مباراة الهلال والشباب في دوري روشن السعودي

 بقلم طارق اللبيب 

الحلقة 7 

سحر المحبة

في الحلقة الفاتت اتكلمنا عن تلات اسحار اليوم ان شاء الله ح نتكلم عن سحر مشهور ممكن يكون اي زول سمع بيهو لانه سحر مغري .. سحر المحبة . والسحرة بسموه سحر الجلب .. 

سحر المحبة هو سحر يتسلط فيه خادم السحر في مشاعر المسحور وميوله .. ويكون الشعور بالحب . اقوى من المعقول .. فيتعطل معه العقل تماما ..

ويتعدى كل الخطوط الحمراء ويتفوق على حب الام والاب . والحدود والشرع .. وقد يكون اقوى من حب المسحور لنفسه .. 

 وهو من اسوء انواع السحر واخطرها على الاطلاق .. لانه يسبب فساد لايعلم مداه الا الله .. فقد يفعل لامراة متزوجة فتقع في الحرام من حيث لاتدري .. وتنجر خلف ذئب بشري من شياطين الانس بعاونه شيطان من الجن والعياذ بالله ..

 وقد يفعل لفتاة لتتزوج من لا ترغب به .. ويفعل لشاب ليتزوج من لايرغب بها .. فبالتالي العلاقة الحاصلة بتكون علاقة مزيفة وغير حقيقية .. والزواج يكون محرما .. وكل مابني على حرام فهو حرام .. والغريب في الامر ان كثيرا من الناس الذين يفعلون هذا السحر . يقولو ليك ياخي ده موضوع مصلحة.. انا عايز البت تحبني ماعندي نية ضرر .. كيف ماعندك نية ضرر .. وتسحر بت الناس عشان ترغب فيك بالقوة وهي ماعندها فيك اي رغبة .. 

عشان كدا ديل كتير جدا بقعو فريسة للدجالين والكذابين .. 

بتذكر زمان نحن في الثانوية جانا واحد ملامحو غريبة .. افريقي واحتمال اجنبي . من بعض الدول الافريقيه .  شايل ليهو شنطة قديمة كدا فيها هتش وكراكيب .. وانا واصحابي كنا قاعدين في شارع رئيسي بنتونس .. 

قال لينا انا عارف حاجة ممكن اقولها ؟ قلنا ليهو قول قال في واحد فيكم بحب ليهو بنت ..بس ما ح يقدر يصل ليها وماعارف يصل ليها كيف .. كلنا قلنا ليهو ايوة ايوة .. لاننا اي واحد فينا مكسر في واحدة من بنات الثانوي ههه .. وهن كانن مهذبات شديد ومربيات ولا بعاينن ليك لو موتا .. 

المهم كنا عايزين بس حاجة تحنن قلوبن علينا ^_^ طرطشة بتاعة شباب بس ما اكتر .. 

المهم عندنا صاحبنا اسمو فايز الله يطراهو بالخير قال ليهو .. انا بدفع ليك العايزو بس موضوعي يظبط وهنادي تتكلم معاي .. مامتأكد لو هنادي او تهاني المهم بت من بنات الثانوي كلنا بنعرفها وعارفين انو فايز عيان بيها .. 

الدحال قال ليهو اديك عِرِق محبة ..(بكسر العين والراء)  .. تلوكو .. وتمشي تتكلم معاها بدون خوف .. طوالي بتمشي وراك زي الكلبة .. 

صدق او لاتصدق ..

المهم اداهو عرق  عود كدا قدر قشة الكبريت بس غليظ شوية .. 

فايز شال العرق ودفع ليهو القروش.. وكانت قروش ماكتيرة.. لكن علينا نحن ك طلبة وجايين من الاقاليم وبنقرا داخلية . كانت كتيرة .. 

الزول شال القريشات واده فايز العرق .. زي عود كدا بس .. 

فايز وداهو علي خشمو .وشال منه حتة بسنونو .. حتة صغيررة .. ولاكها مضغها كدا وقال والله حلو حلا التقول عاطننو في سكر .. 

قلنا ليهو كويس احسن من يبقى مر .وتقوم هنادي تحرجك يبقن عليك مرارتين..  مرارة العود ومرارة الكرشه (الاحراج).. ههه 

المهم تاني يوم من الصباح فايز مشى وقف فوق درب المدرسة بتاعة البنات البجن ماشات بيهو للمدرسة .. ونحن واقفين بعيد عشان نتشمر ههه 

فايز انتظر لغاية ماجات البت .. وطلع العرق من جيب البنطلون البني .. وقضم منه حتة ولاكا وكورك ليها .. يافلانة يافلانة .. اتلفتت عليهو قال ليهو لحظة لو سمحتي .. 

البت جاتو بكل حسن نية .. قربت منه قال ليها والله انا بحبك .. بس عاينت ليهو سمح وقطعت فيهو كف .. ليهو صدى . صج... ج ..ج .ج . والله نحن لمن غطينا وشوشونا ..ههه

المهم طلع الراجل دجال وكضاب زي زولنا بتاع القناة ههه

ولكن الحق يقال 

هنالك سحر للمحبة بتسخير الجن ..

واحكي ليكم برضو منه قصة .. كنموذج لسحر المحبة الحقيقي..  

واحدة من بنات امدرمان اتقدم ليها واحد .. يعني هي حست انو الزول ده مامن مستواها لا شكلا ولا مضمونا ولاتعليم ولاغيرة .. هي من عالم وهو من عالم مختلف 

وطبعا بالضرورة انها رفضته رفض قاطع .. اتواصل معاها مرة مرتين .. وهي رافضة .. وبتضحك عليهو .. وتسخر بيهو .. و اهلها عارفين انها رافضاهو وهم كمان رافضنو ..

المهم فجأة كدا قامت يوم الصباح وقالت ليهم انا عاوزة الزول ده .. تقريبا اسمو كيمو .. 

المهم اهلها قعدو يضحكوا عليها مفتكرنها بتهظر . واصرت اصرار جادى شديد .. اهلها لمن شافوها جادة قبلو عليها وسمعوها ليك ستين كلمة فارغة .. 

قامت جاطت وشرطت هدوما وبقت تفتش للكبريتة عشان تحرق نفسها .. ودخلت في حالة هستيرية اشبه بالجنون .. 

واتصلت عليهو قالت ليهو انا بهرب معاك لو اهلي ماقبلو ..

يعني ممكن جدا تخلي اهلها نايمين وتمشي ليهو بالليل وتكون بين يديه كالميت بين يدي المغسل .. 

المهم اهلها فعلا خافو على البت من الانتحار او الهروب ووافقو علي كلامها وحصل العقد سريع واتزوجت .. وهي في الشقة قعدت تكورك وتقول ليهو انت منو والجابني هنا شنو؟ (الظاهر السحر فكه هه في اللحظة دي ) 

وبرضو قالت ليهو الا توديني اهلي .. انا مازوجتك وانت ماعرستني .. المهم القصة كانت مشهورة ..

في النهاية خلاها مقفولة في الشقة وطلع مشوار ..وجا راجع  قبل مايصل الشقه هي كانت هدأت واتلقتو ليك بالاحضان من باب الشقة .. (مشى عمل تجديد) 

بس  اهل البت عرفو انو الزول ده عمل ليها سحر ..كانو شغالين ادعية وقران .. كل مرة السحر يبطل هي توعى يمشي يجددو تاني .. بقو شغالين كدا قريب التلاتة شهور .. 

في يوم جاتهم زيارة في البيت استقبلوها عادي .. واستغلوا فرصة انها في البيت غشووها جابوها لينا في المركز .. الحمد لله ابطلنا السحر بأذن الله .و ذبحنا الخدام بقوة الله .. وانتهى الامر الى الابد .. واتطلقت منه .. واتزوجت غيره .. 

انا بستغرب في الزول البعمل سحر المحبة والجلب .. اولا الانسان الانت عملت ليهو السحر ده ما معاك بقلبه هو جسد مسلوب الارادة والروح .. فكيف انت بتقدر تتعامل مع جسد بدون روح الا تكون انت حيوان مجرد من الششعور .. الحاجة التانية الحاجة دي ما مسستقبلية لانه في اي لحظة بطل السحر .. الزول المعاك ده بفتح وبمشي منك واحتمال يكتشف انك دمرت حياتو ويرتكب فيك جريمة ..في حالة غضب .. 

.. كان في راجل متزوج وعنده اربعة اطفال .. بمشي يشرب الشاي في المحطة مع واحدة اكبر من زوجته باكتر من 15 سنة .. برضو فحأة كدا بقى يهلوس بالمراة وبعشقها عشق مرضي .. وقال لي مراتو انا ح اطلقك واتزوجها .. زوجته قالت ليهو اتزوجها بس خليني معاك اربي اولادي ..

قال ليها بس هي قالت مادايراك .. وانا مابكسر ليها كلمة هههههه 

وفعل بكل برود طلق المراة وقال ليها ماعايز الاولاد بس فضي لي البيت .. طلعت ساقت اولادها ومشت بيت ابوها الراجل اتزوج ست الشاي وجابها البيت .. والغريب انها مازالت بتعمل الشاي في المحطة وهو بمشي معاها يلم ليها الكبابي ويغسل العدة ويوزع الشاي للناس .. يعني باختصار بقى خادم مطيع مسلوب الشخصية والارادة .. 

بعد فترة من الزمن عنده اخوه جاء من السعودية .. وشاف الحاصل وقعد يبك ي عليهو وساقو جابو للرقية والحمد لله ربنا تم الشفاء .. مشى طلق المراة ست الشاي ودقاها .. وطلعها من البيت .. 

ورجع مراته واولاده لكن المصيبة ان ست الشاي كرهتو عيشتو بالمحاكم هه المهم ربنا فكاهو من السحر ..

ده تنوير بسحر الجلب والمحبة.. حقو الناس تعمل حسابها شديد ..

واعراضه .. السرحان والتوهان والعشق غير المنطقي مع الفوارق .. وتغيير القرارات بطريقة مخيفة .. والتقلب في الاراء .. ومن اهم اعارض سحر المحبة .. كراهية الاهل والزوج والاولاد .. وممكن المسحور يتخلص من اقرب الناس ليهو .. فدأء لحبيبه الساحر ..تردد في التصرفات ارتباك في القرارات وصراعات نفسية غير معلنه .. 

تتشابه كثيرا مع اعراض عين الحسد .. 

للعلم صاحب سحر المحبة لايقتنع ابدا انه مسحور .. ولو مشى مركز علاج بكون مامقتنع لا بالعلاج لا بالشيخ بس مقتنع بي الزول الرابطو ده .. لو قال ليهو اقع في النار بقع بدون تردد 

لكن في النهاية الغلبة للقران .. ولايفلح الساحر حيث اتى .. وان الله لايصلح عمل المفسدين ويحق الله الحق بكلماته ولو كره المجرمون .. 

فعلينا بالتحصين حتى لانكون عرضة لهولاء السفلة ..

لشرح الحلقة بالفيديو ادخل قناة طارق اللبيب في يوتيوب 

ولكم التحية والاكرام ..

الى اللقاء