موعد مباراة الهلال و الأهلي في دوري روشن السعودي

 

بقلم طارق اللبيب 

الحلقة 9

قالت ليهو عليكم السلام بابكر .. كيفك اليوم .. ولا سلمت عليهو في يده .. نظام بقت مابتصافح  وكدا يعني .. 

بابكر قال ليها والله تمام .. 

ماشاء الله .. انتي خلاص ح تلبسي كدا ولا تجربة ساي ؟ 

قالت ليهو ابدا ماتجربة انا ح البس كدا ان شاءالله .. قال ليها ده كلام جميل ربنا يوفقك .. بس ماصعبه عليك الحاجة دي؟  .. 

قالت ليهو ابدا الحمد لله انا مبسوطة شديد بس ادعو لي كلكم ربنا يثبتني عليهو ..

بابكر ملامحو اتغيرت وظاهر انو ماقبل الموضوع ده لكن ماعايز يتكلم قدام الحاج والحاجة .. قام عمك علي قال ليهو والله يا بابكر انا قلت ليها شاوري بابكر قبل ماتلبسي كدا .. لانو اي شي في حياتكم لازم يجي بالتراضي ..

بابكر قال ليهو لالا ياحاج مافي مشكلة .. لكن انا شايف مافي داعي انها تغطي وشها .. لابسة طويل ومستورة .. لكن انا شايف الشي ده صعب عليها .. عمك علي قعد يضحك وقال ليهو والله زي كلامك انا اقلت ليها مالك كاتمة الهواء من روحك .. لكن في النهاية دي حياتها وراحتها ..وهي اصلا ما اتلكمت ساكتة ساي وقاعد في طرف السرير الهناك داك .. 

بابكر حاول يغير الموضوع .. وبقى يتكلم مع عزوز .. قال ليهو يا خينا انت موش نحن عندنا مواعيد انا عازمك سمك .. 

قال ليهو ايوة لكن لسع المواعيد يوم الاتنين .. بابكر قال ليهو عفيت منك انت متزكر والله انا قلت ليك كدا لاني ناسي اليوم .. 

المهم بابكر ماقعد كتير .. وقال ليهم انا بمشي .. حاجة سلمى قالت ليهو شنو يابابكر مامن عوايدك .. الشاي ماداير تشربه .. قال ليها والله عندي مواعيد مع زول .. ضروري .. غاشيهو هنا في البيت خايف امشي القاهو مافي داير اصلو في الزمن بالضبط.. 

بابكر قدر ماحاول يخفي شعورو انو متضايق ماقدر لكن ما اتكلم سكت ساي .. لمن طلع منهم تقريبا اذان المغرب كان بأذن .. 

عمك علي طلع للمسجد شاف عربية بابكر واقفة قدام المسجد .. ولمن دخل المسجد شاف بابكر صلى المغرب وطلع سريع ..

عمك علي لمن جاء راجع من الصلاة .. قال ليها يا روان انتي موش قلتي .. بابكر مابصلي قالت ليهو ماشفته ركع يوم ..

قال ليها هسع مع انو طلع مستعجل .. لقيتو قدامي صلى في المسجد وطلع .. قالت ليهو والله سبحان الله احتمال بدا يواظب عليها والله كويس .. ربنا يثبته .. 

روان بدت تفكر .. وراسها اتملا .. الزول ده بدأ يصلي .. وماعنده مانع في النقاب .. الزول ده معناها بتغير .. لكن انا اقدر احبو كيف؟ .. والله لو انا اتزوجته بالطريقة دي بكون ظالماهو جدا جدا .. 

  انا لازم اصارحه واكلمو اني ما بحبه .. لكن خايفة يكلم ابوي .. 

اها يوم الاتنين اتصلت عليهو قالت ليهو يابابكر .. انت بعدين لمن تجي البيت .. تسوق عزوز عايزة اتكلم معاك كلمتين برانا .. 

قال ليها تمام اجيكم الساعة كم؟ قالت ليهو بس قبل مايجي ابوي من السوق ..

قال ليها ماينفع لانو عزومة عزوز عشا .. لكن انتي لو عندك كلام قوليهو لي هسي انا براي .. قالت ليهو انا عايز الكلام يكون وجها لوجه .. قال ليها عادي ياخ اتكلمي ياروان ..

قالت ليهو يابابكر الكلام البقولو ليك ده عايزاك تعاهدني يفضل بينا الاتنين 

خصوصا ابوي وامي مافي زول يعرف الكلام ده .. قال ليها ..والله نكير ما اقولو ليهو .. 

قالت ليهو طيب والله يابابكر انت لمن جيت خطبتني انا قبلت بيك لاني معجبة بشخصيتك لموقفك الوقفتو مع عزوز اخوي .. 

وناس البيت كلهم معجبين بيك موش انا براي .. ولمن جيت اتقدمت لي انا استحيت ارفض انسان زيك لانك زول شهم وكريم اوابن اصول مافيك ولاكلمة .. لكن بصراحة انا قدر ماحاولت احبك ماقدرت .. بحس بيك زي اخوي . وما متخيلة ابدا انو نحن نكون في بيت واحد كزوج وزجة .. ماعارفة ليه ماقدرت كلو كلو ..

سكت مسافة وقال ليها ليه كدا ياروان؟

انا مالي؟ عيبي شنو؟ وريني انا غلطت فيك في حاجة؟ سمعتك كلمة ماياها ؟

قالت ليهو ابدا والله..  مافيك ولاكلمة وماحصل غلطت معاي في شي.. بالعكس البتعملو معاي ومع ناس بيتنا .. الرجال المتزوجين مابعملوه .. 

قال ليها طيب ادي نفسك فرصة احتمال تحبيني .. وغاية الحب بجي بعد الزواج بالعُشرة والتعامل. 

قالت ليهو والله انا قلت ليك الكلام ده .. عشان ما أظلمك معاي وبعدين تجي تلومني تقول لي ماقلتي لي ليه .؟ 

قال ليها يازولة مابلومك .. والشعور ده ما غصب .. لكن انا واثق انك بعد الزواج ح تحبيني .. 

قالت ليهو والله مااااطن يابابكر لاني حاولت كتير وماقدرت .. 

قال ليها تمام انا قبلان انو الحب يكون من طرف واحد .. انا بحبك ومامستعد اتخلا عنك .. وموضوعنا ده ح يتم وتاني مافي رجعة ..

قالت ليهو ياباكر الله يخليك قدر موقفي .. والله انا كدا مامرتاحة .. 

قال ليها والله انا لايمكن ارجع في كلمتي .. واتخلا عنك لو السماء اتطبقت مع الواطة .. الموضوع تاني ماتفتحيهو .. دي كلمة انا اديتها لعم علي وتاني مابرجع فيها الا انتو براكم ترفضوني .. 

انتي لو ماعندك رغبة في الزواج ده كلمي ابوك يتكلم معاي لانه ده كلام رجال .. والله يطلب مني اخليك بخليك .. بس لمن تكلميهو وريهو انك ماعايزاني ليه؟ وريهو العيوب الفيني ..

هسي نحن مخطوبين لينا شهر وشوية يعني العرس قرب شديد .. تجي بعد نحن خلاص بنطبع في الكروت..  تقولي لي ما قدرت احبك ؟؟ 

ده شنو ياروان كلام الاطفال ده .. 

قالت ليهو خير يا بابكر .. انا المهم كلمتك وضميري املا علي اكلمك .. 

قال ليها تمام كلمتيني وفهمت انك مابتحبيني .. انا ماداير لي منك حب .. لو الحب ماجاء منك ما أطالبك بيهو .. والموضوع ده انتهى .. 

سلام عليكم سلام عليكم والمكالمة انتهت .. بابكر كان حاسي انو روان دي ماكدا يعني ..ماعندها ليهو شي .. لكن الليلة اتأكد بمالايدع مجالا للشك .. 

روان طبعا اصابها من الغم شي لايصدق .. رافضاهو وهي ماعندها اي امل في أحمد لانو عارفة احمد ارتبط بي بت خاله .. 

لكن بس عايزة تتخلص من بابكر ده .. لان قلبها ملئ بأحمد مع انه مستحيل الوصول اليه .. 

كما قال  بعضهم ..

خلق الله الاخلاص في العلاقة في قلب الانثى..  لان قلبها لايحتمل الا رجل واحد .. ولا أخلاص في قلب الرجل لان  قلبه يتسع لعدد من النساء ..  ماعارف كلامه ده صح ولاغلط .. المهم .

المهم روان ماح تستلم وح تقاتل عشان تتخلص من بابكر حتى لو لم تحصل على احمد النقطة دي مهمة ..

بعدين لمن جاء بابكر يسوق عزوز للعزومة .. سلم وماسأل من روان .. ولاقعد كتير لقى عزوز جاهز لابس بنطلون جنز وقميص سماوي وجزمة اسبورت ومسبسب شعرو .. ومبسوط شديد بالعزومة دي وناس البيت مبسوطين جدا 

وطلعو مشو .. عمك علي وحجة سلمى .. لاحظو انو بابكر ماسأل من روان .. سلمى قالت لزوجها .. انت ما ملاحظ انو بابكر ماسأل من روان الليلة ؟ 

قال ليها بكون عشان مستعجل .. قالت ليهو ابدا مرات بجي مستعجل اكتر من كدا .. وبقعد يتلفت في البيت زي الرايحة ليهو حاجة لازم يشوفها ..

احتمال كبير تكون زعلته في كلمة او اتماسخت معاهو .. 

طوالي  ابوها ناداها .. تعالي ياروان .. انتي مزعلة بابكر ده في حاجة؟ قالت ليه ابدا ليه ياابوي في شنو؟ 

امها قالت ليها  طيب ليه الليلة جا وماسأل منك وده مامن عوايده .. قالت ليها يا أمي  الموضوع ده تٍسألوني منو انا ولاهو .. 

انا ماعارفة حاجة حتى ولاعارفاهو جاء وفات ..

روان قاعدة مهمومة ومغمومة وماعارفة تعمل شنو؟ وكتير نفسها بتقول ليها ياخي تمي العرس ده دي اصلا قسمتك .. واحمد ماح يرجع ليك .. 

ونحن لغاية الان ماعندنا اخبار من احمد وماعارفين حصل شنو في موضوع ليمياء .. وهل قدرت اقنعت امها .. ولا امها مصرة وهل كلمت احمد ولا ماحصل .. المهم لمن نمشي هناك نشوف الحاصل .. 

بابكر وعزوز بالليل جو داخلين يضحكو ويتونسوا .. وبابكر عادي ولا كأنه في شي حاصل بس برضو طلع ولاسأل من روان .. 

ومرت الايام وروان كل يوم تبكي براها وماعارفة تعمل شنو؟ 

قامت  اتصلت اختها اسمها رابعة .. ورابعة دي قريبة منها شديد اكتر من ربيعة .. واتكلمت معاها 

قالت ليها يارابعة والله انا ماعايزة اتم الموضوع ده .. ماقادرة يارابعة ساعديني ..

رابعة قالت ليها يابت انتي مجنونة ؟ كيف يعني ترفضي بابكر .. قسما عظما .. بابكر ده اي واحدة تتمناهو يابت رجالة وشهامة ووسامة وقروش تاني دايرة شنو والله الا طغيانة ساي .. 

قالت ليها طيب يارابعة قلبي ده اعمل ليهو شنو؟ 

قالت ليها اوعه يكون انتي لسه راجية احمد .. الترابة في خشمك .. 

قالت ليها والله انا عارفة احمد خطب بت خاله وتاني ماح يرجع لي لكن بس انا بابكر ده ما عايزاهو نهائي .. وخايفة ما اقدر اعيش معاهو طبيعية .. اتعس ليهو حياته ويتعس لي حياتي ..

قالت ليها طيب خليك زولة شجاعة وكلمي ابوك قبل ماالفاس يقع في الراس .. وماتترددي .. 

قالت ليها ابوي انا عارفة رايو .. لانه شايف بابكر ده ملاك ياخ ده بحبو حب اعمى ومابقبل فيهو اي كلمة وشايفو ارجل راجل في الوطن العربي ..

رابعة قالت ليها بس انتي اعملي العليك وكلميهو .. شوفي ابوي ح يتصرف كيف .. 

روان قالت ليها انا جاتني فكرة خليني اكلم امي رايك شنو؟ وامي طبعا تكلم ابوي .. بس يعرفو انو الزول ده انا ما عايزاهو .. 

قالت ليها خلاص كلميها وخليك متواصلة معاي وريني بالبحصل معاك اوكي؟ قالت ليها حاضر يارابعة .. يلا ..

والايام ماشة والعرس مواعيدو جاية جارية جري .. وجابو ليها حاجات العروس والشيلة والمال واي حاجة جاهزة .. وهي ولاشغالة بالمواضيع دي كانها هي ما العروس ..كل ما امها تقوليها دايرين نبدا لي دخان العروس تقول ليها لسه .. اصبري اصبري .. 

يوم خلاص اتصايقت وقربت تطرشق .. جابت امها وقعدتها النهار والبيت فاضي .. وقعدت تحكي ليها ووضحت ليها مشاعرها تجاه الزول ده.. وقالت يا امي عايزاك تكلمي ابوي ..يوقف العرس ده انا ماعايزاهو ..

امها قالت ليها انتي ياروان مجنونة؟ ده كلام شنو البتقولي فيهو ده؟ .. الناس ديل جاهزين من اي حاجة..  ضبايح العرس جهزوها .. وحق الصاله دفعوهو ... ةالفنان اتفقو معاهو .. وحاجاتك كلها من مجاميها جاهزة .. نحن ريحتك ستفناها في العلب .. وانتي هسي تجي تقولي ماعايزة؟؟  طيب كان ترفضيهو من أول يوم اتقدم ليك .. ده وقت ترفضي فيهو هسع ؟ هو لعب هو الكلام ده؟  .. والله ياروان تجيبي الكلام ده فوق خشمك..  ابوك يكسر ليك راسك ده .. ومالو يايمة بابكر برفضوهو؟؟  .. عريس البنيات لاحدهن .. بس انت واحدة تغيانة وشحمانة .. ولابعجبك العجب ولا الصيام في رجب..

قالت ليها بس انتي كلمي ابوي بكلامي ده..  قولي ليهو روان قالت ماعايزة العرس ده مايتم .. 

امها قالت ليها انتي عارفة ابوك لمن يزعل بعمل شنو؟ وممكن يحصل ليهو شنو؟ وانا والله لابقول ليهو ولابقول ليهو .. 

بعدين بجي واتكلمي معاهو بنفسك.. وقولي ليهو انا ماعايزة الموضوع ده شوفي البحصل شنو؟ 

ابوك بحبك انتي اكتر زول في البيت ده .. وهسي فرحان ليك فرح شديد.. لانك ح تتزوجي بابكر .. وتكوني في بيت ناس الشيخ اصحابه..  والله ابوك ماقادر يقعد من الفرحة .. نوم ماقادر نوم  من الفرحة ..فرحان ليك انتي يا الغبيانة .. والله دي تكون اكبر صدمة ليهو في حياته .. 

اول حاجة تكوني كسرتي ضهرو قدام الرجال .. واتراجع في كلمتو مع اعز رجال في حياته .. والله ابوك يموت واقف علي حيلو .. تجيهو الذبحة والجلطة .. وتاني انتي لاتنفعي دنيا ولا آخرة .. واحد في الاتنين ياتفقدي ابوك .. او اقلا شي تاني ابوك ماح يكون عندو كلمة قدام الرجال .. وانت تكوني بالنسبة ليهو اسوء مصيبة .. لو مصرة .. بعدين ابوك بجي وكلميهو براك..  واتحملي النتائج .. وانا ماعافية ليك لو ابوك حصلت ليهو حاجة .. 

اها ياجماعة بعد الكلام ده ..باقيلكم .. روان ح تكلم ابوها ولالا؟ 

الى اللقاء.