موعد مباراة الهلال و الأهلي في دوري روشن السعودي

 

بقلم طارق اللبيب 

الحلقة 6

 عمك علي دخل على زوجته وبنته .. فرحان فرح ماطبيعي..  مافاضل ليهو الا يأخد ليهو عرضة .. عاين لي روان كدا وقال ليها والله انتي بخيتة ومحظوظة وربنا بريدك .. قالت ليهو ان شاء الله خير يا ابوي .. الحاصل شنو؟ 

قال لي شوفتي الود الشهم المالي مركزو الاسمو بابكر ود الشيخ؟ .. قالت ليهو والله نعم الانسان مالو؟ .. قال ليها تتخيلي الزول ده طلب يدك هسي مني . روان اصنيها عملن زنننن لمن حست بكهربا  وصلت راسها .. وبقت زي الماسامعة .. 

قالت ليهو اها .. وانت قلت ليهو شنو؟ قال ليها اقول ليهو شنو يعني؟

 قلت ليهو مبروك .. لاني متأكد لايمكن انتي ترفضي بابكر .. 

سكتت مسافة وماعرفت تقول ليهو شنو؟ 

امها طوالي دخلت في الخط قالت ليهو .. انا والله عايزة ازغرد .. ماشاء الله ياروان صبرتي وجبرتي.. وربنا عوضك بي ابرك و خير..  تتذكري لمن قلت ليك والله تجيبي سيدو .. 

روان كانت واقفة جنب الباب ..  براحة قعدت في السرير لانها حست كرعينها ماشايلنها .. 

اي فعلا بالعقل كدا ..ناس البيت كلهم متكيفين من بابكر ..في موقفو العملو مع عزوز .. وهم اصحاب ابوها  .. وناس كرما واي شي.. لكن هي قلبها لسسسسه متعلق بي أحمد .. والحاجة دي مابيدها .. غصبأ عنها ..

سرحت مسافة .. وعاينت لابوها فرحان.. وامها فرحانة  .. وعزوز مامصدق من الفرحة .. وعندها اختها اسمها رابعة ..  اليوم داك كانت قاعدة معاهم .. فرحانة برضو بالخبر ده .. 

ابوها عاين ليها كدا  .. وقال ليها اها ياروان ..قلتي شنو؟  والله الناس ديل اول حاجة كرم ورجالة وعز واصالة وقبايل .. اما القروش والمال .. بابكر بغرقك في النعيم ..

ديل ناس تجار ..صفقاتهم بميات بالمليارات.. رايك شنو عليك الله في احسن من كدا ؟..

وهي طبعا ده كله مابهمها .. ومن جواها بقت تقول والله يا ابوي انت ماعارف الجواي شنو؟ 

ابوها لمن شافها ساكتة.. قال ليها طبعا السكوت علامة الرضا.. وانا اصلا اديت كلمتي للناس..  لاني عارفك مابتكسري لي كلمة .. وقلتي لي كدا بي خشمك .. روان قالت ليهو والله يا ابوي مابكسر ليك كلمة.. وانا عند كلمتي .. البشوفو أعملو .. وانا معاك .. والبتعملو كله انا رضيانة ..

قال ليها الله اكبر .. والله عارفك مابتخيبي ظني  .. ولا بتكسري ضهري ..

تعالي تعالي  .. ومسكها من راسها .. قلدها وسلم ليها فوق راسها ..

وهي ابتسمت ابتسامة مليئة بالاسى والتعاسة .. 

ومشت خلت البيت كله في فرحة ماطبيعية .. دخلت غرفتها وبكت بكت لمن تعبت من البكاء.. وهي بتقول حرام عليك يا احمد .. يعني انا اعمل شنو عشان ترجع لي .. 

اختها رابعة جات محصلاها .. لقتها بتبكي  .. روان لمن شافت اختها سريع قشت دموعها وابتسمت .. رابعة قالت ليها مالك بتبكي ياروان؟  انتي ما رضيانة بالموضوع ده؟ قالت ليها ابدا دي دموع الفرح ياربعة .. 

قالت ليها بطلي الكذب والاستهبال ..  انا امي حكت لي انو أحمد خلاك ..  وانتي ماقادرة تتقبلي الحكاية دي  .. وبتبكي الصباح والمساء ..

قالت ليها يا رابعة انا أحمد ضيعتو من يدي  .. بسبب طرطشتي .. وميمي تمت الناقصة .. احمد ماغلطان  .. كان دايرني اكون انسانة سوية .. ماكان عايز يتزوج ليهو واحدة متبرجة .. ومتحررة من شرائع  ربنا .. 

قالت طيب أهو انتي التزمتي وبقيتي محجبة  .. وبتصلي واليوم كلو مع المصحف والمصلاية .. قالت ليها ده كلو حصل بعد اتفارقنا .. وهو ماعارف اني اتغيرته ..  وماعايز يديني فرصة ..  وهسي قالو خلاص اختار واحدة غيري يارابعة ..

قالت ليها طيب حلو اها؟؟ نعمل ليك شنو ان شاء الله؟؟ 

 نمشي ليهو نقول ليهو يا احمد نحن بنترجاك .. خلي الزولة المعاك دي  .. وعليك الله تعال ارجع لروان ..  ولو أبا نحنسو ونرقد ليهو في الأرض ..  ولا نعمل شنو يعني ؟؟ 

روان انتي بقيتي زولة كبيرة  .. فكري بعقلانية شوية ..  وحاولي اتداركي حياتك ..  وعايني للفرحة الفوق ابوي وامي حتى عزوز فرح لمن دمع ..

قالت ليها تمام يا رابعة  .. هسي انا رفضت ولا قبلت ؟ 

قالت ليها قبلتي ياروان ..  لكن مامن جواك .. قالت ليها الجواي ده مابيدي  .. بس انا قبلت وقررت خلاص  .. عايزة اتزوج بابكر .. الموضوع ده تاني ماتفتحيهو لي ولا لاي زول الله يخليك .. 

قالت ليها طيب كدا ماكويس .. عشان انتي المفروض تتزوجي زول بتحبيهو .. عشان ماتظلمي ود الناس معاك ..  بابكر مابستاهل كدا.. 

قالت ليها ماتشيلي هم .. يارابعة .. الزمان كفيل بمداوة الجروح .. المهم ياحماعة باختصار ناس البيت كلهم فرحانين بحكاية بابكر دي الا روان .. 

ومرت الايام .. وعمك علي ابو روان اتصل على الشيخ ابو بابكر ..  وقال ليهو .. ياحاج الشيخ انا اتشاورت مع البت وامها واعمامها الاتنين واخواتها  .. وماخليت زول .. والناس ديل كلهم يتشرفو بيكم  وبي نسبكم والله .. فنقول ربنا يتم على خير واديناكم .. الشيخ استبشر خير  .. واتبسط شديد ..  انو بابكر ولده ..  لقى ليهو نسب زي نسب ناس على .. 

وكلم ولده بابكر بالموضوع .. قاليهو ماشاء الله عمك علي رجع لينا بتلفون ..  وقال البت موافقة .. والله بابكر ده فرح فرح ماطبيعي ..

تاني يوم طوالي جاهم في البيت ..  شايل الاكياس مليانة بالخيرات والطبيات 

الفواكة والبارد والسكر والشاي .؟

كان قاعد في الصالون .. ابوها مافي واخوها مع اصحابة عند الجيران .. المهم نادو ليهو روان  .. مشت ليهو في الصالون بتاع الرجال .. سلمت عليهو واتونست معاهو .. وامها جابت ليهو الشاي والقهوة والاكرام .. بس روان كانت حاسة تجاهو ببرود شديد .. لكن بتتكلم معاهو باحترام .. واصلا ماحسستو بحاجة ماياها .. بالعكس كانت معاهو طبيعية جدا .. 

بس لاحظت حاجة غريبة ..الزول ده  اذان المغرب اذن  .. وهو لامشى المسجد ولاقام صلى .. لكن طلع بعد المغرب طوالي  .. ماعارفة لو اصلا مابصلي ولا مهمل وح يمشي يصلي قدام بعد خروج الوقت .. 

المهم في قعدته اتفق معاها انو يعزمها برة البيت .. ويكملو كلامهم مع بعض  .. عشان تتعرف عليهو اكتر .. قال ليها لازم اعرفك وتعرفيني .. نحن خلاص ح نعيش حياتنا مع بعض لاخر العمر .. 

قالت ليهو خير ان شاء الله  .. بشاور ابوي واشوف رايه .. انا ماعندي مشكلة..

لمن ابوها جاء .. وكلموه انو بابكر جاء هنا وجاب معاهو كدا وكدا .. 

روان قالت ليهو يا ابوي الزول ده طلب مني انو يعزمني برة البيت .. 

قال ليها ومالو؟ انتي محل ثقة وهو محل ثقة تمشي معاهو طوالي .. قالت ليهو خلاص ممكن يمشي معانا عزوز .. قال ليها مافي داعي .. يعني نحن شاكين فيكم ؟؟ .. (طبعا الراجل ده هنا غلطان ) لاعتبارات كتيرة .. قالت ليهو خير يا ابوي .. 

بس يا ابوي انا عايزة اسألك سؤال .. انت بابكر ده مابصلي؟ 

قال ليها كيف يعني؟؟  قالت ليهو حاصل كيت كيت .. 

قال ليها دي حاجة بينو وبين ربه .. وبعدين احتمال ماشي يصلي قدام .. حتى ولو مابصلي..  بعدين لم يبقى راجلك .. انتي بتهديهو للصلاة ..  المراة اصلا يابتي هي البتصلح الراجل..  وهي نورو وضلامو .. صاح ولالا؟ .. قالت ليهو فعلا يا ابوي كلامك عين الحقيقة ..

قال ليها انا لمن اتزوجت امك دي  .. كنت زي الطين هي الصلحتني وخلتني بقيت زول .. حاجة سلمى من جوة قالت ليهو هوي ياراجل سيب المبالغات..

والله لقيتك دهب..  من يومك دهب اصلي مامزور .. 

المهم ..  

يوم المواعيد لبست لبس محترم جدا  .. وربطت راسها  ولبست شرابات . طلعت معاهو ..  مشو الخرطوم  لمطعم مشهور كدا  .. 

واتونس معاها ..  ومعاها وحكى ليها عن حياته ..  وانو كان خاطب واحدة واختلف معاها وشنو وشنو المهم هي ذاتها ماكانت مركزة شديد في حكاياته دي .. 

بس هي ماحكت ليهو اي حاجة عن حياتها .. 

لمن سألها قال ليها احكي لي عنك .. قالت ليهو والله مافي شي يابابكر ..  غير ناس بتقدمو لي وانا برفض .. او الموضوع مايتم اصلا .. 

في اثناء مابتكلم معاها كدا جاهو تلفون .. 

قال ليهو .. الو مرحب .. اسمع ..يا عابدين انا قلت ليك المواعيد بتاعة القروش دي ما تفوت .. وانت مابتفهم الكلام .. و كل مرة طالع لي بكلام جديد ..

وداك بتكلم وهي ماسامعاهو  .. ...........................

بابكر :قال.. ماتعتذر .. انا تاني مابقبل ليك عذر .. انت زول مستهتر وحقار ..وانا والله صبرت ليك كتير .. بعد كدا الله اكبر عليك ...

المتصل بتكلم - ..............................

بابكر  قاليهو .. اعمل ليك شنو؟ انت مابتعرفني؟؟  ماكلموك ممكن اعمل فيك شنو؟ والله اقع فيك بسطونة في نص السوق..  حجازك مايتلقي .. كلب وسخ .. 

اصبر لي ساي يا حقير .. وطبز قفل ليهو الخط في وشو ..

روان دي خافت من الزول ده خوف ماطبيعي ده..  زول متوحش .. ده مالو ده هسي؟؟ عيونو اتقلبت حمرا وعروق وشو برزت .. 

شال نفسو وختاهو .. وقبل علي روان ..قال ليها معليش الزول الحيوان ده وترني.. 

روان شالت نفس متقطع  .. وقالت جواها ..اوووب علينا والله .. الزول ده صعب شديد .. ده والله شكلو كدا يدقني زي الماحصل شي ..

اليوم روان ترجف لمن الزول ده رجعها للبيت .. العشاء الجابو ليها ماقدرت تأكلو .. تبلع في الاكل بالخوف .. 

لمن وصلت.. قالت لامها  .. والله يا امي بابكر ده زول صعب شديد.. وبغضب عضب كعب خلاص  .. وانا صراحة خوفت منه ..

قالت ليها مالو؟؟ الحصل شنو ؟؟ روان حكت ليها المشهد .. 

امها قالت ليها اصلو الرجال مابرضو الحقارة يابتي .. 

قالت ليها انا كنت عايزة اكلم ابوي بالموضوع ده..  لكن برضو خايفة ابوي يفهمني غلط .. قالت ليها خليهو بكلمو ليك انا .. 

اها لمن حاجة سلمى حكت لي عمك علي الكلام القالتو روان.. 

 قال ليها والله احسن مافعل..  وانا لو في مكانه زول يزوغ بحقي .. ويستهبل علي..  بجلده في السوق .. شنو المشكلة وين؟ .. العيب الراجل البخلي حقو للرجال .. ده ماموضوع ياسلمى .. 

خليها روان دي ح تتزوج الزول  ده.. وتعرفو انو زول ود حلال وتربية رجال .. والايام بتثبت ليها الكلام ده..

روان امها حكت ليها الكلام القالو ابوها .. واستسلمت المسكينة وقالت رضيت بامر الله .. ربنا يجيب العواقب سليمة .. 

اها كم يوم كدا وعمك الشيخ اتصل على. علي ابو روان ..  وقال ليهو الجماعة بكرة جايبن ليكم سداد المال..  وان شاء الله الزواج شهر سبعة .. يعني تقريبا بعد شهرين .. 

بنحدد ليكم اليوم بالضبط في الايام الجاية .. علي قال ليهو على بركة الله ياحاج الشيخ ربنا يكف العوارض ..

... اها يا جماعة تعالو شوفو الحصل بي هناك مع احمد .. 

احمد اخته (أروى) ماكلمته بي اتصال روان .. ماعارف ليه هل  حفاظا على علاقته مع بت خاله .. او انها نست وشافت الموضوع ماضروري .. الله اعلم بنيتها .. اها يوم جات السيرة .. وأحمد اتذكر روان قدام  أروى .. وقال زولة مستهبلة وبتلعب على حبلين .. قامت أروى حكت ليهو كل الكلام القالته روان .. وانها ختت ليهو وصية .. وقالت ليهو .. انا حية ولا ميتة .. قلبي امانة عندك .. وما ح احب انسان غيرك الى يوم القى الله .. بتحكي ليهو وهي بتضحك .. 

أحمد لمن سمع الكلام ده .. 

قال ليها والله يا أروى الكلام ده وراهو كلام .. مامكن تقول كلام ظي ده بالكذب والادعاء .. انا لازم اتحقق من الموضوع ده عشان ما أظلمها سي ..باكر من الصباح  احمد لمن وصل السوق اول شي    مشى لي حسن طه ..

اتونس معاهو .. وسأله قال ليهو اها موضوعك ماشي كيف مع روان علي ؟؟ 

حسن قال ليهو والله ياخي دي زولة عجيبة .. 

البت احكي ليك قصتها .. الزولة دي جاتتني هنا مع صاحبتها اسمها ميمي .. احمد .. قال ليهو بعرفها اها؟

قال ليهو انا عجبني لبسها والتزامها وادبها ؟

قال ليهو قلت شنو؟ شنو؟ .. دي زولة بتلبس اسوء لبس ياحسن اكيد دي ماياها ..

حسن قال ليهو ابدا .. ياها روان .. زولتك الانت قاصدها .. اصبر جاييك في الكلام .. والله الزولة دي لابسة لبس حشيم . وفيها وقار ملائكة بس .. 

اها أنا والله اعجبت بيها عشان كدا بس .. 

وحصل حصل لغاية ما مشيت وطلبتها من ابوها .. وتاني هي جات رفضتني .. وانا ما نت عارف السبب ..  بس اكتشفت انو ميمي كانت بتخدعني واكتشفت الموضع ده مؤخرا .. عارف كيف؟ 

انا كنت واعد ميمي .. لو تمت لي موضوعها بهدية تلفون .. 

اها لمن روان رفضتني .. قلت لي ميمي .. يا ميمي الموضوع ده فيهو حاجة غلط .. لو ما اعترفتي لي بالحقيقة مابديك التلفون .. ولو اعترفتي بالحقيقة تستاهليهو .. 

قامت الهبلة اعترفت لي ميمي براها بي كيت كيت .. حتى انا لمن مشت طلبتها من ابوها هي ماكانت موافقة ولا عارفة .. قمت انا يا أحمد سألت ميمي قلت ليها ليه روان رفضتني من دون ما تعرفني حتى .. 

قالت لي روان ياحسن بتحب احمد حب ماطبيعي ومستحيل تقدر تعيش مع راجل غيره .. بس هو خلاها وماعايزها وما مديها فرصة حتى تتكلم معاهو .. 

احمد ده قعد في الواطة .. وخت ايديهو في راسه .. 

وقال ليهو ميمي ماخدعتك انت براك ياحسن .. ولاخدعت روان براها .. خدعتني انا وارتكبت فيني جريمة والله .. 

الى اللقاء ..