بقلم طارق اللبيب
الحلقة 7
طبعا ياجماعة احمد لمن اتكشفت ليهو الحقايق راسو ضرب.. وماعرف يمشي على وين .. وهو عندو كلمة سابقة لي بت خاله ليمياء بت الترزي ؟ لكن الحق يقال.. مازالت روان مسيطرة على كيانه ظاهرا وباطنا.. لكن أحمد زول بقدم الدين والالتزام على الحب ..فاتخلا عن روان عشان الله .. ومن ترك شيئا لله عوضه الله ماهو خيرا منه .. واحتمال تكون ليمياء خير عند الله من روان .. مامعروف ..
بس كان نفسه يلاقي روان مرة واحدة ويقول ليها اعذاره ..حتى لو ماحصلت قسمة .. وزعلان من نفسه جدا.. انو رفض يقبل مكالماتها.. ودايما بقفل الطريق في قدامها بدون مايفهم منها ..المهم هسي قام رفع تلفونو وكتب ليها رسالة.. فيها..
السلام عليكم ..
عايز يشوف ردة فعلها . روان لمن جاتها رسالة من أحمد مجرد سلام .. حضنت تلفونها وقامت جارية بدون ماتشعر .. لمن وصلت غرفتها .. انتبهت لنفسها انها اتصرفت تصرف طفولي جدا.. وغير مسؤول ..
قعدت وشالت نفسها ..وغمضت عيونهت .. رفعت التلفون وكتبت ليهو.. وعليكم السلام ..
كتب ليها كيفك ياروان لو فاضية انا عايز اتكلم معاك بعد اذنك يعني ..
ردت ليهو وقالت ايوة فاضية ..
رد ليها قال .. تمام جدا ربع ساعة وانا بتصل عليك ..
ختت التلفون وطلعت برة وعاينت للسماء .. وشالت نفس وماعارفة الشعور الحاسة بيهو ده شكلو شنو .. خوف شديد ممزوج بي فرح وغضب ويأس
وتفاؤل وحاجات كدا ملخبطة .. وبقت لافة بالحوش زي المجنونة حفيانة ..
امها كانت في المطبخ بتقطع ليها في بصل .. جات طالعة شايلة السكين وتعاين ليها مستغربة .. دي مالا؟ بسم الله الرحمن الرحيم ..
قالت ليها روان؟ مالك؟ جنيتي؟ ..
قالت اصبري اصبري امشي كملي شغلك يا امي بحكي ليك ..
امها رجعت على مطبخها 15 دقيقة وهي لافة في الحوش حفيانة وشايلة تلفونها وكل عشرة ثواني بتعاين ليهو .. وتعاين للدقايق .. الكانت كأنها .. 15 سنة موش 15 دقيقة ..
واخيرا تمت الربع ساعة وزادت تلاتة دقايق .. قربت تتصل عليهو هي .. لكن صبرت نفسها بي حركة مضع الاظافر البتعملو كل ماتتوتر ..
أحمد على بال ماوصل محله وخش في المخزن الداخلي عشان يتكلم معاها .. واتصل .. من أول جرس فتحت الخط وقفلت عليها الغرفة ..
قالت ليهو اهلين يا أحمد ..
قال ليها ياروان احتمال يكون اتصالي جاء متأخر ..
لكن قالو لان تأتي متأخرا خير من ان لاتأتي .. الحقيقة ياروان انا حبيتك اكتر من روحي .. لكن بصراحة انا بحب ربنا ورسول الله اكتر منك ..
فلمن شفتك انت مخالفة ربك وماشة عكس اتجاهو وماعايزة تسمعي كلامي ..انا فضلت انفصل عنك .. لاني ماعايز اعيش حياتي مع انسانة بعيدة من الله ..
بس انا سمعت انك غيرتي حياتك وبقيتي انسانة طائعة لله.. ومحجبة ..فانا عايز اعتذر ليك عن اي تصرف عنجهي اتصرفتو معاك في الفترة الاخيرة..لاني ماعارف المعلومة بتاعة حجابك وآسف اني ماسمحت ليك تتكلمي معاي .. عشان اعرف
لكن بصراحة ميادة صاحبتك هي السبب في كل الحصل ده ..عكست لي عنك صورة مخالفة .. عشان كان هدفها تزوجك لي حسن .. وتكسب ايفون مقصطر ..
فانا طالب منك العفو والسماح لو بتقدري ..
قالت ليهو .. انا باختصار مسامحاك وخاتة ليك العذر ..وعارفة ميمي سممت ليك عقلك مني .. بس كنت متأملة تسمعني ولو مرة واحدة ..
والحمدلله انا في النهاية عرفت من أروى ليه انت بقيت مابترد علي؟ .. لانك اخترت شريكة حياتك ..
مع انك عارف اني مابقدر اعيش حياتي من دونك .. بس يلا خلاص الزمن فات وعدا .. وفرصتي في السعادة انتهت ..
لاني انا الان خطبوني خطوبة رسمية واحد من اصدقاء ابوي .. اتفروض علي فرض.. وابوي اداهم كلمتو ..وانا مابكسر كلمة ابوي ..
لكن اتأكد انا بعيش معاهو جسد بدون روح .. وحس بدون معنى .. وزوج بدون حب .. لانو قلبي مامعاي .. عشان اديهو ليهو .. قلبي عندك .. ماتنسى الحاجة .. سوى ان كان سمعت بي مت اوحييت ..
قال ليها كيف يعني اتخطبتي رسميا ..متين حصل الكلام ده ومتين خطبوك ؟
قالت ليهو والله ده الحاصل يا احمد .. انت موش اخترت شريكة حياتك؟ انا تاني انتظر منو ؟ احسن ابر ابوي ولاشنو؟
قال ليها فعلا انا اتكلمت مع ليمياء بت خالي ..
بس الموضوع لسع ما تم وانا هسي بقيت متردد .. وهي ما كلمت امها لغاية اللحظة دي .. فعلا اخترتها بعقلي مابقلبي لانها انسانة متدينة ..ومحجبه ومهذبه وزولة واجب..
وانتي عارفة مبدأي مابتزوج انسانة متحررة ومتبرجة لو قعدت اعزب طول حياتي ..
لكن انا اتصالي عليك ده ..والله ماعارف انك اتخطبتي ..
اتصلت عليك لاني كنت ح أخلي الدنيا كلها وارجع ليك ..مادام مسكتي طريق ربنا..
لكن مادام كدا سبق السيف العزل .. نقول قدر الله وماشاء الله فعل .. ربنا يوفقك ويوفقني .. مع السلامة.. مع السلامة ..
كدا الناس ديل زي ما ملاحظين افترقو فراق الاحبة .. قبيل كانت النفوس غير طيبة ..
اها هسي بعد أحمد قفل المكالمة روان بكت بكت وفجأة سكتت من البكاء .. ورفعت التلفون وكتبت ليهو .. (قلبي امانة عندك)
رد ليها قال ليها ..
يسلم قلبك المليان حنان وموده.
يا توبي الاصيل اللا قِدِم لاهـــدا.
قلبك بحفظو ويصمد معاي في الشده.
في القدر الفصلنا .وفي الزمان العدا ..
ودي كانت أخر رسالة من روان ورد عليها احمد ..
وتاني مافي زول قدر كتب رسالة للتاني .. عارفين ليه؟
كلما تحاول تكتب ليهو تقول لا.. ده زول خاطب ..
وهو كمان يقول الزولة مخطوبة انا مابصح ارسل ليها .. والاتنين بقو عايشين الالام مكتومة في القلوب ..
روان هنا مرت الايام عليها كئيبة مملة ومواعيد الزواج قربت قدر ماتقرب هي بتحس بالخوف والتوتر والقلق .. زي المحكوم عليهو بالاعدام ..وموعد التنفيذ قرب .. والغريبة الايام كانت بتمشي بسرعة ..
وبابكر الشيخ بقى يجيهم كتير في البيت .. وكل مرة يجي لازم يشوف روان.. يعاين ليها كدا بس ويمشي .. وبقى كاسر الحاجز .. بجي عديل يلقى ابوها قاعد يقول ليها قومي يا روان عندنا مشوار .. ولا بستأذن من ابوها .. وابوها مبسوووط ماشايف اي مشكلة في الحاجة دي ..
بس كل يوم روان بتكتشف انو بابكر .. زول احمق وغضوب شديد .. وابرتو مابتشيل خيطين .. اتجاه واحد .. بس زول كريم وشهم .. وود اصول مابياكل حق زول ومابتعدى على انسان لكن تقربو في حقو ده الله قال بقولك ..
وزول مواقف .. ومابحب الخيابة .. والغلطان بقوله غلطان في وشو ..
بعدين ماعنده علاقة بالدين كدا يعني ..الصلاة دي ولا بحاولها .. ولاحصل يوم شافته ركع .. وكل ما تقول تسأله تقول ليهو انت مابتصلي ليه؟ بتخاف منه .. لانو زول ردة فعله اكبر من الفعل ..وتغير رايها من السؤال وتسكت ..
يوم قال ليها انتي ياروان .. اللبس المبشتن البتلبسي فيهو ده لزومو شنو .. فستان وعباية ورابطة راسك وطرحة من فوق ودبابيس .. انتي كوزة؟
قالت ليهو ده دين ربنا ياباكر .. ودي اوامر الله الخلقني ..والدين ماحق الكيزان .. الدين حق رب العالمين .. ده ربنا قال للنساء تلبسو كدا ..
قال ليها الناس اللابسين كدا ديل.. ياهم ناس الاجرام .. متسترين بالدين .
قالت ليهو ابدا ماصح .. حتى لو في واحدة لابسة كدا ..وعندها سلوكيات ماحميدة .. ده مابيعني انو اللبس ده غلط ..
هسي لو في واحد لابس سديري زي حقك ده .. وقام سرق .. هل انا اقول الناس البلسو السديريات ديل كلهم حرامية؟
قال ليها المهم غايتو انا لبسك ده ماعاجبني .. البسي زي البنات ديل ماتبقى زي الكلمة الشاذة ..
قالت ليهو بس انا عاجبني ومبسوطة بيهو شديد.. بابكر هزا راسه وسكت ..
الموضوع ده خلا روان بطنها طامة من الزول ده.. بطريقة عجيبة .. كيف يعني الزول ده جاهل كدا .. وماعندو ادنى فكرة عن الدين.. ومفتكر انو الدين حق فئة حزبية معينة .. زيو وزي الجهلاء المابفهمو .. حتى ماعندو منطق ..
حياتو كلها قروش وبضاعة وشيكات وغيرو ..
الحقيقة بابكر عايز زوجته تكون لابسة زي زوجات اصحابه .. تلبس عادي وتربط نصها بتوب غالي وشفاف وكرعيها محننات لغاية نص الساق.. والدهب في رقبتها وفي يديها يكشكش.. يعني كدا..
حكاية عبابة وخمار حجاب دي ماراكبة ليهو ..
وروان بتختلف معاهو في الفكرة دي مية وتمانين درجه..
المهم بابكر ده روان ما قدرت تحبو ..كمان اتعدت مرحلة انها مابتحبو .. الى مرحلة اكبر.. انها بتتضايق منه .. وكده كدا مستحيل تسعد في حياتها معاهو .. بس صابرة عشان ابوها واهلها وماعندها حجة ترفضه بيها ..
ـــ
ومرت الايام .. ومافي اي تواصل بين أحمد وروان ..
اها يازول احمد طبعا هناك منتظر الرد من ليمياء.. بعد تكلم امها .. وماكان متحمس شديد للموضوع .. لانه حاول بشتى السبل والوسايل انو يحب بت خاله ..وتسد ليهو مكان روان.. لكن للاسف .. ماقدر على الحاجة دي .. بس دايرها ركوب راس وثبات علي الموقف..
في اليوم المفروض ليمياء .تتكلم مع امها .. جات لقت امها تتونس مع صاحباتها .. وتضحك .. سبحان الله الانسان احيانا ينسى الحزن .. وسمي الانسان بالانسان لانه ينسى .. حتى المراة الراجلها ميت في لحظة تنسى .. وممكن تلقاها تضحك ..المهم
ليمياء لمن لقت امها بتتونس وتضحك.. قالت ده انسب وكت افاتحها فيهو .. انتظرت لمن طلعو منها الحريم ..
وجات قعدت جنبها .. قالت ليها يا أمي انا عايزة اقول ليك كلام ..قالت ليها احكي ياليميا ان شاء الله خير ..
قالت ليها عارفة يا امي في ايام البكا .. احمد ودعمتي ناداني.. وقال كيت كيت .. وانا قلت ليهو .. مافي مشكلة .لغاية ما أكلم امي واديك راي ..انتي رايك شنو يا امي؟؟
امها قالت ليها.. عليك الله؟؟ بالله؟.. منو هي البتخليك تعرسي ود عمتك ؟العمى اليلايسو ويلايس عمتك معاهو ..
عمتك الحاقدة الحاسدة بتاعة الفقرا بتاعة الدجالين ..
عمتك الدمرت حياتي . دي عذبتني عذاب الله اكبر .. وتعمل لي في الاسحار من انا عروس
.. وهدفها كلو انا اتطلق.. ولمن ابوك ابا يطلقني .. اشتغلت علي شغل اسود عشان ما أجيب جنا .. ولمن ولدتك انتي ..عملت لي عمل عشان ما اجيب ولد .. انا وابوك قاعدين 22 سنة بعدك انتي.. انا حمل ساي ماحملت لاولد ولا بت ..
ليمياء قالت ليها ده شنو يا امي الكلام الغريب ده .. انتي القال ليك منو انو عمتي عملت ليك سحر عشان تطلقي او ماتلدي .. قالت ليها انا مشيت لي مرة شيخة بتشوف.. وقالت لي كدا .. ووصفت لي حاجات انا لمن راسي شيب .. اصلا مابتكذب ..
قالت ليها يا امي ده شنو الجهل الغريب ده؟؟ .. انتي بتصدقي انو في زول بعلم الغيب؟؟ عشان يكشف ليك .. يا امي لايعلم الغيب الا الله ..
امها قالت ليها لالا يختي .. ديل ناس عندهم خدام بوروهم ..
ليمياء زولة فاهمة قالت ليها .. يعني عندهم جن وشياطين .. طيب شكرا ليك يا امي.. مادام انتي بتتهمي عمتي.. بناء على كلام الشياطين .. شكرا ليك بالجد .. متين كان الشيطان مصدر معلومة صحيحة ؟
امها قالت ليها اسمعي ياليمياء .. الناس ديل انا مابنفعو معاي .. كان عملت وكان ماعملت .. مابنفعو معااااااااااي .. لو انتي مصرة على الموضوع ده انسي امك بس وامشي عليهم .. انا وهم ما بنتلم .. والكلام ده لحدي هنا انتهى تاني ماتتناقشي معاي ..
الى اللقاء ..