موعد مباراة الهلال و الأهلي في دوري روشن السعودي

  

بقلم طارق اللبيب 

الحلقة 4

حسن طه اول ما طلع من عمك علي ابوروان.. اتصل على ميمي ..وقال ليها والله فعلا زي ماقلتي.. الراجل راجل ضكران ..واخو اخوان ..استقبلني احسن استقبال واكرمني .. وحكى ليها الحصل كله .. وقال ليها ان شاء الله ياميمي ربنا يبارك فيك ويجعلك دايما محضر خير لي كل خير .. ودي حاجة مابنساها ليك عمري كله ..

يلا هنا ميمي خافت خوف شديد .. وحست فعلا انها ح توقع روان في مشكلة مع ابوها .. وهي ذاتها ح تقع في مشكله ..وروان بعدين ح تمسح بيها الواطة .. 

قفلت التلفون من حسن ..وختفت توب امها .. وجري على وين.. على ناس روان ..

جاتها تناهد .. قالت ليها روان روان تعالي والله عندي ليك خبر.. خبر 

من المووووووت .. بس تديني البشارة .. 

قالت ليها احكي لي في شنو؟ 

قالت ليها طبعا زي ماحكيت ليك عن حسن .. انو قال عايزك وميت فيك موت ..

انا طبعا عشان امتحنه.. قلت ليهو اسمع يا حسن .. روان موافقة بيك ..انت لو جادي امشي لابوها .. تصدقي الولد هسي مشى لابوك في السوق وطلب يدك من ابوك؟ 

روان قامت على حيلا ..وقعدت تاني رب في السرير.. زي الزول الراسو لفه ..

قالت ليها انتي ياميمي بتقولي في شنو؟ 

قالت والله اقسم بالله زي مابحكي ليك .. 

قالت ليها طيب يا ميمي.. انا موش قلت ليك اديني فرصة افكر وارد ليك.. وقلت ليك انا ما مستعدة للحاجة دي ..

ليه عملتي كدا ياميمي؟ حرام عليك ربنا ح ينتقم منك .. 

انا ماعايزاهو الزول ده.. انا قلت ليك بحب احمد بحبوووووووو انتي مابتفهمي ؟

قالت ليها انا عملت كدا عشان عوارتك دي .. لانك ماعارفة مصلحتك .. ومترددة ...

انا اتصرفت وانتي وافقي وما ح تندمي ..

قالت ليها يابت انتي عبيطة ؟ اوافق بشنو؟ وانا حسن بعرف ليهو شنو عشان اوافق بيهو؟ .. اووووب علي.. انا هسي اقول لابوي شنو لمن يجي يسألني .. 

قالت ليها قولي ليهو موافقة .. واتصلي علي حسن واتعرفي عليهو .. لو ما نفع معاك سيبيهو تاني في شنو ؟ على الاقل علاقتك معاهو تكون في النور واهلك يكونوا عارفين ..

روان بقت تفرك في يديها وتقول حسبي الله ونعم الوكيل فيك ياميمي .. حسبي الله .. ليه ياميمي تخوزقيني كدا ؟.. حرام عليك والله حرام عليك .. 

ميمي قالت ليها والله انا أسفة حبيبتي .. عملت كدا عشان مصلحتك .. 

قالت ليها خير يا ميمي مافي مشكلة .. شكرا ليك على كل شي .. 

هسي عليك الله طيري من قدامي .. امشي اهلك ..خليني افكر اتحلا من المصيبة دي كيف .. ولو سمحتي تاني ماتتدخلي في حياتي.. انا قاعدة اتدخل في حياتك؟ حصل يوم سألتك حبيبك منو؟ .. ولا علاقتك بمنو؟ 

انتي بتدسي علي ابسط الامور... وبتدخلي في ادق تفاصيل حياتي .. ليه كدا يا ميمي؟ .. انا ماعافيه ليك..

والله غايتو اليوم داك روان ردمت ليك ميمي دي ردم انا ذاتي انفشيت ..

ميمي قامت طلعت ولازعلانة من كلام روان .. بالعكس حست انها طلعت من الورطة باسلم الطرق .. 

حاج علي جاء العصرية كدا ..قريب المغرب للبيت صلى المغرب ورقد ونادى على روان .. ياروان؟ ياااابت.. نادي امك وتعالي .. 

وروان قلبها شحححححححححح 

جاته 

قال ليها حسن طه ده منو وبتعرفيهو من وين؟ .. 

قالت ليهو والله يا ابوي .. يوم مشيت مع ميادة بت جيرانا.. تصلح شاشتها في السوق العربي .. والزول ده سيد المحل .. اصلا ما اتكلم معاي .. صلحنا الشاشة وجينا .. قام ضرب لي ميادة .. قاليها انا عايز البت دي ..

الحقيقة انا قلت ليها.. لو عنده موضوع يمشي لابوي ..مابقدر اتكلم معاهو من ورا ابوي .. لكن بالجد يا ابوي الزول مابعرف عنه حاحة .. بس خليتو يجيك عشان تقييمو و تكون عارف علاقتي بيهو اذا وافقت ..

قال ليها يسلم عقلك يا روان والله انتي توزني بلد ..

مافي مشكلة انا الزول ده قلت ليهو تدينا فرصة نشاور اهلها ونرجع ليك.. يعني لسع ما اديتو كلمة .. 

انتي شوفي لو الزول ده بنفع معاك .. يبقى انا اشاور اعمامك الاتنين.. ولو مانافع معاك نحسمو بدري بدري ..

قالت ليهو تمام يا ابوي.. الله يخليك لي دايما معاي سند .. 

امها قالت ليها حسن ده منو كمان ياروان ؟ قالت ليها بحكي ليك هسي يا امي تعالي.

بعد ابوي عرف ..تاني بحكي ليك ولاخواتي تمام؟ 

وقامن مشن هي وامها .. 

 وروان بذكاها وفطنتها .. قدرت حلت الموضوع براحة بدون ما تدخل صاحبتها في مشكلة مع ابوها ..

اليوم داك روان زعلانة من ميمي زعل مبالغ فيهو .. ومغيوظة منها بطريقة غريبة .. لمن قلبها مسخن .. 

من الصباح تاااااني ميمي جات .. وتضحك من الباب .. روان حبيبتي ..عليك الله ماتزعلي مني.. انا فكرت فعلا لقيت نفسي غلطت .. لكن انتي قلبك كبير.. عليك الله تسامحيني حبيبتي .. 

قالت ليها ماااااامسامحاك .. انتي ليه ياحيوانة تعملي كدا؟ .. 

المهم انا الموضوع حليتو مع ابوي .. لكن زولك ده انا ماعايزاهو نهائي .. كلميهو .. قولي ليهو الزولة دي رفضت.. 

ميمي قالت ليها اقوليهو رفضت كيف؟ وانا قلت ليهو وافقت .. 

يازوله اضربي ليهو انتي.. قولي ليهو انا ماعايزاك.. وقولي ليهو ميمي كذبت عليك.. ودخليني معاهو في مشكلة عشان ترتاحي ..

ياروان الله يخليك.. ادي نفسك فرصة مع الزول ده .. احتمال تلقي فيهو الزول العايزاهو .. ولو مانفع معاك مافي زول جابرك عليهو .. انتي مالك راسك قوي كدا .. 

قالت ليها ياميمي ؟؟ انتي ليه مصرة تشربكيني في الزول ده كل الاصرار ده ؟ والله انا لمن استغربت فيك .. انتي قالو ليك لو انا اتزوجت الزول ده انتي بتدخلي الجنة؟ 

(جنة شنو يا روان ميمي عايزة الايفون بس ..ههه)

ميمي قالت ليها لاني انا عايزة مصلحتك وعارفة الزول ده احسن ليك من احمد الاهبل الاحمق داك .. الماقدر حبك ..

روان قالت ليها لووووسمحتي ..ماتتكلمي عن احمد بالطريقة دي .. والله انا لو فتشت الدنيا دي كلها مابقى زي احمد ..

لكن اقول ليك حاجة .. انا ح أدي نفسي فرصة مع حسن واتواصل معاهو بس عشان زول جادي وماعندو لعب ولا لف ولادوران .. ومشى عدل لابوي .. ماعنده ذنب انا بالجد ح اديهو فرصة .. 

حتى لو عطلت قلبي واتعاملت معاهو بالعقل ..اديني تلفونو .. 

ملتها التلفون بتاع حسن .. وروان سجلته عندها في تلفونها .. وقالت ليها بعدين بتكلم معاهو براي ..

ميمي قالت ليها اتكلمي معاهو هسي عليك الله خليني اسمع .. 

روان قالت ليها يابت انتي اكيد ما طبيعية .. انتي حاسة انك امي ولاحاجة؟ .. ليه يعني التحكم والسيطرة دي منك في حياتي؟؟ ..

ميمي قالت ليها خلاص خلاص ..انا اااااسفة.. بس عليك الله اتكلمي معاهو حلو .. والله الزول ده طيب واود حلال ..

روان قالت ليها انتي الزول ده مدام عاجبك كدا ماتعرسيهو انتي؟ 

قالت ليها بس هو قال دايرك انتي .. والله لو قال دايرني انا.. ما اتردد ولا لحظة ياخ زول رهييييييييب ..

قالت ليها خير يا ميمي خير ان شاء الله مايحصل الا الخير .. 

بس انتي اختيني خليني اتصرف براي.

اليوم داك كله روان تحضر في كلامها البتقولو للزول ده عشان يحل عن افكارها ويبعدد من طريقها .. 

وبراها تتكلم .. تقول .. ح اقول ليهو انا بحب لي واحد .. وماقادرة انساهو .. 

انا مابقدر اسعدك انا قلبي مامعاي مع احمد .. انا ما ح ادس عليهو ولا ح ابدا معاهو علاقة بالخداع والغش .. 

المهم بالليل كدا روان دخلت غرفتها وقفلت الباب واتصلت علي حسن طه . 

الوو ..

قال ليها الو مرحبا عليكم السلام..

قالت ليهو حسن كيفك انا روان ..

قال ليها يا اهلا ياهلا ياهلا ياروان البت الجميلة الانيقة المهذبة .. 

كيفك وكيف صحتك ؟ 

قالت ليهو بخير الحمد لله كويسة .. 

قال ليها والله اليوم ده اسعد يوم في حياتي انا مااااامصدق نفسي .. 

قالت ليهو الله يبارك فيك .. 

قال ليها والله تصرفك بتاع انك ما تتكلمي معاي.. الا انا امشي اقابل ابوك ده.. تصرف انا احترمته فيك لدرجة ماتتخيليها .. بالجد انتي ياروان الزيك نادر في الايام دي ..

ياسلام عليك ياخ .. 

بالمناسبة والله انا اول ماشفتك قلت دي البت الانا بفتش عليها عشان تكون شرفي وعرضي وست بيتي .. 

ياما شفت قبليك بنات .. اشكال والوان بس ياخسارة مافي واحدة فيهم بتشرف الواحد ..وتكون بنفس مواصفاتك.. انتي انتي زولة مكملة . و الكمال لله ..

وررررر ورررر .. زول حناك بطريقة غريبة . ولسانه حلو ..

روان ماقدرت تتكلم اتبكمت.. بس تسمع في الكلام .. حتى الكلام الجاية تقولو ليهو ماقدرت تقولو ليهو ..

بس شغالة ليهو.. ده من ذوقك .. تسلم .. الله يبارك فيك .. 

المهم في النهايه قال ليها ان شاء الله نتواصل ونتلاقى وتتعرفي علي اكتر. قالت ليهو ان شاء الله..

قفلت منه التلفون وراسها شاطب ..

طبعا الكلام الجميل ده اسعدها جدا .. كانه كان بداوي في جراح خفية وطبطب على روحها الحزينه..

بس فجأة تتذكر احمد وتتلاشى عندها الارقام..

وبقت تحاسب في نفسها..تقول انا هسي اتصلت عشان اصارحه بالحقيقة .. ليه ماقدرت؟؟ 

الزول ده والله زول كويس.. وكلامه زي الشهد ..

بس انا مابقدر احبو يا اخواني .. دي شنو الورطة الوقعنا فيها دي؟ ..

طيب لازم انا اكون واقعية ..بكرة ح اصارح الزول ده .. يختاني ..و اتصل علي احمد مباشرة واحاول الاقيهو عديل..

ـــــــــــــــ

المهم حسن اتصل تلفون علي ميمي يبشرها قال ليها روان اتصلت علي امبارح بالليل واتكلمنا وعبرت ليها عن الجواي .. 

ميمي قالت ليهو اها ..وروان قالت ليك شنو .. 

قال ليها والله ياميمي الزولة دي شكلها خجولة.. ماقالت شي.. بس شكلها اتقبلت الموضوع بصدر رحب.. والامور مشت على خير الحمد لله .. 

قامت ميمي ..بروحها الشريرة .. اتصلت على احمد ..

قالت ليهو كيفك يا احمد .. ان شاء الله كويس .. والله يا احمد انا كنت عايزاك لي روان صاحبتي .. بس انت خذلتني..

وهسي روان ماشاء الله خطبوها .. من ابوها والكلام بقى رسمي ..

قال ليها ماشاء الله ده منو صاحب الحظ ده ؟

قالت ليهو واحد معاكم في السوق عندو محل تلفونات اسمه حسن طه .. قال ليها ياسلام ياخ حسن والله يستاهلا وتستاهلو انا اصلا ماعندي نصيب في الطيب .. 

ربنا يوفقهم ويتم ليهم على خير .. 

ميمي عايزة تقطع اي حبل امل بين احمد وروان. عشان روان تاني مايكون عندها قبله غير حسن طه.. 

.....

وبيجاي روان مصممة انها تنهي موضوعها مع حسن .. شوف الشربكة دي .. 

لكن روان ماقدرت تتصل علي حسن .. عشان تنهي الموضوع .. لسانها ملجم شديد .. شخصية روان شخصية مختلفة شوية ,, مابتحب تجرح زول وزولة حساسة شديد .. ومابتحب زول يتأذى بي سببها .. وخجولة ومابتقدر تدافع عن نفسها 

ــــــــــ

.. غايتو قررت تكتب رسالة لي حسن وترسلا وخلاص اليحصل يحصل 

كتبت رسالة كالاتي.. 

العزيز حسن تحياتي.. بصراحة ياحسن انا في زول في حياتي.. والمرة الفاتت من اتصلت عليك انت فاجأتني بالكلام .. وماقدرت اصارحك.. هسي انا والله قدر ما حاولت اكوّن مشاعر تجاهك ماقدرت .. ف مابقدر اواصل معاك والله .. 

وقفت تعاين للرسالة عشرة دقايق ماقدرت ترسلا .. في النهاية غمضت وداست ارسال.. وبقت تلوك في ضفورها مقلقة من ردة فعل الرسالة على حسن طه ..

حسن رد ليها بعد ربع ساعة ..

اسمعي ياروان والله انا مقدر صراحتك .. لكن بس طلب اديني فرصة احتمال تغيري رايك .. 

ردت ليهو طوالي قالت ليهو والله مابقدر ياحسن اعفيني الله يوفقك ..

..

رد ليها : جدا ياروان خير ان شاء الله.. خلاص اديني تلفون ابوك عشان انا طلبتك منه 

ردت ليهو : جدا . بس ماتقول ليهو السبب الله يخليك .. 

قال ليها ابشري ..

رسلت ليهو رقم ابوها .. وطوالي اتصل عليهو .. السلام عليكم ياحاج علي ..

انا حسن الكان جيتك في الدكان وطلبت منك يد بنتك روان ..

قال ليهو مرحب بيك يا ابني .. اتفضل ..

قال ليهو والله ياخال انا وروان ما اتفقنا .. وعلى حسب ما انا جيتك وطلبت منك .. قلت اديك خبر بالحاصل .. 

قال ليهو خير ان شاء الله .. الفيها خير ربنا يسويها ..ربنا يقسم لك اخير منها .. 

والموضوع كدا انتهى .. 

روان لمن نهت موضوع حسن حست بي راحة غريبة انه كان فوقها جبل وانزاح ..

وقالت بكرة انا ح اتصل على احمد واهين كرامتي واقول ليهو انا عايزاك .. 

وهي ماعارفة العملته ميمي بوراها..

وتعال شوووف

الى اللقاء