موعد مباراة الهلال و الأهلي في دوري روشن السعودي

  

بقلم طارق اللبيب 

الحلقة 10

 طبعا الشي البديهي انو روان .. لمن سمعت الكلام ده من امها خافت جدا .. واتقفلت قدامها السبل وفعلا زي ماقال القائل ..

احسم امورك قبل ان تغدو محالا .. واقطع عوائقك الصغار صغارا..

ودا بالضبط الحصل على روان .. اتهاونت بالموضوع في بدايته .. وحست انها ممكن تتماشى مع بابكر وامورها تسلك.ز  لكن بمرور الوقت حست انها مخنوقة وماقادرة .. ودايرة تتراجع بعد فوات الاوان ..

روان سكتت مسافة ..وقالت لي امها خلاص يا امي ماتكلميهو .. انا بتم الموضوع اتوكلت علي الله .. عمل شنو شكلها دي قسمتي ..

امها قالت ليها ده كلام العقل  .. والله ان شاء الله ما ح تندمي على بابكر .. روان شالت نفسها كدا .ز وقامت مشت صلت ودعت انو ربنا يثبتها وتقدر تتماشى مع الموضوع .. 

المهم قررت انها تضحي بقلبها وبحبها . عشان كلمة ابوها ورضاهو .. والايام مرت .. لكن ذكريات احمد مازالت تطاردها ليل ونهار .. 

واحمد بي غادي عندو قصة قائمة بي ذاتها ..

الحصل في الايام الفاتت دي .. انو ليمياء بت الترزي مالقت الموافقة من امها ابدا في موضوع احمد .. وكل ماتجي تفتح ليها الموضع تقول ليها عمتك حاقدة وبتاعة دجالين .. وح تعمل ليك السحر وتقلب ليك حياتك جحيم .. 

المهم في يوم من الايام .. ليمياء قالت لي امها..  انا ماشة مع صاحبتي لتخريج اختها .. 

وطلعت من قبل الضهر مشت وين ؟ مشت ام درمان  العباسية ..لي ناس عمتها ام احمد ..

دخلت عليهم وسلمت طبعا .. كلهم عارفين انو احمد اتكلم معاها ..  اروى و امها وبقية افراد البيت .. كلهم عندهم خبر بالموضوع . 

 ام احمد اسمها (اقبال النور) شقيقة عبدالرحيم النور الترزي ابو ليمياء .. الاكبر منه مباشرة .. وبتحب اخوها حب مبالغة ..  لمن جات ليمياء داخلة البيت ..ام احمد  سلمت عليها سلام بالأحضان والقبل .. وقالت ليها انا بشم فيك ريحة اخوي الحبيب .. يشهد الله انا بريدك وبريد امك زي عيوني .. 

امك المراة الفاضلة..  مما دخلت علينا ماشفنا منها شين .. والله يا ليميا من يوم احمد قال دايرك .. انا الفرحة مالية قلبي ..

انا بعد يعرسوك ح اقعدك معاي في بيتي ده .. واجيب لك خدامة تخدمك .. وانتي تقعدي زي الملكة .. ابرة في خيط ماتسويها .. انتي هينة ولاهينة؟ انتي بت عبد الرحيم النور اخوي انا .. 

قالت ليها طيب ياعمتي .. لو أحمد قعد معانا في الحاج يوسف مالو ؟ عشان ما نخلي امي براها .. 

قالت ليها مافي اي مشكلة..  امك ياها امو .. والبيت  بيت خالو ماهو غريب .. اكتر حتة انا بطمن عليهو فيها بيتكم .. ومع امك المراة المبروكة الله يطول في عمرها .ويديها العافية .. 

ليمياء طبعا راسها ضرب شديد .. 

كيف انو امي بتتكلم عن عمتي زي الكلام الفارغ ده..  وعمتي ماعارفة حاجة .. وبتحبها قدر ده..  سبحان الله .. طبعا ليمياء بت الترزي..  حست باحساس مر خلاص..  اول مرة تحتقر امها في دواخلها..  وده اصعب احساس انو ظنك يخيب في احد والديك..  ان شاء الله ما نجربو ولايمر علينا .. 

المهم ليمياء قاعدة مع عمتها.. من النهار لغاية قريب المغرب..  اتونست معاها..  وضحكو وفرحو بيها شديد.. وقالو ليها نحن منتظرين منكم انتي واحمد تحددوا المواعيد..  عشان نفرح بيكم .. اهااا في القعدة الجميلة دي ..

ليمياء حكت لعمتها اقبال حكاية .. 

قالت ليها عارفة ياعمتي..  عندي صحبتي .. كانت مخطوبة .. وخطيبها قعد يتشاكل معاها ..ويعمل ليها في حركات .. زي القنعان منها .. وكم مرة قال ليها نحن لازم نفترق .. قامت صاحبتي دي مشت لشيخ .. يعمل ليها حاجة عشان يرجع ليها زي زمان .. لكن الشيخ ده اكل قروشها ..وماعمل ليها اي حاجة .. 

هسي وصتني ياعمتي  قالت لي ياليمياء شوفي لي شيخ..  يكون كارب.. يرجع لي خطيبي..  عشان يبقى معاي زي زمان .. انا سألت امي..  امي قالت لي مابعرف اي شيخ بعمل حاجات زي دي  .. وشاكلتني ..

عمتها قالت ليها .. ياسلام علي امك المراة الفاهمة .. اسمعي ياليماء هووي اوعك من الكلام الزي ده..  ده كلام حرام وكفر.. وتفقدي دينك تموتي كافرة .. اوعك تسمعي كلام صاحبتك وتبري الدجالين .. 

الدجالين اول حاجة بضروك.. ويسلطوا عليك شياطينهم .. وبعدين ربنا مايقبل  منك صلاة اربعين يوم .. 

نحن زمان كنا ساكنين في بيت  في العرضة ..جارتنا كانت مراة بتاعة دجالين وبتاعة ظار وبخورات .. والله يابتي رحلنا من البيت عشانها ..وخلينا ليها الحتة الوقت داك أولادي  ديل صغار .. انا اولادي ربيتهم على الدين والتوحيد والتقوى .. وانتي بتي اوعك تبري الكلام ده بضرك..

قالت ليها حاضر ياعمتي .. والله كلامك مابنزاد .. 

وطبعا القصة الحكتها ليمياء لي عمتها دي.. قصة مفبركة ومكذوبة .. بس هي عايزة تعرف..  هل عمتها عندها علاقة بالدجالين والمشعوذين ولالا؟؟

 ..ومن هنا ليمياء عرفت انو عمتها اقبال ام احمد.. بريئة من اتهام امها .. براءة الذئب من دم يوسف عليه السلام ..

لمن ليمياء خلاص عايزة تطلع تمشي الحاج يوسف .. احمد وصل واتفاجأ بوجود ليمياء معاهم في البيت .. سلم عليها وقال ليها والله شقة غريبة ياليمياء .. اللية الكنس ليك الطريق منو؟ 

قالت ليهو وانت مالك؟  بيت عمتي واجي زي ما اجي .. 

قال ليها طيب ليه ما اتصلتي علي؟ كنت  اجي اسوقك وارجعك .. قالت ليهو اتصل عليك ليه؟؟  انت هسي ليك تلاتة ايام لابتتصل علي لابترد علي مكالماتي .. بس وقتك كلو (مشغوليات.. ياليمياء مشغوليات يا ليمياء) .. صراحة انا زعلانة منك ..

امها قالت ليهو عليك الله يا احمد ياولدي بت زي دي .. زي الالماسة .. دحين تخليها لامن تلومك .. والله كان انا في مكانك الصباح اصبح عليها والمساء امسي عليها .. قال ليها صدقتي ياحجة .. لكن انتو تتكلمو ساي ماعارفين الحاصل ..

وقبل علي ليمياء قال  ليها حقك علي يا ليمياء..  والله الفترة الفاتت دي الشغل كان ضاغط..  لكن خلاص في الايام الجاية دي انا بكون فري ان شاء الله..

قالت ليهو ان شاء الله  .. نشووف ..

المهم يا احمد هسي انا ماشة..  والله قاعدة من النهار ماتقول كراعك حارة وبتاع .. اصلا انا طالعة من قبل ماتجي .. 

قال ليها ماشة الحاج يوسف براك؟  والحتة ماشة مضلمة؟ قالت ليهو مافي حاجة الحمد لله البلد امان .. قال ليها وين أمان يابت؟ انتي ماسمعتي  ب9 طويلة ولعنة الأمن المفقود ؟؟ وخاصة البنات .. الواحدة بنتلو منها الشنطة لامن تقع على خشمها..  احتمال تموت .. وشايلين سواطير .. والحكومة زي الماعارفة حاجة .. عاملة اضان الحامل طرشا ..

عمتها قالت ليهو بري يا يمة .. ربنا يسلمها بنيتي .. امشي وصلها وتعال .. احمد قال ليها 

اصبري ياليمياء .. اكب لي موية فوقي..  واغير وامشي اوصلك ماااابتمشي براك .. 

قعدت انتظرت .. لمن بقى جاهز وشرب ليهو كباية شاي سادة كدا .. وقام معاها ركبت معاهو .. وبدت تتونس معاهو .. وتسأل فيهو وهو بجاوب ليها على قدر السؤال .. 

قالت ليهو انتي اصلك كدا يا أحمد ولا بس معاي انا؟ قال ليها مالي يعني اشرحي اكتر ..

قالت ليهو لابتتونس معاي لا بتعبر لي عن مشاعرك.. انت اصلك اتقدمت لي ليه ؟ انت اصلا حبيتني ولا حنيت علي؟؟ يعني  لقيت ابوي مات وماعندي زول بقيف معاي.. قلت البت المسكينة النلمها ؟

قال ليها ابدا والله ياليمياء .. انا اعجبت بيك .. واعجبت بي ادبك والتزامك وزولة صادقة .. وحقانية وانا عرفتك كويس في فترة العزاء .. عشان كدا .. لكن قصة المشاعر دي بتجي بالمعاشرة بين الناس ..  

كدي هسي انتي اتأخرتي علي في رد امك..  لسع ماكلمتيها؟؟ 

 قالت ليهو مالقيت الفرصة المؤاتية عشان اقول ليها .. بس يعني انا يتخيل لي ماعندها مانع .. وهي ترفض ليه يعني مثلا؟ .. ح تلقى راجل زيك وين لي بنتها ..

قال ليها طيب ياخ قولي ليها عشان انا ابدا في تجهيزاتي ناس البيت اكلو لحمي ..

قالت ليهو ايوة شايفاهم مستعجلين اكتر منك .. لكن ان شاء الله انا يومين تلاتة بالكتير اسبوع .. بتكلم مع امي واجيك بالخبر الاكيد ..

بعدن  اسمع يا أحمد..  انا ماكلمت امي قلت ليها ماشة ناس عمتي .. عليك الله احفظ سري .. لاني لو قلت ليها ماشة ليكم .. ح تخت في راسها 600 سؤال .. وبعدين تقول لي براك مشيتي ليهم ..

احمد قال ليها انتي قلتي ليها ماشة وين طيب؟ .. 

قالت ليهو .. انا قلت ليها ماشة تخريج اخت صاحبتي .. قال ليها يازولة ماتشيلي هم .. كضبي وانا بكضب معاك المشكلة وين؟ ..

قعدت تضحك .. 

المهم وصلو البيت في الحاج يوسف..  وامها سلمت على احمد سلام ميتان كدا .. وقالت ليها انتو اتلاقيتو وين؟ .. ليمياء قالت ليها انا ضربت لاحمد يجي يوصلني يا امي .. مالقيت مواصلات واهو جابني .. 

قالت ليها بارك الله فيهو والله انا شلت همك ياليمياء ..

احمد اخد ليهو قعدة بسيطة كدا .. وقام علي حيلو ودعهم  وفات .. لمن هو عايز يطلع خلاص .. ليمياء قالت ليهو قول لي عمتي انا في اليومين ديل بجيك .. قال ليها حاضر ..

امها قالت ليها قلتي شنو؟ 

قالت ليها زي ماسمعتي يا امي .. انا ماعايزة اقعد معاك تاني .. انا ماشة اقعد مع ناس عمتي .. ولعلمك يا امي .. انا ح اتزوج احمد ود عمتي وانتي ماعايزاك ماتجي لزواجي .. انا عمتي بتجهزني لولدها .. من بكرة بمشي ليها وبكلم عمي يكون وكيلي .. ويعقد لي وانتهينا ..

قالت نان ماكضابة .. منو انتي البتمشي ؟ قالت ليها طيب ح تشوفي .. 

امها هنا حست بالخطر .. فعلا لانو ليمياء بقت تتكلم بزعل وجدية .. 

قالت ليها كيف يعني تتزوجي من دون امك ؟ الناس يقولو فيك شنو؟ كمان في بت تخلي امها وتمشي تتزوج في بيت عمتها..  وعمتها منو ام العريس .. ماشاء الله على الفهم ..

قالت ليها انا ماشغالة بزول .. دي عمتي اخت ابوي .. يعني مازولة غريبة اخت ابووووووي 

وام العريس خليها تبقى ام العريس يعني شنو؟ 

انا لمن امي ماتحترم اختياراتي .. وتشتغل معاي بالدكتاتورية .. انا زولة واعية وكبيرة .. وعارفة مصلحتي..  ودي حياتي وانا مخيرة فيها .. اختار الانسان العايزاهو .. موش انتي قلتي لي لو عايزة تعرسي ود عمتك .. انسي امك؟ 

خلاص اتفقنا نسيتك..  وماعايزاك تحضري عرسي .. ولوعايزاني ما اعتبرك  امي برضو ممكن اعتبرك ما أمي .. وامشي اتزوج .. ولاتعرفي حاجة .. وليمياء بتتكلم بكل جدية وزعلانة شديد من امها .. 

امها قالت ليها لالالا .. انتي الليلة ماطبيعية .. انتي من الله خلقك ما اتكلمتي معاي بالاسلوب ده ... الحصل ليك شنو يا ليمياء؟؟  انتي اكيد ماطبيعية .. 

قالت ليها طبيعية..  لكن قسمتي انو امي بتصدق الدجالين .. وتتهم اهلي انهم بعملو السحر .. وتصدق كلام الشياطين..  وتقيف قدام سعادتي بسبب الخرافات .. دايراني اعمل شنو اسمع كلامك؟ .. لا والله دي مابعملا ليك .. 

قالت ليها والله يا ليمياء تتصرفي كدا انا الا انتحر .. واموت ليك قدامك .. واريحك مني .. 

قالت ليها يا امي دي حياتك وانتي مخيرة فيها .. عايزة تنتحري والله مابسألك .. موش انتي قلتي لي امشي جيبي صبغة واشربيها ؟ 

انتي زاتك ممكن تعملي الحكاية دي .. والحي الله .. بس انا مابتراجع .. مابتراجع .. ابوي مات وشفتو قدامي .. المشكلة وين تموت امي او اموت أنا مافرقت تاني تاني بعد ابوي .. 

قالت ليها خلاص ياليمياء اصبري لبكرة بنتفق .. قالت ليها ما ح نتفق .. حتى لو واقفتي على العرس انا ماعايزاك تحضري عرسي .. لانه بحضورك انتي ربنا ما حيعدلها علي .. عارفة ليه؟ .. لانك متهمة انسانة بريئة ..بسبب كلام الشياطين والدجل .. 

انا ما ح اقعد معاك تاني في البيت ده دقيقة..  بس تصبح لي الواطة والملم هدومي ديل .. والله تاني بعينك ماتشوفيني ..

امها تعاين ليها ومطيرة عيونها مستغربة في الزولة البقت عدائية لدرجه لاتوصف ..

طبعا ام ليمياء عنيدة وشرانية لدرجة اصلا ماتتصور .. وهسي نوت على حاجة لاتخطر على بال .. 

مشت خلت ليمياء في حالتها ديك ودخلت غرفتها اتصلت على احمد .. في الليل داك .. سلمت عليهو ورد عليها السلام ..

قالت ليهو يا احمد انا عايزة اقول ليك حاجة مهمة واسمعني كويس .. 

طبعا ليمياء كلمتني بموضوعكم ده .. انك اتكلمت معاها في موضوع الزواج وكدا .. 

والله يا احمد انا ماقبلانة الموضوع ده .. ودي بتي وانا مخيرة فيها .. مافي زول ولدها معاي .. انا ماعايزة معاكم نسب .. الشي الوحيد البربطنا بيكم خالك .. وربنا اختاره ربنا يرحمه خلاص .. 

فالشي البطلبو منك..  حاول اقنع ليمياء دي براحة كدا..  انو الموضوع ده ما ح يتم..  وما عايزاها تعرف انو انا اتصلت عليك..  وقلت ليك كدا عشان تحقد علي..  انت عارف لو البت حقدت على امها ربنا بنتقم منها .. 

واحمد ساكت يسمع فيها .. وهي تتكلم وتتكلم .. انا ماعندي استعداد اخسر بتي .. واخليها تعرس وتقعد في بيتكم .. 

الموت اهون لي من انو ليمياء تتزوجك انت بالذات .. وماتسألني تقول لي السبب شنو ؟.. بس انا مابدوركم .. ماعايزة اختلط معاكم نهائي..  ولاعايزة بتي تكون ليها بيكم علاقة .. وتاني لو اتصلت عليك..  وقالت ليك تعال لي في الحتة الفلانية اصلك ماتجيها ..

بتتكلم وبتتكلم في التلفون وفجأة اتلفتت لقت ليمياء واقفة في باب الغرفة تسمع فيها سمعت كلامها مع احمد كله .. 

الى اللقاء ..