.. وبسدد ليها في البنك .. وبصرف من جيبي ..
ابوي ده قعد يبكي .. قال لي والله ياجعفر انت ولدة رضا ..والله ربنا يكرمك ..
خلاص هنا لبنى استلمت البيت .. والشهر ده مشت استلمت قروشها من المحكمة براها .. وجات مسكت البيت ..
وانا همي برد.. وبقيت بلملم في اطرافي .. وحكيت لي دينا قلت ليها خلاص هانت .. وانا من اليلة اموري ح تمشي تمام ..
المشكلة انو الجبان فاروق سمع بانو لبنى اشترت بيت لاهلها وقرر ينتقم منها .. وتعال شوف ..
الى اللقاء ..
الطريق الى السماء الحلقة الأولى
الطريق الى السماء الحلقة الثانية
الطريق الى السماء الحلقة الثالثة
الطريق الى السماء الحلقة الرابعة
الطريق الى السماء الحلقة الخامسة
الطريق الى السماء الحلقة السادسة
الطريق الى السماء الحلقة السابعة
الطريق الى السماء الحلقة الثامنة
الطريق الى السماء الحلقة التاسعة