بقلم طارق اللبيب .
الحلقة 9
بعنوان معرفة العلاج الشرعي من علاجات الدجل والشعوذة
وكيفية التعرف على الدجال المشعوذ . وبراءة مشايخ الرقية الشرعية الافاضل منه ..
صفات الدجال المشعوذ .. اولا يدعي علم الغيب ..
وينطق باشياء في علم الله .. يقول لك مثلا السحر عملته ليك مراة كبيرة في السن ..
السحر عملته ليك جارتك اوعمتك او خالتك المهم يشخص لك الفاعل ..
ودي طبعا في مرضى كتيرين بطلبوها طلب .. ممكن يدفع دم قلبو عشان تتهم ليهو العمل ليهو كدا منو؟
واي زول يشخص الزول العمل السحر.. ده دجال وكذاب ومفتن عليه لعنة الله ..
ماتقول لي الزول ده برقي بالقران .. حتى لو برقي بالقران لو قعد يقول في كلام زي ده ..
ده انسان ضال او ملبس .. هو في الحقيقة مشعوذ ولكن يريد ان يتغطى بغطأء الرقية الشرعية لكسب ثقة الناس ..
فالناس تعمل حسابها شديد ..
تانيا قصة زول يقول ليك انا بنوم ليك بالخيرة .. وبكرة بكلمك بالحاصل عليك ..وطق بكرة يكلمك يقول ليك حاصل ليك كيت كيت كيت
ويوم واحد مايقول ليك والله ما عرفت حاجة .. يعني عليم بكل شي .. والعياذ بالله ..
في نقطة مهمة هنا نحن المفروض نتطرق ليها .. في بعض من مشايخنا الافاضل الاتلقينا عندهم القران.. سألناهم من موضوع الخيرة
ففسروه لينا بتفاسير قد تكون شرعية ..
اقول .. مثلا المريض يحكي حالته ,, يقوم الشيخ يقول ليك بنوم ليك بالخيرة ..
الشيخ بعد مايعمل اذكار النوم يقول اللهم ارني في منامي هذا من حال فلان ابن فلان ومرضه ..
فاذا رأى رؤيا في المنام قد تكون من الله .. وتسمى استفتاء الله .. والافضل الانسان يفعلها بنفسه ..
هذه المسألة بهذه الطريقة من السنة .. فالرسول عليه الصلاة والسلام حينما سحره اليهود استفتى ربه ..
فافتاه وكشف له من عمل له السحر وبمكان السحر
وقد يقول قائل ان هذه المسألة خاصة برسول الله .. والجواب ان الخصوصية تحتاج الى دليل ولا يوجد ..
ولكن هنالك ايضاحات مهمة .. يعني الشيخ لايضمن ان الرؤيا سوف تأتيه مؤكدا .. فربما يطلب الكشف في المنام ايام عديدة ..ولا يرى شيئا ..
فنصيحتي لهولاء ان لايؤلف من راسه اشياء ويخبر بها المرضى .. وعليه بالصدق كأن يقول ماظهر لي شي في المنام ..
وحتى لو ظهر شي .. فعليك ان لاتتأكد من حقيقته .. خصوصا في اتهام الناس .. فلايجوز ان تتهم احدا بمجرد الرؤيا في النوم
ولكن ربما تفيدك الرؤيا المنامية في تشخيص المرض مما يسهل العلاج..
المسألة التانية حكاية الكشف بالسبحة .. دي اكبر واشهر انواع الدجل والعرافة ..تجي للشيخ يسالك من اسمك واسم امك ويمسك السبحة ويقعد يطقطق
وطق يقيف من العد والحساب .. يقول ليك انت عندك عمل .. عندك عين والعين ضربتك ليها المراة الطويلة الصفراء.. بللاي؟
يعني بالسبحة دي عرفت كدا؟ طيب وريني عرفت كيف؟
طيب اوريكم طريقة السبحة دي كيف .. دي حاجة بسموها السقط ..بفتح السين .. وكسر القاف ..
يلا الدجال بقوم يجمع اسمك واسم امك واليوم الجيت فيهو ..بحسب مجموع الحروف حساب الجمل الكبير .
ويقسم المجموع على 9 .. ويشوف الناتج .. ومابهتم بالناتج كتير بهتم بالساقط .. الساقط ده اللهو الباقي من القسمة
مثلا عشان تكون فاهم الهبل ..
لو مثلا طلعت القسمة والباقي واحد انت عندك عمل .. لو الباقي 2 عندك حسد .. لو الباقي 3 عندك عارض .. لو الباقي 4 عندك ام الصبيان وهكذا ..
وده طبعا ياجماعة انا زمان لمن عرفت سر السقط ضحكت من جوه قلبي على الهبل والسخافة .. اوريك كيف ..
يعني مثلا جو نفرين .. يوم الخميس للشيخ .. عشان يكشفو بالسبحة .. كل واحد فيهم اسمو محمد وامه اسمها عائشة ..
بالتأكيد السقط بتاع اعدادهم ح يكون واحد .. يعني ح يكون المرض بتاعهم واحد؟؟؟ عشان سقط العد متطابق ده كلام شنو هسي ؟؟
طريقة تانية عند الدجالين اسمها فتح الكتاب ..
بجيبو كتاب من كتب العرافة التابعة لعلم الاوفاق .. فيهو حسابات الاسماء بالجمل الكبير والصغير برضو ..
قريب لنظام السبحة .. وبرضو بعمل مجاوزة لاسم المريض وامه واليوم .. ويقرر من الكتاب الحاصل عليه.. والغريب انو الكتاب مطبوع من سنة اسكت ..
يقوم يكشف ليهو زول مولود في الالفينات ..
حضرتني قصة طريفة هنا ..
عندنا جدنا رجل عالم من حفظة القران .. جاته زوجته حاجة كبيرة وهو كان ضرير البصر ..قالت ليهو شيخ فلان قال لي جيبي لي (شلن) عملة الخمس قروش .
قال ليها شيخ فلان داير بالشلن شنو؟
قالت ليهو والله فتح لي الكتاب وقال لي عاملين ليك عمل في حفرة الدخان ..
قال ليها .. خلاص انا بودي ليهو الشلن براي ..
مشى جدنا للشيخ وقال ليهو ياشيخ فلان انت قلت لبت احمد .. مسوين ليك عمل في حفرة الدخان؟
قال ليهو ايوة قلت ليها ..
قال ليهو وانت ياشيخنا الكلام ده جبتو من وين؟
قال ليهو والله فتحت الكتاب ..
قاليهو اها ياشيخنا كتابك ده مطبوع وين؟
قال ليهو والله مطبوع في مصر ..
جدنا قال ليهو .. نان ياشيخنا ناس مصر بعرفو مرتي بت احمد من وين ؟ وشن خبرهم بحفرة الدخان الفي بيتها ..
ياشيخ فلان الله يهدينا ويهديك.. انت وكت تفلس وتدورلك شلن قول لي عديل بديك .. بدل ماتقعد توهم لي المراة وتقطع قلبها بالخوف ..
ههه رحمة الله عليه كان رجلا عالما في زمن الجهل ..
المقصود هنا ياجماعة من الجهل الغريب انك تصدق بنتيجة كشف وفحوصات من كتاب اصفر قديم مطبوع في الخمسينات او قبلها ..
بحتوى على ارقام ورموز عرافة ودجل وشعوذة ..
لافائدة ترجع بها بل لاتقبل صلاة اربعين يوما
قال رسول الله صلى الله عليه وسلم من اتى كاهنا او عرافا فصدقه بمايقول فقد كفر بما انزل على محمد..صلى الله عليه وسلم
وفي حديث اخر لاتقبل له صلاة اربعين يوما ..
وفي كشف بالودع والرمل وفي دجالين الواحد بعاين ليك كدا بكشفك هه
في حالات بتاعة دجال يلاقيك في الشارع .. يوقفك .. يقول ليك يابن العم .. انت عند عارض جاييك بسبب عمل علمته ليك مراة اخوك ..
والغريبة في ناس متعلمين بصدقو الوهم ده وبخافو وربما يمرضو بالجد هه
المهم ياجماعة .. اي كشف بغير القران الكريم والرقية الشرعية ..بكون مجرد ادعاء ..وكذب وتضليل .. لانه لايعلم الغيب الا الله .
والكشف الحقيقي بكون بالتاثير بالقران في اثناء الرقية .. حتى الاستحضار قد يكون حقيقيا فعلا.. وقد لايكون حقيقيا .. مليئا بالاكاذيب والاتهامات الباطلة..
وقد رفعت رقية الكشف في قناتي في اليوتيوب .. من اراد ان يكشف على نفسه فقط يشغل الملف وهو مغمض ... انتهى البيان ..