موعد مباراة الهلال و الأهلي في دوري روشن السعودي

الجماعة لمن وصلو جنبنا أشرنا ليهم  .. وقفو البوكسي..

 ونزلوا.. سلمو علينا سلام عادي جدا ..

كانو مافي حاجة ..لكن كلهن شكلهم متوترين وخايفين علي بنتهم .. واحد فيهم جهامة كدا ..شكلو الكان بتكلم مع عابد  .. قال وينو فيكم محمد؟ .. 

نافخ الكير الحلقة 5 بقلم طارق اللبيب 

قلت ليهو انا محمد ..  قال لي علاقتك شنو بي صفاء؟ .. 

في عمك كبير قال ليهو يازياد؟.. هسي الكلام ده ماوقتو .. انا هنا عرفت انو اسمو زياد .وعمك الكبير ده بشبه صفاء شكله ابوها..

 قال لي ورينا ياولدي الله يرضى عليك .. انت لاقيتها وين؟ وفارقتها وين؟ والله البت دي أهلها .. لو عرفو انها ضايعة ..يملو ليكم صالحة دي .. 

قلت ليهو والله ياعم .. انا اول مرة اشوف صفاء امس  .. جات مع البت الاسمها عفراء.. وعفراء جات عشان تقابل عابد  القدامك ده ..

لكن والله صفاء جات مرافقاها فقط.. وانا اول مرة اشوفا اتعرفت عليها امبارح بس . لاني كنت ماشي مع عابد .. وحصلت المشكله الحكاها ليكم  عابد ..

انا جريت احل المشكلة ..وخليتها بعيد من مكان المشكله..

جينا بعد المشكلة ما لقيناها..

المهم يازول .. انا بعد لقيت الناس ناس محترمين وواعين.. بقيت بسأل فيهم.. قلت ليهم شفتو مراكز الشرطة؟ ..

 فتحتو بلاغ.. سالتو في المستشفيات ؟

قالو لي البلاغ مابتفتح في اقل من ٢٤ ساعه..

قلت ليهم خير .

كدي نمشي نسأل حول المكان الاتفقدت فيهو ..

قالو لي يلا اساسا نحن جاينك عشان توجهنا .. انا كنت قايلهم شاكين فيني.. لكن الناس ديل والله اتعاملو معاي باحترام .. 

ركبنا معاهم انا وعابد.. وقلت للزول المتصدر الموضوع ده وشغال اتصالات الاسمو زياد ..لغاية الان ماعارفو ببقا ليها شنو؟ 

اها قلت ليهو ..   لمن اتصلتو  علي عفرا  .. ماسالتوها عن صديقات صفاء؟

 احتمال تكون مع واحدة من صاحباتها ؟  

قال لي  ماسالناها .. قلت ليهو .. ياخي اتصل تاني واسالها .. 

قال لي ان شاء ان شاء الله  .. بس شكله ما مهتم بي كلامي ..ومتضايق مني .. على عكس الناس التانين ..

نحن طلعنا الزلط.. ماشين علي الخرطوم..

عمك البشبه صفاء .. 

كان راكب قدام جاهو تلفون .. 

ونحن يادوب .. ولا طلعنا من صالحة .

طلعو من الزلط .. وقفو العربية..  وعمك  نزل بتكلم بالتلفون نحن كلنا بنسمع فيهو بتكلم بصوت عااالي ..

 قال ايوة انا ابوها .. 

وين المستشفى دي؟ ..

  المستشفى  اسمها شنو؟

 ايوااا ..مستشفى الساحة؟

تمام جدا نحن في الطريق..

قفل التلفون وختاهو في جيبو ..

والناس ديل متوترين ومطيرين عيونهم ويعاينو ليهو ..

عايزين يعرفو الحاصل ..

وهو قال لاحول ولاقوة الا بالله.. ياجماعة صفاء بتي .. حصل ليها حادث امس..  واسعفوها لمستشفى.. اسمو مستشفى الساحة.. قالو شرق مول عفراء  ..

كانت في غيبوبة ويادوب صحت.. وادتهم تلفوني .. اتصل علي واحد من ناس الشرطة ..

والله انا جاني شعور ماقادر افسرو .. ارتحت انها اتلقت وخفت تكون حصل ليها حاجة ..

قام زياد قال لينا شكرا ليكم  ياجماعة ..انزلوا نحن خلاص لقينا بتنا..

 انا قلت ليهو والله مابنزل.. الا اصل معاكم المستشفى .. 

الجماعه التانين .قالو لي مافي داعي.. انا لمن اصريت ابوها قال.. ياخوانا خلوهو يصل ..  المشكلة وين؟ 

وانا بعد سمعت كلام الحاج .اتمهلت في الركبه .. وح اشوف صفاء .  يارب تستر عليها..

لكن عابد نزل .. 

الناس الراكبين معاي ورا ديل.. سالوني انا من وين.. وجنسي شنو.. وتحقيقات كدا .. واتكلمت معاهم بكل ادب وتهذيب .  

وانا برضو اتعرفت بيهم.. يعني الموضوع كان ابسط من ماكان في خيالي.. 

طلعوا ناس ملوك والله.. فعلا ديل اهل صفاء الشفتها ديك..

والشي العرفتو الناس ديل  فيهم ابوها وخيلانها اتنين  وراجلين من الجيران ..راكبين قدام . واتنين اولاد خالتها .. وواحد وود عمتها  .. وتلاته اربعة  شباب كدا من الجيران شكلهم  المهم .. 

لكن والله تشوف الهمة الفيهم..  تقول البت بتهم ماجارتهم  .. السايق العربية خالها الكبير .. 

 اها ود عمتها ده اسمو زياد . شكله ياهو  العايزها ..ياهو البتكلم ده ومهتم بالموضوع .. وشكله هو الضرب لعابد .  وقال ليهو نحن اخوان صفاء .

ابوها راجل طيب لدرجة بعيدة.. وفي شبه غريب بينو وبين بنتو .. والله في الضلمة تعرف انو ابوها .. 

المهم مشيت معاهم المستشفى ولاقانا بتاع الشرطة برة.. وحكى الحاصل انو البت ضربتها ركشة.. واغمي عليها واسعفها بتاع الركشة زاتو.. 

جابها هنا وسلم نفسه للشرطة والان هو في الحراسة ..

 العسكري ده قال لابوها  البت دي مالقينا عندها لاتلفون.. لا اوراق ثبوتيه بس كان الدكتور قال بتصحى قريب..

والحمد لله هسي كويسه ..ماعندها عوجة.. انا هسي كنت معاها  

وقالت اضربو لابوي .. وادتنا رقمك.. واحتمال كبير يخرجوكم بعد تدفعو ليهم فواتيرهم .. 

اها الجماعة دايرين يدخلو كلهم يشوفوها.. بس حموهم .. قالو  يدخلو اتنين دخل ابوها وخالها الكبير.. 

وانا وباقي الناس قعدنا برة انتظرنا ..

وبقو يدخلو نفر نفر.. يطلع واحد من جوة ويدخل واحد.. لمن فضلت انا قلت ليهم ممكن ادخل اكفر ليها؟

زياد قال لي انت  تدخل بياتو صفة؟

قلت ليهو خير يازول ماداخل .. بس ادوني تلفون ابوها.. اكفر ليها بالتلفون..  مادام وصلت هنا  ..طبعا  لانو ابوها جوة  معاها ماطلع .. 

في واحد من شباب الجيران..  اداني رقم ابوها .. وانا برة اتصلت عليهو .. 

قلت ليهو انا محمد ياعم .. الجيت معاكم من صالحة ..قاعد بره .. لو سمحت  اديني صفاء بالتلفون اكفر ليها .. 

قال لي ليه مادخلوك ؟ تعال جوة ياولدي.. ما في مشكله.. 

قلت ليهو زياد منعني..قال لي ليه زياد يمنعك؟ 

صفاء لمن سمعت ابوها بتكلم قالت ليهو ده منو يا ابوي .. قال ليها ده محمد الكان معاكم امس في الساحة .. جا معانا يطمن عليك .. 

قالت ليهو خليهو يدخل يا ابوي زياد يمنعه ليه.؟؟ .  ولي امري هو؟

قام ابوها قال لي اتفضل يامحمد.. تعال لينا في الطابق التاني ..الغرفة كم كدا ما متذكر ..

اها يازول دخلت طوالي .. وانا داخل بعاين للوهم الاسمو زياد ده بطرف عيني.  

نظام كيه عليك يا وهمي.  

طلعت ودقيت الباب براحة كدا.. لقيت معاها ابوها وخالها.. ولافين ليها راسها بي شاش.. شكلها مفلوقة في راسها..

لمن شفتها قلت بي قلبي ..

ياريتني لو بدلك نزف بي  فلقه.

قلبي عليك حزين زي كنو ماخد علقه.

عاشقاكي المشاعر.. وجات عليك مندلقه..

كان فتشنا زيك..  في الكتب ما بنلقى ..

ايا والله.. 

قلت ليها الف سلامة عليك وكفارة ماتشوفي شر.. والله امبارح فتشنا ليك فتاشه شديدة ..

دايرة تتكلم ابوها قال ليها ماتتكلمي ياصفاء ..انتي تعبانه .. 

قالت ليهو انا كويسه يا ابوي .. 

وقبلت علي ..قالت والله انا خفت من المشكلة .. ومن اخو عفراء  .. لانو عندو نفسيات .. بضرب اي زول في وشو  .. حكت لي عنه اخته .. وانا قلت لو عرفني انا معاها..

 احتمال يضربني ..  او يمشي يتكلم عني في الحلة .  فاتخارجت سريع من الساحة . 

وانا طالعة خايفة  وبتلفت ضربتني ركشه  .. تاني ماعارفه حاجة.. اعفي لي يامحمد تعبتك معاي . قلت ليهو تعب شنو يا صفاء مافي تعب ولاشي ..

قالت لابوها ..  ابوي قرب اديني اضانك..

ابوها انتكى فوقها كدا  .. وسوست ليهو بكلام.. 

ابتسم كدا وقال ليها .. غايتو انتي ياصفاء في قمة المحن .. ولاهماك..

وقبل علي لقاني مستغرب في التفاهم الحاصل بين الاب وابنته .. 

قال لي ماتستغرب انا عندي اربعة بنات بتعامل معاهن بنفس الطريقة دي بكل الصراحة واسرارنا مع بعض ..

وقبل على صفاء قال ليها ..

اسمعي  ياصفاء..انا ماشي مع العسكري البرة ده .. افك الولد بتاع الركشه ..واشطب البلاغ .. 

انت  يامحمد بتمشي ولاتنتظرني نوصلك معانا؟؟..

قلت ليهو لا لا .. ياعم .. انا بعد اطمأنيت علي صفاء .. بمشي وان شاء الله لمن تقوم بالسلامة ..  اسجل ليكم زيارة في الفتيحاب.

قال لي خلاص نتواصل ان شاء الله  .. خالها الكبير قاعد متمحن.. مع ولدو يسمع في الحوار..

بعد ابوها طلع بدقايق .. قالت لي انت دقيت لابوي برقمك؟ قلت ليها نعم.. قالت لي خلاص انا بعد اصل البيت ..  بشيل رقمك من ابوي وبدق ليك .. 

اها كلها دقيقتين بعد طلع ابوها .. اناودعتا ومشيت ..

بس ياجماعة انا شكلي دخلت البيت بخشم الباب.. والقادم احلا  .. متفائل شديد .. 

لانو ابوها الطيبان  الشافتو عيني ده مستحيل .. بجبرها على ود عمتها العامل زي الفيل ده .. عارفين صفاء وسوست لابوها قالت ليهو شنو؟

بوريكم لي قدام ...

المهم ركبت مشيت  .. واتصلت علي عابد احكي ليهو الحصل في المستشفى  .. 

قدر ما اتصلت عليهو ابا يرد لي .. 

لمن وصلت البيت بعد  الساعة 8 بالليل رجع لي ..  والله انا كنت تعبان تعب .. قلت ليهو ياخي انا بتصل عليك مابترد مالك؟؟ .. قال لي كنا صايعين معاي مودة .. 

قلت ليهو لا اله الا الله .. 

هسي انت البارح ماكنت مع عفراء .. ياخي انت البنات ديل ملعبة .. قال لي يازول انا لمن تجيني فرصة ضهب مابفوتها .. وبالمناسبة انا متأكد علاقاته مع البنات ماشريفة ابدا .. 

خصوصا مودة دي .. لانها سمعتها من زمان في الحلة زي الطين ..

قلت ليهو كنت عايز احكي ليك عن صفاء .. قال لي ياخ صفاء دي والله توزن الوهم بتاعاتي ديل كلهن .. لكن شكلها كدا عاملة الشريف الرضي .. وانا زي دي ماعندي ليها زمن وجرجرة وحب وكلام فاضي .. 

قلت ليهو طيب انت امبارح كنت بتجرجر .. مع عفراء في الخرطوم .. قال لي عفراء دي انا بخطط معاها في خطط انت ماعارفها .. 

والله اتفقنا تب وبقينا على المواعيد .. بس اخوها الوهم ده ضيع التايم .. 

والله ياجماعة زي مابحكي ليكم وبتكلم في الكلام ده عااااااااادي كانه .. كانه

مافي حاجة .. 

يعني المقصود والعايز اوصله انو عابد ممكن يصل لابعد الحدود .. ولايهمه شي تمام .. 

المهم انا بقيت ببعد منه شوية وشوية وبتهرب منه تهرب .. لكن هو لايوق والله لبانة بس اصلو مابتفك مني بسهولة .. 

مرت الايام وانا منتظر تلفون من صفاء بي فرق الصبر تتصل علي طبعا ..

طبعا رقم ابوها معاي وكل مرة اقول اتصل عليهو اسأله منها تاني اغير راي ..اظن مر اسبوع كامل بالحال ده ولا اتصلت علي اظنها نستني عديل .. 

وماعارفة انها ماقاعدة تطلع من خيالي الاربعة وعشرين ساعة بفكر فيها وبتذكر فيها .. 

بس يوم انا قافة معاي في المنطقة والحتة مسخنة .. قلت والله الليلة كان اتصل عليها .. مسكت التلفون واتصلت علي رقم ابوها .. ورد علي منو معاي قلت ليهو انا محمد الزول المن صالحة المشيت معاكم المستشفى لصفاء ..

قال لي اوووو الرجل الشهم .. كيف حالك ياخ ان شاء الله انت طيب .. 

قلت ليهو والله تمام الحمد لله .. اها صفاء بقت كيف .. كنت منتظر اتصال منكم .. 

قال لي والله بقت كويسة والله بس الارقام الاتصلت اليوم داك كتيرة ورقمك ضاع في نص الزحمة هههه .. لكن والله صفاء في احسن حال .. 

قلت ليهو عليك سلم عليها وبلغها اني بسأل منها ..

قال لي ان شاء الله بكلمها .. قربت اقول ليهو لو جمبك اديني ليها بس استحيت منو .. 

بس بعد عشرة دقايق من المكالمة دي .. جاتني مكالمة من رقم غريب .

الو السلام عليكم .. صوت بت قلت ليها عليكم السلام ..

قالت لي ازيك يامحمد.. قلت ليها هلا والله ..

قالت لي انا صفاء .. قلت ليهو ياهلا ياهلا.. والله قربت ازغرد .. ههه لو صبر القاتل لمات المقتول ..

قالت لي والله اسفة ما اتصلت عليك .. قلت ليها ولايهمك اهم حاجة انتي بقيتي كيف ؟

قالت لي  والله يامحمد عندي صداع من يوم الحادث مافكاني .. كل يوم من دكتور لدكتور.. لكن الحمد لله الصور نضيفة .. ومتحركة اصلو مارقدت ليهو..

وبعدين سألت ابوي من رقمك مالقاهو .. قلت لمن الاقي عفراء القاهو عندها .. عفراء تلفونها مقفول .من يوم الساحة .. وماعارفة الحاصل عليها شنو؟

المهم المكالمة خلصت مع صفاء وانا لميت في رقمها .. ودي كانت النقطة المنها بدت قصتي مع صفاء .. 

وبقينا متواصلين .. وحسيت من مكالماتها انها .. عندها مشاعر تجاهي واضحة .. لكن كيف السبيل  لزول زباينو مزاحمة ..  

في يوم من ذات الايام  .. كنت بتكلم معاها بالليل ..  وانا في الصالون .. فجأة اسمع ليك صوت زول تلب جوة الحوش.. وجاء جاري كابس الباب بتاع الضالون .ودفر الباب وخش لي جوة .. ..  

الى اللقاء..