بقلم طارق اللبيب
الحلقة 13
الاخيرة
زي ماشايفين .. بابكر اتغير 180 درجة .. كانه شخصية غير الاولى الكان دمو تقيل وغضوب واخلاقو في نخرته .. الزول الكان معترض في لبسها .. بقول ليها ده شنو اللبس المبشتن ده؟ والناس الملتزمين هم الحرامية .. والبتكلم بي عنصرية . وسبحان مغير الاحوال من حال الى حال .. الزول البشوف روان هسي مايقول دي روان قبل 6 شهور بس .. والبشوف بابكر يشوف شخصية مختلفة ..
طبعا معلوم انو المحافظة على الصلاة والقرب من الله .. تغير في اخلاق الانسان وصياغة شخصيته ..ربنا قال ان الصلاة تنهى عن الفحشاء والمنكر .. وقال تعالى .ان هذا القران يهدي للتي هي اقوم .. ربنا يلهمنا الهداية ..
المهم هسي بابكر شخصية رائعة ومهضومة .. ومريحة جدا جدا .. وحب روان متكن منه تمكن شديد .. واول يوم كان احترمها فيهو يومها الكشفت ليهو عن مشاعرها تجاهو وانها ماعندها ليهو شي عرف انها انسانة واعية وصادقة .. والمفروض مايخسرها ابدا ..
اها روان كل يوم تعاين لي بابكر .. وعطفه عليها واهتمامة وكلماته الكلها حب وحنان .. يطلع يمدحها .. يدخل يحمد ربنا عليها ..
وهي الكلام ده عاجبها شديد.. لكن طبعا الاعجاب ده جواها.. وما عايزة تظهر ليهو اي شي ..
بقت لمن يطلع تقول ليهو ماشي وين ؟ وبتجي متين؟ .. وماتتأخر .. بس هو مفتكر انها بتخاف تقعد براها .. لكن صراحة روان اتعودت على وجوده.. لانو زول مريح وبشوش كدا .. وكلامو طاعم زي العسل ..
روان بقت ما بتتذكر احمد كتير .. ولمن تتذكره.. بتذكر المواقف الماحلوة في حياتها معاهو والنقاشات .. والكلام المر الكان بقولو ليها .. وتتذكر وكيف انو اتخلا عنها ومشى خطب بت خاله .. ولاتلفون ماسأل منها .. وانو كان ممكن يصبر عليها .. ويعاملها زي معاملة بابكر دي ..
طبعا براها بتتكلم .في سرها .. قالت والله لو كان احمد حنين علي زي بابكر ده .. لو قال لي البسي شملة كان لبستها .. لكن كلامو معاي.. كلو كان اوامر .. ويقول لي شنو.. انا ماعايز في حياتي واحدة زيك كدا.. مستغل حبي ليهو .. قول ليهم في ستين ..
وقول ليهو تعال شوف الرجال بتكلمو كيف ؟ وبتعاملو كيف؟ .. انا اقتنعت انو الراجل الجد هو البخفض جناحو للمراة ويعطف عليها ..
والله بابكر لاضعيف ولا خواف انا بعرفو.. والله راجل يخوف الفرسان .. لكن معاي انا هين ولين ..
و المراة الكانت بتشكر راجلها في الجاهليه ..قالت ..
زوجي اذا خرج اسد .. واذا دخل فهد .. وانا اغلبه وهو يغلب الناس ..
يعني اذا خرج من البيت في ضراوة الاسد .. واذا دخل البت في هداوة الفهد . وانا اغلبه وهو يغلب الرجال .. بالجد ده بابكر ..
ياروان هوي.. بابكر ده بالجد ماتفرطي فيهو ..والله الزول ده يقوم يسبق الحوادث ويفاجئني بالطلاق.. انا اموت بالمغسه .. لاني بالجد مابلقى زيو في الرجال الحايمين الشافتم عيني ديل ..
روان كل مرة تحاول تجي تقول لي بابكر عن شعورها الاتغير تجاهو .. وانها قررت تكمل حياتها معاهو .. يغلبها .كلو كلو . ودي حركة من الشيطان الله يلعنه ..
كل يوم بالليل بعد يتعشو.. يجيها يقيف ليها جنب باب الغرفة .. يقول ليها تصبحي على خير يا اجمل انسانة .. وهو بتمنى انها تقول ليهو تعال نوم معاي ..جوة الغرفة ..
لكن للاسف بتقول ليهو وانت من اهل الخير ..
يمشي ينوم براهو والصباح يتعامل معاها زي المافي شي .. اصلا لازعل لا اتحسس لا زهج لكن بعد تمانية أيام تقريبا ..في مصر بالطريقة دي ..
قام يوم بابكر الصباح .. بعد صلى وجاء قعد يفكر كتير .. قام ناداها بره في الهول .. وقال ليها ..ياروان تعالي اقعدي.. اتفضلي .. عايز اتكلم معاك ..
ياريت تفهميني يا الغالية ..
عايز اتكلم معاك شوية بس .. قالت ليهو قول يابابكر انا سامعاك .. وقلبها ده شغال دق دق دق..
قال ليها .. والله ياروان . انا قعدت معاك اسبوع كامل.. لقيتك انسانة صلاية وملتزمة ومهذبة .. وزولة واجب ..وحبيتك من جوة قلبي .. وتاني مابحب غيرك ابدا .. وخدومة وماقصرتي .. في البتقدري عليهو ..
لكن صراحة انا شايف من الظلم ليك.. اني امسكك وانتي ماعندك لي مشاعر .. وانا اوفيت بوعدي معاك .. وماقربت عليك ابدأ .. المهم هسي . خلاص ياروان ح نمشي السودان.. ما ح نقدر نقعد اكتر من كدا .. مافي داعي ..
امشي اوديك بيتكم .. ونشوف البحصل بعداك شنو؟.. لانه اصعب حاجة تكون قاعد ليك مع زول وانت مابتحبه .. وانا ماعايز اعذبك معاي اكتر من كدا..
وانا حاسي بيك ضاغطة على نفسك شديد ..
طبعا روان خافت خوف شديد لمن قلبها وضربات قلبها زادت لمن قعدت ترجف ..
و ده الكانت خايفة منه انو بابكر يسبق الاحداث.. وينهي الموضوع ده وهي تندم ...
قامت قالت ليهو طيب يابابكر .. نحن موش اتفقنا على شهرين؟؟ .. وانت براك قلت كدا؟
قال ليها نعم .. لكن انا ماشايف انك مرتاحة معاي .. عشان كدا من تمام حبي ليك .. اني ما اعيشك في جو انتي متضايقة منه ..
قالت ليهو القال ليك منو انا متضايقة؟؟ بالعكس والله.. انا استمتعت في الايام دي شديد .. وصراحة الحق يقال اللقيتو منك انت.. مالقيتو من زول في الدنيا دي ..
قال ليها بالجد ياروان؟؟ يعني مامتضايقة مني؟
قالت ليهو ابدا والله .. بالعكس انت ماخليت حاجة ماعملتها.. عشان سعادتي.. انت قايل انا مامقدر الحاجة دي ؟
قال ليها انا قلت اخلي سبيلك.. احتمال تلاقي الانسان البتحبيهو .. وربنا يجبر بخاطرك .. انتي زولة ماساهلة وحظ الانسان البتكوني من نصيبه ..
روان دي فجأة كدا .. بكت بكت.. وقالت ليهو لاء لااء .. قامت جات عليهو وحضنتو بدون مقدمات.. لغاية ماهو استغرب.. وقلبو ده عمل شححححح .. ورفع يدينه كدا منها مامسكها عليهو .. زي الخايف.
قالت ليهو ياباكر امسكني عليك ..
انا ماعيزة نصيب غيرك انت ..
انا مامستعدة افقدك يابابكر ..
لوسمحت تاني ماتقول كدا ..
اول مرة بابكر عيونو تملا بالدموع .. بقى يتلفت ويرمش ودموعو دي تشتت..
قالت ليهو بالجد يابابكر انا زيك مالاقيت .. ولابلقى ..
انت والله المكسب ما أنا .. اعفي لي والله.. انا الظلمتك .. انت ماظلمتني ابدا ..
انا من امبارح كنت عايزة اقول ليك عايزاك في حياتي يابابكر... لكن مستحية وفي حاجة جواي واقفة لي ..
لكن هسي غلبني .يا بابكر بالجد انا حبيتك شديد.. وما ح اتخلا عنك..انت راجل بالجد يابابكر .. ولسع هي ماسكاهو..
قال ليها دقيقة ياروان كدي خليني اجمع.. اكيد انا بحلم ..
قالت ليهو ابيت مابفكك .. وماسكاهو من نصو كدا .. اخيرا مسكها عليهو .. وقال ليها .. الحمد لله ربنا استجاب دعواتي.. انا في كل صلاة بدعي في السجود.. انو ربنا يزرع حبي جواك .. وتنسي اي زول كنت بتحبيهو قبلي ..
طوالي فكته .. قالت ليهو انت القال ليك منو انا بحب زول تاني؟؟ .. قال ليها انا حسيت كدا .. لانو البنت قلبها مابشيل اتنين .. ومادام في راجل مسيطر على قلبك .. يستحيل تجبي غيره صاح؟
قالت ليهو صاح.. وانا ما ح اكذب عليك.. فعلا (كان) في زول مسيطر علي مشاعري بالجد ..
لكن والله يابابكر انت قدرت مسحتو من جواي باستيكة .. قال ليها اقعدي احكي لي ..
قعدت وشالت نفسها وختتو .. وقعدت تحكي ليهو عن احمد.. من بداية علاقتها بيهو والمشكلة العملتها ميمي .. وقصة حسن طه .. لغاية كلمتها القالتها ليهو (قلبي امانة عندك) ..
اصلا مادست عليهو حاجة.. ولا أخفت منه شي .. قاليها طيب يا روان .. كيف تدي زول قلبك امانه؟ بعد عرفت انو ارتبط بي غيرك ؟؟
قالت ليهو هبالة مني يابابكر.. جهل وقلة فهم ..
قال ليها طيب ..هسي قلبك وين؟ .. قالت ليهو انا قلعته منه .. ولابستاهلو ..وسلمتك ليهو انت .. والله انت تستاهل قلبي وروحي ..
لكن انا مغلولة وممغوصه من الزول ده وجواي ندم .. على اي لحظة عديتها معاهو .. لازم القى لي طريقة اتفشا فيهو .. قال ليها قولي لي عايزة تتفشي كيف؟
وانا بفشك ..
قالت ليهو أقول ليك حاجة دقيقة .. عليك الله يابابكر خليني اتصل عليهو هسي .. اقول ليهو كلمة واحدة برتاح ..
قال ليها يابت تتصلي عليهو لشنو؟ .. قالت ليهو والله ما أخليهو .. عليك الله عشان خاطري .. قال ليها خاطرك غالي عندي .. هاك التلفون .. اتصلي على جانو ذاتو..
انا معاك .. طق طق طق اتصلت علي احمد ..
وفتحت السماعة الخارجية .. قالت ليهو كيفك يا احمد؟ انا روان .. قال ليها اهلين ياروان صحتك واخبارك ..
ده رقم مصري . انتي في مصر ولاشنو؟ قالت ليهو ايوة انا في شهر العسل مع زوجي ..
قال ليها ربنا يهنيك ..
قالت ليهو بس عايزة اقول ليك كلمة واحدة يأحمد .. قلبي القلت ليك امانه عندك.. انت مابتستاهلو .. وانا لقيت الراجل البستاهلو .. فهمت ؟
احمد قال ليها يابت انتي هبلة؟؟
قلب شنو العندي؟ انا قلبك جدعتو زمان في خور ابوعنجه .. واتبادلنا القلوب انا وبت خالي ليمياء .. وعايشين اجمل ايام حياتنا ..
فشنو لو سمحتي ياتعيسه .. اقطعي وشك وتاني ماتتصلي علي هنا فاهمة؟ .. قالت ليهو فااااهمة .. وانا مابرد عليك باسلوبك لاني ماكدا ..
وقفلت الخط .. وقعدت تضحك .. وبابكر يضحك لامن عيونو دمعن وعشرق .
وقال ليها عفيت منك ..
لكن الزول ده انا لو كنت جنبو وقال ليك كلمة هبلة وتعيسة دي قدامي.. انا كنت اكلتو اكل ..
قالت ليهو ولاتاكلو ولاحاجة هو ذاته مسيخ ولا بتاكل .. عليك الله شفت اسلوبو معاي كيف؟
بابكر قال ليها والله انتي التعاسة بي جنبك ماجات.. انتي السعادة باكملها لو هو بفهم .. بس زول منحوس وماعنده حظ ..
هسي عليك الله الزيك انتي بفرطو فيها ؟
والونسة جرت ..وهم قاعدين في الهول .. قاعدة جنبو في الكنبة وخاتة راسها في صدرو وبتتكلم معاهو .. وهو كان بداعب في خصل شعرها في مشهد
في مشهد كلو محبة وحنية وعواطف تبكي الحجر ..
المهم هم الاتنين قررو يكملو عشرين يوم تاني في مصر .. ويكملو حياتهم مع بعض..ومن الليلة تاني بابكر .ما ح يبيت في الغرفة التانية الهناك ديك ..
عشان شايف روان من هسي قامت قعدت تجهز في نفسها وتتزين وقعدت قدام المراية وحضرت العطور الجايباها معاها من السودان ..
وانا هنا تاني مافي حاجة بتقعدني مع الناس ديل في مصر .. نودعهم ونمشي السودان.. نشوف الحاصل هناك شنو..
............
في ارض الوطن الحبيب حصلت في الاسبوع ده كم حاجة ,, اولا ميمي جاها عقد عمل وسافرت السعودية .. لكن ماعارفها ح تشتغل شنو هناك يا طباخة يا مكوجية .. لانها مابتعرف تشتغل شي .. والايفون الميتة بي شوقو ح تشتريهو بحر مالها ..
احمد وليمياء في علاقة وحب شديد .. وزواجهم ان شاء الله بعد تطلع اكرام ام ليمياء من الحبس .. وبالمناسبة العلاقة بين اكرام ام ليمياء وبين اقبال بت النور ام احمد بقت زي الفل .. واكرام اكتشفت انها كانت جاهلة وظالمة المراة .. لانها صدقت الدجالة الملعونة وصدقت الشياطين البفتنو بين الناس ويتهموا الابرياء بالباطل..
وانا براي اكتشفت من القصة دي انو العلاقة الفيها عناد واستكبار من الطرفين مابتنجح .. والعلاقة الفيها حب حقيقي حتى لو من جانب واحد ح تنجح .. وفي النهاية مقادير ربنا وقسمة رب العالمين فوق كلو شي ..
وانا اعتقد الابطال الحقيقين قي القصة دي تلاتة .. ليمياء بت الترزي .. وبابكر ود الشيخ .. واقبال بت النور ..
وفي النهاية نقول الاخلاق الحميدة هي التي تكسب ..
هذا ونختم بالصلاة والسلام على المبعوث رحمة للعالمين .. والذي كان خلقه القران ..
اضع قلمي شاكرا لمن قرا حروفي وساهر معي في غضون القصة.. فلو حدث مني خطأ او تقصير.. انتم اهل الكرم والمعذرة ..
لكم مني اسمى ايات الشكر والوفاء
كتبها طارق اللبيب
في رمضان 2022