الطريق الى السماء
الحلقة الثانية
بقلم طارق اللبيب
قالو لي الولد جاهو اغماء دم لانه نزف كتير شديد .. المهم عملو ليهو شنو ماعارف.. لكن قالو بقى كويس.. هسي وودوهو العنبر .. مشيت العنبر لقيت الولد امه وصلت .. ومعاها طفلين صغار بت في عمر 8 سنوات .. وولد في عمر 5 سنة ..
ولقيت جعفر لسع متابع معاهم .. جعفر لمن شافني قال ليها ده الزول الجاب معاي سفيان .. نسيت اقول ليكم الولد الاتضرب ده اسمو سفيان.. وهسي هو نايم ولا دايخ ماعارف .. بس اتخيلي قالو لي كويس نقلو ليهو دم ..
قعدنا معاهم لغاية المغرب.. المراة قالت لينا انتو ياجماعة امشو..
انحن بنقعد نرجى الدكتور.. نشوفو بقول لينا شنو؟
جعفر قال ليها انا بقعد معاكم .. ماعندي مشكلة ..
فاضي ماعندي حاجة .. سليمان لو عايز يمشي يمشي .. انا بعد شوية بنتظر سفيان يصحى.. لو بقى كويس براي بمشي للدكاترة .. واجيب واحد يخرجوكم ..
قالت ليهو خير ياجعفر.. غايتو انت ان شاء الله امك ماتضوق نارك ....
وتسلم البطن الجابتك ..
قال ليها انا عملت شنو يا ام سفيان.. ماعملت غير الواجب ..
قالت ليهو هو البعرف الواجب منو في الزمن ده؟؟ .. وانا ساكت ساي بعاين ليهم .. المراة عاينت لي قالت لي ربنا يجزيكم خير ياسليمان .. جعفر حكى لي وقفتكم مع ولدي ..
انا مابقدر اجازيكم يجازيكم ربنا ..
وبقت تحكي لينا المراة قالت ..
الاولاد ديل ابوهم خلاهم لي قبل خمسة سنة.. وانا كنت حامل بالولد الصغير ده .. كان اصلا بسافر تجارة لمنطقة حدودية كان بسافر معاهو صاحبو .. بجيبو العسل بالكميات .. بس السفرية الاخيرة دي سافر براهو و ما جا راجع منها.. عادل صاحبو الكان بسافر معاهو ..
سافر حصلو بعد تم شهرين .. وما لقى منو اي خبر .. اها عادل وكت وصل هناك.. ناس بقولو ليهو مات في الحرب القايمة هناك .. وناس يقولو اسروهو .. وناس بقولو ليهو حايم موجود في المنطقة ..وغايتو الحصل شنو مامعروف ..
انا عشت حياة كلها عذاب وشقا .. وماخليت شغلة ما اشتغلتها .. غسلت الهدوم في البيوت.. وشتغلت ابيع مكانس في السوق .. واشتغلت ابيع طعمية وبيض ..
لغاية سفيان الحمد لله شال حيلو.. وبقى يطلع يجيب مصروف البيت .. انا ربيتو يطلع لي راجل.. وعمري كله بحذر فيهو من العطالة ومباراة الصعاليك .. غايتو يوم يكفي ويوم يقصر.. لكن الحمد لله مستورة ..
انا قلت ليها طيب وين ابوك انتي .. واهلك واخوانك .. بسمت كدا وقبلت على الشباك المفتوح وبقت تعاين بره ..
وقالت لي .. ابوي اصلا كان جنايني .. في مساكن الاساتذة في شمبات .. ووضعوعلى قدر حالو نحن تلات بنات .. وابوسفيان .. جاء اتزوجني ما عشان انا سمحة وعجيتو .. بس عشان يخفف على ابوي حمل المعيشة ..
وهسي اخواتي الاتنين في الدمازين.. واحدة متزوجة .. والتانية قاعدة معاها . عندها مشكلة في نظرها .. وحالتهم غايتو الحمد لله ..
المهم انا قلت احسن ما ابقى عالة على الناس.. واعتمد على الله ..
المراة بتحكي جعفر قام طلع من العنبر سريع كدا ..
قلت ليها ده مالو مرق؟؟ .. مشيت وراهو لقيت ليك ليك بقش في دموعه وشو ماطبيعي ..
قلت ليهو في شنو ياجعفر مالك؟؟.
ياخي عقدت المراة .. قال لي ياخي ده كلام يقطع القلب .. نحن ناكل ونشرب ومرتاحين .. لكن شوف الناس دي بتعاني كيف ..
قلت ليهو يازول الله كريم عليهم .. قال لي ونعم بالله.. لكن والله حاجة تأثر والله ..
قلت ليهو خلاص خش تعال..
قمنا دخلنا والمراة زي الكانها كانت بتحكي لي نفسها ونحن برة .. جينا لقيناها لسع بتتكلم ..
قالت ربنا كريم .. اصلا ماضيعنا .. انت عارف ياجعفر.. الولد ده ابوهو كان راجل كريم.. وفيهو مروة للناس .. عشان كدا ربنا اصلا ما قصر معانا .. وانا دايما بقول دي من عمايل ابوهو الطيبة ..هسي عليك الله شوف دي ما حاجة غريبة؟
انتو ناس لا اهلي ولا اولاد عمي .. تقيفو معاي كدا ؟ وتسعفو ولدي وتمارضوهو ..دي موش حاجة تحير الزول ..
قام جعفر قال ليها عارفة يا ام سفيان.. انا غايتو شخصيا .. مستحيل القى زول في خطر وازوغ منه .. يعني هسي سفيان ده لو اتأخر شوية .. ونزف اكتر من كدا.. ماكان تلقيهو حي .. لاسمح الله .. عشان كدا والله انا عملية زي عملية المكانيكية دي.. انا مابقدر اعملا .
والله من وقوفي مع الناس .. ربنا وفقني في حاجات كتير ولابقدر اعددها .. جعفر بتكلم وانا بعاين ليهو خجلان من نفسي .. لاني انا قبيل كنت عايز ازوغ من الولد مع المكانيكية..
المهم جات واحدة ممرضة ولادكتورة ماعارف .. قالت الولد كيف؟ قلنا ليها مرة يفتح مرة ينوم .. شكلو مدروخ .. قالت مافي طريقة تطلعو بيهو لازم تنتظرو لبكرة ..
نشوف لانه بنخاف من المضاعفات.. وشنو كدا المهم ..
المراة قالت لينا خلاص انتو تمشو.. وبكرة نحن بنشوف الحاصل شنو؟
الوقت اتاخر خلاص ربنا يديكم العافية ..
جعفر قال ليها انا ماماشي قلت ليك .. بنتظركم لمن يخرجوكم ماعندي مشكلة لكن سليمان يمشي ..
انا قلت ليهو يازول انا ماماشي .. ببيت هنا .. وبكرة بمشي من هنا لي المنطقة ..
قال لي تمام وانا ذاتي داير لي زول يرفقني .. ارح نجيب عشا ..
طلعنا انا جعفر مشينا جبنا فرشة .. ومخدتين من الشارع ..
واشترينا عشا .. او بالاصح هو الاشترى الحاجات دي انا مفلس وعيني طالعة ..
جينا راجعين ودخل العشاء للمراة واولادها .. وجا طالع قعدنا بره
واتعشينا فضلة خيركم .. وانا بس بعاين للزول ده .. والله التقول بعرفو من قبل عشرين سنة.. وهو ذاتو نفس الشعور .. يعني دخلنا في بعض دخلة كدا ماطبيعية .. واتونسنا ونسة ماخلينا نكتة حايمة ..
الزول في الاول تشوفه سكوت وانطوائي ..
لكن والله وناس ونسه وحكاي حكي .. اصلك ما تمل من القعدة معاهو ..
المشكلة وين .. البعوضة في المستشفى وحولها .. معقول ياجماعة؟ دار للشفاء تكون بالطريقة دي ؟ غايتو الحمد لله ..
وانا بقيت متوتر طبعا .. لانه قالو البعوضة بتنقل الامراض.. ونحن قاعدين مع المرضى .. يعني البعوضة مشوارها في الترحيل .. ما حيكون بعيد .. بس تخش اي عنبر.. تجيب لينا حاجة وتحقنها لينا في الدم .. ربنا يستر ..
اتفقنا نمشي نبيت برة في الفسحة .. وكل مرة بالليل نجي نشوف سفيان .. انا طبعا مستمتع بالاحساس ..
وبقيت مع الزول ده .. ولمن افكر ياربي هسي الناس ديل .. علاقتنا بيهم شنو نبيت معاهم في المستشفى.. القى ليك الزول يقول لي في كلام يخليني اخجل من نفسي ..
قال لي والله يا سليمان .. انا مقلق على سفيان ده.. احتمال اكتر من امه .. قلت ليهو ليه يعني ؟.. قال لي ياخي الولد ده بوراك غمر تلات مرات .. والله عيونو سحبن انا قلت مات ؟.. اتخيل لو الولد ده مات ..
امه ح تتصرف كيف؟
قلت ليهو يا جعفر ياخي ربنا موجود.. خليك زول عندك توكل .. قال لي ونعم بالله.. والله ربنا مابضيع زول .. لكن البشتنة الحاصلة علي الناس ديل .. مأثراني شديد .. لمن ماقادر اكل ..
قلت ليهو اكل .. خلينا نقطع الليل ده ونسة.. انا زول سهر ..
قال لي ما بتساهر زي انا.. هسي بتقعد تشخر وانا بحرسك ..
نعمل تحدي؟ .
قلت ليهو مابتقدر علي ياجعفر .. انا مرات يومين بكون شايلهن وطواط ..
اها غايتو اتعشينا .. واكلنا اكل شديد .. ما اكلنا والفطور كان مجهجه .. انا اكلت سندويش الساعة واحدة .. وهو ماعارفو اكل ولالا ..
قال لي اها انت متزوج ياسليمان ولالسه ؟
قلت ليهو يازول توف من خشمك.. زواج شنو؟ عليك الله ده زمن زواج ؟.. انا لسه بدري علي .. انا داير اقرا.. ههه..
وقعدنا نضحك الاتنين.. قال لي والله فعلا الاحوال بقت صعبة .. والزول مابقدر يعرس الا لمن يبقى غنى ..
يعني انت مفلس مافي ليك عرس .. والمشكلة وين . البت تسكك وتقول ليك مافي مشكلة القروش ماكل حاجة .. وتحاصرك حصار شديد .. اول ما اتوافق وتبقوا في الجد .. تجي طلبات الملايين ..
وكلمة لازم .. ودي العادة .. واصلا الناس بعملو كدا .. وانت تبقى في طاحونة الهواء ..
بس المشكلة انت كبرت ياخي .. هسي انت عمرك كم؟ قلت ليهو انا تقريبا 34 .. قال لي لالا انت المفروض بعد كدا تفكر في الموضوع ..
قلت ليهو ياخي انا مفكر لي عشرة سنة .. بس التفكير بجيب شنو؟
انا ياجعفر اصغر واحد في البيت ..
ابوي راجل بالمعاش وكبير في السن .. وعندي تلات اخوات متزوجات .. واخوين اكبر مني متزوجين وساكين في البيت .. وانا لو اتزوجت يا اما اسكن في مطبخ امي.. او يكون عندي بيت .. عشان كدا هسي انا عامل فيها بخدم في امي وابوي .. ومركلس على كدا ..وما جايب خبر عرس ولاغيره ..
اخواني بقولو لي يازول العرس .. بقول ليهم جيبو القروش بزوغو من الكلام طوالي .. ويعملوها لي ونسة ..
المهم يازول غايتو ربنا يسهلا .. وكلو بي أجله ..
سكتنا مسافة كدا وقلت ليهو .. اها وانت ..
قال لي أأأأه .. انا .. احكي ليك شنو واخلي شنو؟..
انا لو حكيت ليك مابخلص للصباح .. قلت ليهو ياخي احكي نحن ورانا شنو؟
قال لي جدا .. بحكي ليك ..
ومن هنا بدأت قصة صاحبي جعفر .. الطريق الى السماء ..
الى اللقاء..
الطريق الى السماء الحلقة الأولى
الطريق الى السماء الحلقة الثانية
الطريق الى السماء الحلقة الثالثة
الطريق الى السماء الحلقة الرابعة
الطريق الى السماء الحلقة الخامسة
الطريق الى السماء الحلقة السادسة
الطريق الى السماء الحلقة السابعة
الطريق الى السماء الحلقة الثامنة
الطريق الى السماء الحلقة التاسعة